ជប៉ុន​នឹង​ជួយ​ដំឡើង​អំពូល​​LED​ ជាង​៧​ពាន់​បង្គោលនៅ​ភ្នំពេញ​នឹង​ខេត្ត​ចំនួន​២​ក្នុង​ឆ្នាំ​នេះ​



លោក Yoshihisa KAINUMA ប្រធាន​ក្រុមហ៊ុន MinebeaMitsumi បាន​លើក​ឡើង​ថា​ ដើម្បី​បម្រើ​ឲ្យ​ទម្រង់​ទី​ក្រុង​ឆ្លាតវៃ​(Smart City) ក្រុមហ៊ុន​មាន​គម្រោង​ដំឡើង​បង្គោល​ភ្លើង​LED នៅ​រាជធានី​ភ្នំពេញ និង​ខេត្ត​សក្ដានុពល​ពីរ​ទៀត​គឺ ខេត្ត​សៀមរាប និង​ព្រះសីហនុ សរុប​ចំនួន ៧,៣៥៩​បង្គោល​នៅ​ឆ្នាំ​នេះ។ ការ​លើក​ឡើង​នេះ​ធ្វើ​ឡើង​នៅ​ក្នុង​ជំនួប​ជា​មួយ​ឯកឧត្ដម​ សាយ សំអាល់ រដ្ឋមន្ត្រី​ក្រសួង​បរិស្ថាន​កាល​ពី​ពេល​ថ្មីៗ​កន្លង​ទៅ។

លោក​ប្រធាន​បាន​ឲ្យ​ដឹង​ថា  បច្ចុប្បន្ន​នេះ ក្រុមហ៊ុន​បាន​ដំឡើង​បាន​ចំនួន ១ ១៨៧ បង្គោល​នៅ​តាម​មហាវិថី​ចំនួន ៣ នៅ​រាជធានី​ភ្នំពេញ។ ចំណែក​នៅ​ខេត្ត​សៀមរាប​ក្រុមហ៊ុន​បាន​ចុះ​អនុស្សរណ​នៃ​ការ​យោគយល់​ជា​មួយ​រដ្ឋបាល​សាលា​ខេត្ត​សៀមរាប​រួច​ហើយ​ដើម្បី​ដំឡើង LED បន្ថែម​ចំនួន ៥០០​ទៀត។ គម្រោង​នេះ​ក៏​នឹង​អាច​បន្ត​អនុវត្ត​នៅ​ខេត្ត​ព្រះសីហនុ​ផង​ដែរ។

ឯកឧត្តម​រដ្ឋមន្ត្រី សាយ សំអាល់ បាន​ស្វាគមន៍​នូវវឌ្ឍនភាព​ការងារ​របស់​ក្រុមហ៊ុន​មីនេបៀ​លើ​គម្រោង​ទីក្រុង​វៃឆ្លាត​តាម​រយៈ​ការ​ប្រើប្រាស់​អំពូល​ភ្លើង​ដែល​ប្រើប្រាស់​ចរន្ត​អគ្គិសនី​តិច​នេះ ដោយ​ឯកឧត្តម​បាន​គូស​បញ្ជាក់​ថា ការ​ប្រើប្រាស់​​ចរន្តអគ្គិសនី​ជា​មួយ​នឹង​អំពូល​ដែល​ស៊ី​ភ្លើង​តិច​មិនមែន​ត្រឹម​តែ​ជួយ​សន្សំសំចៃ​ចរន្តអគ្គិសនី ប៉ុណ្ណោះ​ទេ ប៉ុន្តែ​ក៏​បាន​ចូលរួម​កាត់​បន្ថយ​ការ​បំពុល​ដោយ​ពន្លឺ ជួយ​សន្សំសំចៃ​ថវិកា និង​ចូលរួម​ការ​ពារ​បរិស្ថាន ហើយ​ធ្វើ​ឱ្យ​ទី​ក្រុង​មាន​ផាសុកភាព​ក្នុង​ការ​រស់​នៅ៕ 

ដោយ៖ ជួប ស្រីរ័ត្ន