មនុស្សវ័យចំណាស់សារភាពពីកំហុសធំៗចំនួន ៨ ដែលខ្លួនមានវិប្បដិសារីបំផុតនៅក្នុងជីវិត
អ្នកអាចនិយាយថា គ្មានអ្វីដែលគួរឲ្យសោកស្តាយ។ តើអ្នកហ៊ានស្បថទេ? បើអ្នកមិនទាន់បានធ្វើដំណើរឆ្លងកាត់ពេញមួយជីវិតរបស់អ្នកទេ អ្នកក៏មិនត្រូវប្រញាប់ពេកក្នុងការផ្តល់ចម្លើយថា អ្នកគ្មានអ្វីដែលគួរឲ្យសោកស្តាយ ឬមានវិប្បដិសារីនោះដែរ។
ឥឡូវនេះ អ្នកអាចចំណាយពេលបន្តិចមក ហើយមកមើលការស្រាវជ្រាវរបស់លោក Karl Pillemer អ្នកជំនាញផ្នែកចិត្តសាស្ត្រ និងអភិវឌ្ឍរបស់អាមេរិកប្រចាំសាកលវិទ្យាល័យ Cornell។ បើតាមការលើកឡើងរបស់អ្នកជំនាញរូបនេះ ប្រសិនបើអ្នកឈានដល់ទីបញ្ចប់នៃជីវិតហើយ ប៉ុន្តែមិនមានការសោកស្តាយអ្វីសោះ នោះមានន័យថាអ្នកប្រហែលជាមិនបានចំណាយពេលរស់នៅក្នុងជីវិតដ៏គួរឲ្យរំភើបនោះឡើយ។
លោក Karl Pillemer ដែលជាអ្នកនិពន្ធសៀវភៅមានចំណងជើងថា "មេរៀន ៣០ សម្រាប់ការរស់នៅ” ឬ "30 Lessons for Living” បានធ្វើសម្ភាសន៍ទៅ លើមនុស្សវ័យចំណាស់ ១ ៥០០ នាក់ដែលមានវ័យពី ៦៥ ឆ្នាំឡើងទៅដើម្បីចង់ដឹងថា តើមនុស្សវ័យចំណាស់ទាំងនោះ មានអារម្មណ៍សោកស្តាយអ្វីជាងគេនៅក្នុងជីវិតរបស់ពួកគេ។ ជាលទ្ធផល ការស្រាវជ្រាវរបស់លោកបានបង្ហាញនូវអារម្មណ៍សោកស្តាយធំៗបំផុតចំនួន ៨ ខាងក្រោមនេះ៖
១.មិនបានយកចិត្តទុកដាក់ក្នុងការជ្រើសរើសដៃគូជីវិត
រឿងជ្រើសរើសដៃគូជីវិតគឺជារឿងសំខាន់សម្រាប់មនុស្សម្នាក់ៗ ប៉ុន្តែមនុស្សវ័យចំណាស់ទាំងនោះសារភាពថា មិនសូវចាប់អារម្មណ៍លើរឿងនេះទេ។ ពួកគេជ្រើសរើសដៃគូជីវិតតាមអារម្មណ៍ ហើយមិនបានមើលប្រវត្តិ ឬពូជពង្សវង្សត្រកូលដៃគូច្បាស់លាស់ មុនសម្រេចចិត្តរៀបការ។
ដំបូន្មានរបស់មនុស្សវ័យចំណាស់៖ មុនសម្រេចចិត្តជ្រើសរើសអ្នកណាម្នាក់ជាដៃគូជីវិត ត្រូវមើលប្រវត្តិ ឬស្គាល់ចិត្តថ្លើមគ្នាឲ្យបានច្បាស់ជាមុនសិន។ អ្នកត្រូវប្រាកដថា ដៃគូជីវិតរបស់អ្នក ជាមនុស្សល្អស័ក្ដិសមនឹងនាក់។ សុខចិត្តមិនរៀបការប្រសើរជាងរៀបការជាមួយមនុស្សខុស។
២.មិនបានដោះស្រាយបញ្ហាបែកបាក់គ្រួសារ
បើតាមការស្រាវជ្រាវរបស់លោក Pillemer មនុស្សវ័យចំណាស់ដែលសោកស្តាយជាងគេ គឺការបង្កើតទំនាស់នៅក្នុងគ្រួសារដូចជាជាមួយកូន ឪពុកម្ដាយ ឬបងប្អូនជាដើមហើយផ្តាច់ទំនាក់ទំនងជាមួយពួកគេចោល។ អ្នកទាំងនោះនិយាយថា ខ្លួនចង់ ផ្សះផ្សា ឡើងវិញ ចង់សុំអភ័យទោស ឬព្យាយាមទាក់ទងឡើងវិញ ប៉ុន្តែពេលខ្លះវាបានយឺតពេលទៅហើយ។
ដំបូន្មានរបស់មនុស្សវ័យចំណាស់៖ ប្រសិនបើអ្នកយល់ថា អ្នកនៅមានសមត្ថភាពអាចដោះស្រាយបញ្ហាបែកបាក់គ្រួសារបាន អ្នកត្រូវរកមធ្យោបាយគ្រប់បែបយ៉ាងតាមដែលអាចធ្វើបានដើម្បីធ្វើឲ្យវាល្អប្រសើរឡើងវិញ។ ស្វែងរកឱកាសដើម្បីសុំអភ័យទោស និងផ្សះផ្សាត្រូវរ៉ូវគ្នាដូចមុនគឺជារឿងល្អបំផុត។
៣.មិនបានបង្ហាញក្តីស្រលាញ់ និងធ្វើរឿងល្អៗដាក់មនុស្សជាទីស្រលាញ់ឲ្យបានគ្រប់គ្រាន់
លោក Pillemer បានរកឃើញថា ជាញឹកញាប់ការសោកស្តាយធំបំផុតមួយរបស់មនុស្សវ័យចំណាស់ គឺការដែលមិនបានបង្ហាញក្តីស្រឡាញ់ និងធ្វើល្អឲ្យបានពេញលេញចំពោះមនុស្សជាទីស្រលាញ់។ តាមពិតទៅនេះមិនមែនមានន័យថា ពួកគេមិនបានស្រលាញ់នោះទេ ប៉ុន្តែខ្លួនហាក់ជាស្ទាក់ស្ទើរក្នុងការនិយាយវាចេញមកឲ្យដូចកាលស្នេហ៍គ្រាដំបូង។ អ្នកទាំងនោះបានបន្ថែមទៀតថា ខ្លួនចង់សុំទោស ចង់បញ្ជាក់ក្តីស្រលាញ់ និងចង់ឃើញមនុស្សដែលខ្លួនស្រលាញ់មានក្តីសុខឡើងវិញ ប៉ុន្តែគួរឲ្យស្តាយព្រោះពេលខ្លះមនុស្សទាំងនោះ បានលាចាកលោកនេះទៅហើយ។
ដំបូន្មានរបស់មនុស្សវ័យចំណាស់៖ កុំរង់ចាំឱកាសល្អមកដល់! អ្នកត្រូវប្រញាប់បង្ហាញពីអារម្មណ៍ពិត និងធ្វើទង្វើល្អរបស់អ្នកទៅកាន់មនុស្សជាទីស្រលាញ់របស់អ្នក ទាន់ពួកគេនៅមានជីវិត ឬនៅក្បែរអ្នក។
៤.មិនបានដើរកម្សាន្តឲ្យបានគ្រប់គ្រាន់
មនុស្សវ័យចំណាស់ទាំងនោះបានសារភាពថា ខ្លួនមានក្តីប្រាថ្នាទៅកាន់កន្លែងនានានៅជុំវិញពិភពលោក។ ប៉ុន្តែនៅពេលដែលពួកគេនៅមានកម្លាំងកំហែងគ្រប់គ្រាន់ពួកគេយល់ថា ការរកប្រាក់ជារឿងសំខាន់ ជាប់រវល់ការងារ ឬ កាលៈទេសៈអំណោយផលខ្វះលទ្ធភាពជាដើម។ យ៉ាងណាមិញ នៅពេលដែលពួកគេមានប្រាក់ និងគិតថា អាចមានពេលដើរកម្សាន្តបាន បែរជាខ្លួនឈានដល់វ័យចំណាស់ មានសុខភាពទ្រុឌទ្រោម ទៅណាមិនបានឆ្ងាយទៅវិញ។
ដំបូន្មានរបស់មនុស្សវ័យចំណាស់៖ ដំណើរកម្សាន្តពិតជាសំខាន់ខ្លាំងណាស់។ ទាន់អ្នកនៅមានឱកាស មានកម្លាំងពេញអាចចាយបាន និងរកបាន អ្នកគួរឆ្លៀតធ្វើដំណើរកម្សាន្តទៅកន្លែងណាដែលអ្នកចង់ទៅ។ ពេលចាស់ទៅ លុយដែលអ្នកខំរកពីក្មេងមក មិនបានជួយអ្វីអ្នកច្រើនទេ។
៥.ចំណាយពេលព្រួយបារម្ភជ្រុលពេក
បើតាមការស្រាវជ្រាវរបស់លោក Pillemer មនុស្សវ័យចំណាស់ទាំងនោះបានសារភាពថា ខ្លួនសោកស្តាយណាស់ដែលបានចំណាយពេលព្រួយបារម្ភច្រើនលើរឿងឥតប្រយោជន៍បើទោះបីជាពេលខ្លះរឿងទាំងនោះមិនបានកើតឡើងផង ឬបានកើតឡើងរួចហើយក៏ដោយ។ ពួកគេពិតជាសោកស្តាយ ហើយចង់ទាញពេលវេលាត្រឡប់មកវិញ ប៉ុន្តែមិនអាចទៅរួច។
ដំបូន្មានរបស់មនុស្សវ័យចំណាស់៖ កុំព្រួយបារម្ភច្រើនពេក! ការព្រួយបារម្ភច្រើនពេក ធ្វើឲ្យអ្នកចំណាយពេលដោយឥតប្រយោជន៍ និងបំផ្លាញជីវិតរបស់អ្នក។
៦.ក្បត់មនុស្សដែលខ្លួនស្រលាញ់
ការនិយាយកុហក ក្បត់ និងបោកបញ្ឆោតអ្នកដទៃជាពិសេសមនុស្សដែលខ្លួនស្រលាញ់ទាក់ទងទៅនឹងរឿងសម្ព័ន្ធភាពគ្រួសារ ឬស្នេហាត្រីកោណ គឺជាអារម្មណ៍គួរឲ្យសោកស្តាយមួយរបស់មនុស្សវ័យចំណាស់។ ពួកគេលើកឡើងថា ខ្លួនមានវិប្បដិសារីដ៏ធំមួយដែលមិនអាចបំភ្លេចបាននៅក្នុងជីវិតនៅពេលបានក្បត់មនុស្សដែលខំស្រលាញ់ខ្លួន និងទុកចិត្តមកលើខ្លួន។ ពួកគេចង់សុំអភ័យទោស ប៉ុន្តែពេលខ្លះវាបានហួសពេលទៅហើយ។
ដំបូន្មានរបស់មនុស្សវ័យចំណាស់៖ ត្រូវបង្ហាញភាពស្មោះត្រង់ដល់មនុស្សដែលអ្នកស្រលាញ់ទោះបីជានៅពេលណាក៏ដោយ។ ប្រសិនបើអ្នកយល់ថា ខ្លួនឯងបានប្រព្រឹត្តិកំហុសលើរឿងនេះ អ្នកត្រូវប្រញាប់សារភាព និងសុំអភ័យទោសពីមនុស្សជាទីស្រលាញ់របស់អ្នក។
៧.មិនបានចាប់ឱកាសគ្រប់គ្រាន់ដើម្បីអាជីពការងាររបស់ខ្លួន
មនុស្សវ័យចំណាស់ដែលលោក Pillemer បានស្រាវជ្រាវគឺមានការសោកស្តាយជុំវិញរឿងអាជីពការងាររបស់ពួកគេលើសពីអ្វីដែលសាស្ត្រាចារ្យរូបនេះគិតទៅទៀត។ មនុស្សវ័យចំណាស់ទាំងនេះសារភាពថា ពួកគេបានមើលរំលង ឬក៏បដិសេធន៍ចោលឱកាសល្អៗជាច្រើននៅក្នុងអាជីពការងាររបស់ពួកគេ។
ដំបូន្មានរបស់មនុស្សវ័យចំណាស់៖ ត្រូវនិយាយយល់ព្រម ចំពោះឱកាសល្អៗនៅក្នុងអាជីពការងាររបស់អ្នក ដរាបណាវាបានធ្វើឲ្យអ្នកកាន់តែរីកចម្រើនទៅមុខ។ ព្យាយាមសាកល្បងធ្វើអ្វីៗដែលថ្មី និងកុំនៅមួយកន្លែងយូរពេក។
៨.មិនយកចិត្តទុកដាក់ថែរក្សាសុខភាព
មនុស្សវ័យចំណាស់ទាំងនោះយល់ថា ពួកគេបានចំណាយពេលធ្វើរឿងជាច្រើនដែលគិតថា ធ្វើឲ្យជីវិតរីករាយដូចជា ជក់បារី ផឹកស្រាយ៉ាងសប្បាយរីករាយ ទទួលទានអាហារតាមចិត្តចង់ ហើយមិនយកចិត្តទុកដាក់លើការហាត់ប្រាណនោះឡើយ។ ពួកគេបញ្ជាក់ថា យើងបានសប្បាយធ្វើរឿងទាំងនេះ ហើយថា វាមិនបានធ្វើឲ្យពួកគេស្លាប់ភ្លាមៗទេ។ ប៉ុន្តែ ១០ ទៅ ២០ ឆ្នាំ ក្រោយ វាក៏ហុចផលឲ្យពួកគេនូវជម្ងឺច្រើនមុខ។
ដំបូន្មានរបស់មនុស្សវ័យចំណាស់៖ សូមយកចិត្តទុកដាក់សុខភាពរបស់អ្នកឲ្យបានដិតដល់។ ផ្លាស់ប្ដូរបរិយាកាសនិងទម្លាប់រស់នៅរបស់អ្នកដើម្បីធ្វើឲ្យសុខភាពល្អដូចជា ទទួលទានអាហារឲ្យបានត្រឹមត្រូវ និងហាត់ប្រាណឲ្យបានទៀងទាត់៕
ប្រភព៖ Today
