ប្រទេសចិននិងថៃបានព្រមព្រៀងចាប់ដៃគ្នាសហការជាមួយគ្នាដើម្បីលើកកម្ពស់ការអភិវឌ្ឍនៃចំណងទំនាក់ទំនងទ្វេភាគីនិងពង្រីកកិច្ចសហប្រតិបត្តិការលើវិស័យផ្សេងៗ ក្នុងកិច្ចប្រជុំមួយកាលពីថ្ងៃព្រហស្បតិ៍ រវាងនាយករដ្ឋមន្រ្តីថៃ លោក ប្រាយុទ្ធចានអូចា និងសមាជិកក្រុមប្រឹក្សារដ្ឋចិននិងរដ្ឋមន្ត្រីការបរទេសចិនលោក Wang Yi។ 

លោក ប្រាយុទ្ធ បាននិយាយនៅក្នុងកិច្ចប្រជុំថារដ្ឋាភិបាលថ្មីរបស់ថៃនឹងរក្សាបាននូវគោលនយោបាយបន្តឆ្ពោះទៅសមស្របជាមួយប្រទេសចិននិងប្តេជ្ញាអភិវឌ្ឍន៍ទំនាក់ទំនងថៃ - ចិនឱ្យរឹងមាំ។ ជាពិសេសនោះ ប្រទេសថៃបានកោតសរសើរចំពោះសមិទ្ធផលដ៏អស្ចារ្យរបស់ប្រទេសចិនក្នុងការអភិវឌ្ឍសេដ្ឋកិច្ចនិងសង្គមនិងការកាត់បន្ថយភាពក្រីក្រហើយមានឆន្ទៈក្នុងការពង្រឹងទំនាក់ទំនងនិងកិច្ចសហប្រតិបត្តិការជាមួយភាគីចិន។

លោកនាយករដ្ឋមន្រ្តីមួយរូបនេះក៍បានមានប្រសាសន៍ថាគំនិតផ្តួចផ្តើមខ្សែក្រវ៉ាត់មួយ ផ្លូវមួយរបស់ប្រទេសចិនផ្តល់ផលប្រយោជន៍ដល់បណ្តាប្រទេសក្នុងតំបន់និងពិភពលោកជាច្រើនហើយប្រទេសថៃមានឆន្ទៈក្នុងការចូលរួមយ៉ាងសកម្មនៅក្នុងការអភិវឌ្ឍរបស់ខ្លួនជាមួយនឹងគម្រោងចិនមួយនេះ។ ហើយលោកប្រាយុទ្ធ បានមានប្រសាសន៍ថាប្រទេសរបស់លោកបានត្រៀមខ្លួនជាស្រេចដើម្បីសហការជាមួយប្រទេសចិនដើម្បីជំរុញការកសាងផ្លូវដែកថៃ - ចិនហើយលោកបានបន្ថែមថាប្រទេសថៃស្វាគមន៍ក្រុមហ៊ុនចិនទាំងឡាយដែលមានគោលបំណងមកពង្រីកការវិនិយោគនៅក្នុងប្រទេសនេះ។

ដោយរីករាយនឹងចំណងមិត្តភាពចិន - ថៃ លោក Wang បាននិយាយថាប្រទេសទាំងពីរទទួលបានសមិទ្ធផលគួរឱ្យកត់សម្គាល់ក្នុងការរួមគ្នាកសាងគម្រោងខ្សែក្រវ៉ាត់មួយ ផ្លូវមួយដែលមិនត្រឹមតែនាំមកនូវផលប្រយោជន៍ជាក់ស្តែងដល់ប្រជាជននៃប្រទេសទាំងពីរប៉ុណ្ណោះទេ ប៉ុន្តែថែមទាំងរួមចំណែកដល់ការតភ្ជាប់និងអភិវឌ្ឍន៍ក្នុងតំបន់ផងដែរ។ លោកបានបន្ថែមថាប្រទេសចិនបានត្រៀមខ្លួនរួចជាស្រេចក្នុងការនាំចូលផលិតផលកសិកម្មដែលមានគុណភាពខ្ពស់បន្ថែមទៀតពីប្រទេសថៃនិងធ្វើឱ្យមានភាពប្រសើរឡើងនូវភាពជាដៃគូសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសចិននិងប្រទេសថៃ៕

ដោយ៖ នឿន វណ្ណៈ