សង្ខេបព្រឹត្តិការណ៍សេដ្ឋកិច្ចសំខាន់ប្រចាំសប្ដាហ៍
សប្ដាហ៍នេះ Bizkhmer នឹងលើកយកព្រឹត្តិការណ៍ព័ត៌មានសេដ្ឋកិច្ចសំខាន់ចំនួន៥ ពីស្ថាប័នសារព័ត៌មានដែលគួរឲ្យទុកចិត្តនៅកម្ពុជា ដែលបង្ហាញពីគម្រោងវិនិយោគ ការរីកចម្រើននៅតាមបណ្ដាខេត្តសក្ដានុពល រួមនិងការអភិវឌ្ឍថ្មីៗដែលរដ្ឋាភិបាលបាលប្រកាស ។
១.គម្រោង និងទុនវិនិយោគវិស័យសំណង់កម្ពុជាកើនឡើងជាង ១,១ពាន់លានដុល្លារប្រចាំខែកក្កដា
កាលពីថ្ងៃទី២៩ ខែសីហា ឆ្នាំ២០១៩ កាសែតកោះសន្តិភាពបានចេញផ្សាយអំពី គម្រោង និងទុនវិនិយោគវិស័យសំណង់ដែលមានចំនួនសរុប ៥២៥ គម្រោង បានកើនឡើងជាង ១,១ពាន់លានដុល្លារ ពោលគឺកើនជាង៣៩% ប្រចាំខែកក្កដាកន្លងទៅ ខណៈចំនួនកម្មករនៅភ្នំពេញថយចុះ។ នេះបើប្រៀបធៀបទៅនឹងខែកក្កដាដូចគ្នានៃឆ្នាំ២០១៨ ហើយវិស័យនេះបានផ្តល់ការងារជាធម្យមប្រមាណពី ១៩ ០០០ នាក់ទៅ ២១ ០០០ នាក់ក្នុងមួយថ្ងៃ ។ សូមចុចទីនេះដើម្បីអានព័ត៌មានលម្អិត
២.រាជរដ្ឋាភិបាលដាក់ទុន ១៤ ៤៨៧ លានដុល្លារសម្រាប់កម្មវិធីវិនិយោគសាធារណៈ៣ឆ្នាំរំកិល ២០២០-២០២២
ដោយឡែកកាសែត រស្មីកម្ពុជា កាលពីថ្ងៃទី៣០ ខែសីហា ឆ្នាំ២០១៩ បានចេញផ្សាយថា រាជរដ្ឋាភិបាលកម្ពុជាត្រូវការទុនសរុប១៤,៤៨៧លានដុល្លារសម្រាប់កម្មវិធីវិនិយោគសាធារណៈ៣ឆ្នាំរំកិល២០២០-២០២២។ នេះបើយោងតាមសេចក្តីព្រាង “កម្មវិធីវិនិយោគសាធារណៈ៣ឆ្នាំរំកិល២០២០-២០២២”ដែលត្រូវបានអនុម័តដោយកិច្ចប្រជុំពេញអង្គគណៈរដ្ឋមន្ត្រីនាព្រឹកថ្ងៃទី៣០ ខែ សីហានេះ។ សូមចុចទីនេះដើម្បីអានព័ត៌មានលម្អិត
៣.ក្រុមហ៊ុនក្នុងស្រុកចាប់ដៃគូជាមួយវិនិយោគិនអង់គ្លេស និងសង្ហបុរីដាក់ទុន ៥០ លានដុល្លារលើគម្រោងអភិវឌ្ឍន៍សួនទេសចរណ៍ឆ្នេរសមុទ្រនៅខេត្តព្រះសីហនុ ងាកទៅមើលកាសែត ភ្នំពេញប៉ុស្តិ៍ឯណោះវិញ កាលពីថ្ងៃទី២៨ ខែសីហា ឆ្នាំ២០១៩ បានចេញផ្សាយអំពី គម្រោងទេសចរណ៍តម្លៃ $៥០ លាន នឹងធ្វើនៅខេត្តព្រះសីហនុ។ យោងតាមកាសែតនេះដដែលដែលបានដកស្រង់សម្តីរបស់អគ្គនាយកក្រុមហ៊ុន Rice Natural Development Plc បានឲ្យដឹងថា គម្រោងវិនិយោគរួមគ្នានេះនឹងយកទៅវិនិយោគលើការអភិវឌ្ឍន៍សួនទេសចរណ៍ឆ្នេរសមុទ្រនៅខេត្តព្រះសីហនុ។ សូមចុចទីនេះដើម្បីអានព័ត៌មានលម្អិត
៤.ក្រសួងកសិកម្ម និងក្រុមហ៊ុនចិន គ្រោងបង្កើតមជ្ឈមណ្ឌលបង្កាត់ពូជឈើប្រណិត
យោងតាមកាសែត Khmertime កាលពីថ្ងៃទី២៧ ខែសីហា ឆ្នាំ២០១៩ បានចេញផ្សាយថា ក្រសួងកសិកម្ម រុក្ខាប្រមាញ់ និងនេសាទកម្ពុជា និងអង្គការលេខាធិការដ្ឋានបណ្តាញអាស៊ីប៉ាស៊ីហ្វិកសម្រាប់ការគ្រប់គ្រងព្រៃឈើដោយនិរន្តភាព (APFNet) នៃសាធារណរដ្ឋប្រជាមានិត្យចិន មានគម្រោងបង្កើតមជ្ឈមណ្ឌលបង្កាត់ពូជឈើមានតម្លៃនៅឆ្នាំ២០២០ ខាងមុខ ដែលគម្រោងនេះមានទឹកប្រាក់ឧបត្ថម្ភប្រមាណ ៥,៥លានដុល្លារអាមេរិក។ សូមចុចទីនេះដើម្បីអានព័ត៌មានលម្អិត
៥.ឋានសួគ៌ "បូកគោ" នឹងក្លាយជាទីក្រុងថ្មីរបស់ខេត្តកំពត
ដោយឡែកសម្រាប់ព័ត៌មានចុងក្រោយ យោងតាមការចេញផ្សាយរបស់សារព័ត៌មានខ្លីខ្លីបានឲ្យដឹងថា ផ្ទៃដី ១៥៤៥,៥៨គីឡូម៉េត្រក្រឡា នៅឧទ្យានជាតិព្រះមុនីវង្ស “បូកគោ” នឹងក្លាយជាទីក្រុងអភិវឌ្ឍ ឆ្លាតវ័យ ទេសចរណ៍ប្រវត្តិសាស្ត្រ បៃតងធម្មជាតិ និងអាកាសធាតុ ភ្នំ-សមុទ្រដ៏ពិសិដ្ឋគ្មានពីរនៃព្រះរាជាណាចក្រកម្ពុជា ដែលជាគម្រោងអភិវឌ្ឍរបស់រាជរដ្ឋាភិបាលដែលមានចក្ខុវិស័យដល់ឆ្នាំ ២០៣៥ ក្រោមការសិក្សាស្រាវជ្រាវ និងរៀបចំប្លង់គោលដោយក្រសួងរៀបចំដែនដី នគរូបនីយកម្ម និងសំណង់ និងគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ។ សូម ចុចទីនេះដើម្បីអានព័ត៌មានលម្អិត
ដោយ៖ ជួប ស្រីរ័ត្ន
