អ្នកជំនាញបង្ហាញថា នៅពេលអនាគតរៀនបន្តនៅមហាវិទ្យាល័យទំនងជាលែងសំខាន់ទៀតហើយ
យោងតាមអ្នកជំនាញផ្នែកការអប់រំបានឲ្យដឹងថា ការសិក្សារៀនសូត្រដើម្បីទទួលបានសញ្ញាប័ត្រអប់រំពីមហាវិទ្យាល័យទំនងជាលែងសំខាន់សម្រាប់អាជីពការងាររបស់មនុស្សតទៅទៀតហើយ។
ថ្លែងនៅក្នុងបទសម្ភាសន៍មួយនៅក្នុងកម្មវិធី “ Street Signs Europe” របស់សារព័ត៌មាន CNBC កាលពីថ្ងៃថ្ងៃច័ន្ទកន្លងទៅ លោក John Fallon ដែលជានាយកប្រតិបត្តិក្រុមហ៊ុនអប់រំ Pearson ដ៏ល្បីល្បាញរបស់អង់គ្លេសបានឡើងថា ការរំពឹងទុកសម្រាប់ការផ្លាស់ប្ដូរក្នុងអាជីពការងារ និងអនាគតយូរអង្វែងរបស់មនុស្សកំពុងត្រូវបានកាត់បន្ថយនូវការឲ្យតម្លៃលើសារសំខាន់នៃការអប់រំនៅថ្នាក់មហាវិទ្យាល័យ។
លោក Fallon បានមានប្រសាសន៍ដូច្នេះថា៖« នៅពេលគិតដល់រឿងនេះ ប្រសិនបើអ្នករៀនចប់វិទ្យាល័យនៅអាយុ ១៨ ឆ្នាំ អ្នកនឹងមានឱកាសរស់ច្រើនជាង ៥០% ដែលអាចមានអាយុលើសពី ១០០ ឆ្នាំ។ នេះមានន័យថា ទោះអ្នកមានអាយុ ៧០ ឬ ៨០ ឆ្នាំក្តី អ្នកនៅតែមានកម្លាំងអាចធ្វើការបានយ៉ាងល្អ ហើយឆ្លងកាត់រយៈពេលទាំងនេះ អ្នកទំនងជាមានអាជីពការងារដល់ទៅ ៥ ឬ ៦ ផ្សេងគ្នា។ ដូច្នេះទស្សនៈរៀនបន្តនៅមហាវិទ្យាល័យនៅអាយុអាយុ ២០ និង ២២ ឆ្នាំហ្នឹង វាលែងមានទៀតហើយ ពីព្រោះអ្នកត្រូវរៀនឡើងវិញពីអ្វីថ្មីៗ អភិវឌ្ឍជំនាញឡើងវិញ និងត្រូវព្យាយាមធ្វើរឿងទាំងនេះពេញមួយជីវិតរបស់អ្នក»។
ក្រុមហ៊ុន Pearson ដែលជាក្រុមហ៊ុនបោះពុម្ពផ្សាយផ្ដោតលើវិស័យអប់រំធំជាងគេបំផុតនៅលើពិភពលោក បានបង្កើតមាតិកា និងការវាយតម្លៃលើការអប់រំយ៉ាងច្រើនសំបូរបែប ហើយកំពុងប្រតិបត្តិការនៅក្នុងប្រទេសចំនួន ៧០ ។ ក្រុមហ៊ុននេះបានប្រកាសកាលពីខែកក្កដាថា រាល់ការចេញផ្សាយអត្ថបទបោះពុម្ពថ្មីៗចំនួន ១ ៥០០ របស់ខ្លួននៅសហរដ្ឋអាមេរិកនឹងផ្ដោតលើវិស័យ “ ឌីជីថល” ជាអាទិភាពតែម្តង (Digital First)។
CEO រូបនេះបានពន្យល់ទៀតថា ឥរិយាបថឆ្ពោះទៅរកការអប់រំ និងអាជីពការងារ កំពុងត្រូវបានផ្លាស់ប្ដូរដោយហេតុថា យុវជនជំនាន់ក្រោយបានធំដឹងក្តីឡើងជាមួយនឹងភាពរីកចម្រើននៃយុគសម័យឌីជីថល (Digital-First World)។ លោកថា យុវជនជំនាន់ក្រោយមិនចង់លះបង់ប្រាក់កាស និងពេលវេលារៀនសូត្រដ៏ច្រើនរបស់ខ្លួនទៅលើជំនាញទាំងឡាយណាដែលមិនពាក់ព័ន្ធទៅនឹងជីវិតការងារជាក់ស្តែងនៅក្នុងជីវិតរបស់ពួកគេទៀតឡើយ។
ទន្ទឹមនឹងការលើកឡើងរបស់លោក Fallon ការស្រាវជ្រាវថ្មីៗក៏បានរកឃើញនូវទិន្នន័យដែលថា យុវជនសម័យថ្មីចាប់ផ្តើមគិតគូររកជម្រើសថ្មីក្រៅពីការរៀនសូត្រនៅថ្នាក់មហាវិទ្យាល័យដើម្បីឱកាសជោគជ័យនៅក្នុងជីវិតរបស់ពួកគេ។ផ្អែកលើស្ថិតិរបស់មជ្ឈមណ្ឌលស្រាវជ្រាវនិស្សិតជាតិ (The National Student Clearinghouse Research Center) របស់អាមេរិកបានបង្ហាញថាការចុះឈ្មោះចូលរៀននៅកម្រិតក្រោយមធ្យមសិក្សាមានការថយចុះពីមួយឆ្នាំទៅមួយឆ្នាំ គឺ ១,៧% នៅនិទាឃរដូវឆ្នាំ ២០១៩ នេះ។
នៅអង់គ្លេសវិញ ការបោះឆ្នោតស្ទាបស្ទង់មតិមួយទៅលើសិស្សអង់គ្លេស ៣ ០០០ នាក់ដែលបានចេញផ្សាយនៅខែនេះបានរកឃើញថា មានសិស្ស ២០% ដែលមានអាយុត្រឹម ១៦ ឆ្នាំចុះក្រោមគិតថា ការសិក្សានៅថ្នាក់មហាវិទ្យាល័យមិនមែនជារឿងចាំបាច់សម្រាប់ពួកគេទេ។ ក្រុមហ៊ុន Ipsos Mori វិញក៏បានរកឃើញដែរថា យុវជនជំនាន់ក្រោយបង្ហាញអារម្មណ៍ពួកគេថា បានរៀនសូត្រពីមនុស្សល្អៗ សំខាន់ជាងរៀនយកសញ្ញាប័ត្រ។
យ៉ាងណាមិញ លោក John Fallon បានផ្តល់អនុសាសន៍ថា ដើម្បីឲ្យយុវជនជំនាន់ក្រោយនៅបន្តគាំទ្រដល់ការអប់រំនៅថ្នាក់មហាវិទ្យាល័យបន្តទៀត គ្រឹះស្ថានសិក្សានានាដូចជា មហាវិទ្យាល័យ វិទ្យាស្ថានឯកជន និងរដ្ឋជាដើម ត្រូវងាកមកផ្តោតលើមុខជំនាញណាដែលបច្ចេកវិទ្យាពិបាកនឹងជំនួសបាន។
«ជំនាញដែលត្រូវបង្រៀនគឺមានដូចជា ជំនាញត្រូវរៀនសូត្រដោយរបៀបណា រៀនពីរបៀប ឬបង្កើនសមត្ថភាពធ្វើឲ្យមានគំនិតច្នៃប្រឌិត គំនិតប្លែកៗ រៀនបង្កើនសមត្ថភាពក្នុងការបញ្ចុះបញ្ចូលអ្នកដទៃដែលមានទស្សនៈគំនិតខុសគ្នា សមត្ថភាពក្នុងការបណ្តុះបណ្តាលនរណាម្នាក់ពីរបៀបធ្វើអ្វីមួយ សមត្ថភាពក្នុងការដឹកនាំ និងសមត្ថភាពក្នុងការស្វែងយល់ពីអ្នកដទៃជាដើម។ ជំនាញទាំងអស់នេះ ពិតជាសំខាន់ណាស់នៅពេលអនាគត»។ លោក Fallon បញ្ជាក់។
ទោះបីជា Fallon បានព្យាករណ៍ថា ការអប់រំនៅមហាវិទ្យាល័យនឹងមិនសូវសំខាន់នាពេលអនាគតក៏ដោយក៏ ស្ថិតិស្រាវជ្រាវជាច្រើនបានបង្ហាញថា នៅពេលកន្លងមកការបន្តការសិក្សានៅសាកលវិទ្យាល័យនៅតែរួមចំណែកយ៉ាងសំខាន់សម្រាប់ការរកលុយបានកាន់តែច្រើន។
យោងតាមទិន្នន័យដែលចេញផ្សាយដោយការិយាល័យស្ថិតិអាមេរិកក្នុងខែកុម្ភៈកន្លងទៅ បានបង្ហាញថា អ្នកដែលមានសញ្ញាប័ត្រដូចជា វេជ្ជបណ្ឌិត មេធាវី អ្នកគ្រប់គ្រង គណនេយ្យករជាដើម រកប្រាក់ចំណូលបានច្រើនជាង អ្នកដែលបានរៀនត្រឹមថ្នាក់វិទ្យាល័យ។ ទន្ទឹមនឹងនេះ ទិន្នន័យរបស់វិទ្យាស្ថានអប់រំរបស់រដ្ឋាភិបាលអង់គ្លេសក៏បានរកឃើញដែរថា អ្នកដែលរៀនចប់មហាវិទ្យាល័យ មានប្រាក់ចំណូលកើនឡើង ៦% ខណៈដែលស្រី្ត អាចរកចំណូលកើនឡើងដល់ទៅ ២៨% ៕
ចុះអ្នកវិញ តើអ្នកគិតថា រៀននៅមហាវិទ្យាល័យនៅតែសំខាន់សម្រាប់អ្នកដែរឬទេ?
ប្រភព៖ CNBC
