លក្ខណៈ​ពិសេស​នៃ​ការ​ចំណាយ​សំខាន់ៗ​ចំនួន​ ១១ ចំណុច​របស់​រដ្ឋាភិបាល​អាមេរិក​​​ទៅ​លើ​ប្រធានាធិបតី​



នៅ​ពេល​ប្រធានាធិបតី​ថ្មី​ចូល​មក​កាន់​តំណែង រដ្ឋាភិបាល​អាមេរិក​ក៏​ត្រូវ​មាន​បន្ទុក​មួយ​​ដែរ​គឺ​ការ​ទទួល​ខុសត្រូវ​រ៉ាប់រង​លើ​ការ​ចំណាយ​​នានា​​រាប់​ចាប់តាំង​ពី​កន្លែង​ស្នាក់នៅ ​ការ​ហូបចុក ការ​កម្សាន្ត កង​សន្តិសុខ និង​ចំណាយ​ផ្សេងៗ​ទៀត​ទាំង​នៅ​អំឡុង​ពេល និង​ក្រោយ​ពេល​អស់​តំណែង​ទាក់ទង​ទៅ​នឹង​ជីវិត​​ឯកជន​របស់​ប្រធានាធិបតី។ នៅ​ខាងក្រោម​នេះ អ្នក​នឹង​បាន​ស្វែង​យល់​បាន​លម្អិត​ពី​ការ​ចំណាយ​ទាំង​នោះ​៖ ​​

១.ទទួល​បាន​​ប្រាក់ខែ ៦ ខ្ទង់
ប្រធានាធិបតី​អាមេរិក​​នៅ​ពេល​បច្ចុប្បន្ន​នេះ ទទួល​បាន​ប្រាក់ខែ ៤ សែន​ដុល្លារ​​ក្នុង​មួយ​ឆ្នាំ​​ដែល​​នេះ​មិន​រាប់​បញ្ចូល​ប្រាក់​ឧបត្ថម្ភ ៥ ម៉ឺន​ដុល្លារ​បន្ថែម​ទៀត​ក្នុង​មួយ​ឆ្នាំៗ​ឡើយ​។ សម្រាប់​លោក Trump ក្រៅពី​ប្រាក់​ខែ លោក​ទទួល​បាន​ប្រាក់​ឧបត្ថម្ភ​សម្រាប់​ធ្វើ​ដំណើរ ១ សែន​ដុល្លារ និង ១៩ ០០០ ដុល្លារ​ផ្សេង​ទៀត​​សម្រាប់​​ចំណាយ​លើ​កម្មវិធី​កម្សាន្ត​នានា។ ប្រាក់​ខែ​ប្រធានាធិបតី​ក៏​​ជាប់​ពន្ធ​ដែរ ហើយ​មិន​មាន​ប្រាក់​​រង្វាន់​ (Bonus) ​ប្រចាំ​ឆ្នាំ​​ឡើយ​។

២.ត្រូវ​​មក​រស់​នៅ​ក្នុង​សេតវិមាន​ពេល​ក្លាយ​ជា​ប្រធានាធិបតី
សេតវិមាន​បាន​ក្លាយ​ជា​ភូមិគ្រឹះ​សម្រាប់​ប្រធានាធិបតី​អាមេរិក​គ្រប់រូប​ចាប់តាំង​ពី​ឆ្នាំ ១៧៩២ មក។ ជាមួយ​នឹង​​កម្ពស់ ៦ ជាន់ និង ១៣២ បន្ទប់ ប្រធានាធិបតី​ដែល​ជាប់​ឆ្នោត​ក្លាយ​ជា​ប្រធានាធិបតី ​ត្រូវតែ​ផ្លាស់ប្ដូរ​ទីលំនៅ​មក​រស់នៅ​ទីនេះ។

៣.ផ្លាស់មក​នៅ​​ភ្លាម ប្រធានាធិបតី​ទទួល​បាន​​ប្រាក់​ឧបត្ថម្ភ​ ១ សែន​ដុល្លារ​​ដើម្បី​តុបតែង​កន្លែង​ស្នាក់នៅ 
រាល់​ប្រធានាធិបតី​ដែល​​ចូល​មក​រស់នៅ​ទី​នេះ​ថ្មីថ្មោង ត្រូវ​បាន​ផ្តល់​ប្រាក់​ឧបត្ថម្ភ ១ សែន​ដុល្លារ​សម្រាប់​ចំណែក​លើ​ការ​តុបតែង​​ និង​រៀបចំ​លំអ​បន្ទប់​ស្នាក់​នៅ។ កាល​លោក Obama នៅ​កាន់​តំណែង​លោក​​បដិសេធន៍​មិន​ទទួល​យក​ប្រាក់​ឧបត្ថម្ភ​នេះ​ឡើយ ដោយ​លោក​សុខចិត្ត​ចេញ​លុយ​ពី​ហោប៉ៅ​របស់​លោក ខណៈ​​មក​សម័យ​លោក Trump លោក​បាន​ចំណាយ​ដល់​ទៅ ១,៧៥ លាន​ដុល្លារ​ឯណោះ។ ​

៤.ប្រធានាធិបតី​​មិន​អាច​មើល​ភាពយន្ត​នៅ​ខាងក្រៅ​ដូចគេដូចឯង​បាន​ឡើយ
អតីត​ប្រធានាធិបតី​អាមេរិក​លោក Franklin Roosevelt បាន​រៀបចំ​បន្ទប់​​រោងកុន​មួយ​នៅ​ក្នុង​សេតវិមាន​ដែល​អាច​ផ្ទុក​កៅអី​សម្រាប់​អ្នក​​ទស្សនា ៥១ កៅអី។ ដូច្នេះ​រាល់​ប្រធានាធិបតី​​​ទាំងអស់​តម្រូវ​ឲ្យ​មើល​ភាពយន្ត​នៅ​ក្នុង​បន្ទប់​នេះ ពោល​មិន​អាច​​ចេញ​ទៅ​មើល​ខាងក្រៅ​ដូច​សាធារណជន​ទូទៅ​បាន​ឡើយ​។

៥.ប្រធានាធិបតី​អាច​សម្រាក​លំហែ​​នៅ​កន្លែង​ផ្សេង​ទៀត​បាន
ក្រៅ​ពី​ស្នាក់នៅ​សេតវិមាន ប្រធានាធិបតី​ក៏​អាច​​សម្រាក​ដើរ​កម្សាន្ត​នៅ​កន្លែង​ផ្សេង​បាន​ដែរ។ ឧទ្យាន​ភ្នំ Catoctin ស្ថិត​នៅ​ក្នុង​តំបន់ Frederick County រដ្ឋ Maryland គឺ​ជា​​ទីតាំង​កម្សាន្ត​​រៀបចំ​ទុក​មួយ​សម្រាប់​ប្រធានាធិបតី​គ្រប់រូប​​​សម្រាប់​សម្រាក​លំហែ​​តាំង​ពី​ឆ្នាំ ១៩៣០ មក​ ។

៦.ប្រធានាធិបតី​ជា​អ្នក​មាន​សិទ្ធិ​ប្រើប្រាស់​យន្តហោះ​ពិសេស Air Force One តែមួយគត់
យន្តហោះ​  Boeing 747-200B គឺ​ជា​យន្ត​ហោះ​ពិសេស (Air Force One) តែ​មួយ​គត់​​​របស់​ប្រធានាធិបតី​សម្រាប់​ប្រើប្រាស់​នៅ​ពេល​មាន​ដំណើរ​ទស្សនកិច្ច​ទៅ​កាន់​ប្រទេស​​នានា​នៅ​ជុំវិញ​ពិភពលោក។ ជា​មួយ​នឹង​​ការ​បំពាក់​បច្ចេកវិទ្យា​ទំនើបៗ និង​លក្ខណៈ​ពិសេស​ជា​ច្រើន​ទៀត​ប្រកបដោយ​សុវត្ថិភាព​ខ្ពស់​ រដ្ឋាភិបាល​​ត្រូវ​ចំណាយ​លុយ​ដល់​ទៅ​ ២ សែន​ដុល្លារ​ក្នុង​មួយ​ម៉ោង​នៅ​ពេល​យន្តហោះ​នេះ​ចេញ​ដំណើរ។

៧.ប្រធានាធិបតី​ក៏​​មាន​សិទ្ធិ​ផង​ដែរ​ក្នុង​​ការ​ប្រើប្រាស់​ឧទ្ធម្ភាគចក្រ Marine One
ប្រសិន​បើ​មាន​​ដំណើរ​ទស្សនកិច្ច​ក្នុង​ស្រុក ឬ​នៅ​តំបន់​ជិតៗ ប្រធានាធិបតី​ច្រើន​ប្រើប្រាស់​ឧទ្ធម្ភាគចក្រ Marine One ជំនួស​វិញ។ លក្ខណៈ​ពិសេស​នៃ​យន្តហោះ​នេះ គឺ​សុវត្ថិភាព បំពាក់​គ្រឿង​សព្វាវុធ​មីស៊ីល​ទំនើបៗ​ និង​បច្ចេកវិទ្យា​ខ្ពស់​មិន​ចាញ់​យន្តហោះ  Air Force One ប៉ុន្មាន​ឡើយ ហើយ​អាច​ហោះហើរ​បាន​ដល់​ទៅ​ជិត ២៥០ គីឡូម៉ែត្រ​ក្នុង​មួយ​ម៉ោង​ពេល​មាន​អាសន្ន ​បើ​ទោះបី​ជា​ម៉ាស៊ីន​ណាមួយ​ឈប់​ដំណើរការ​ក៏ដោយ​។

៨.ប្រធានាធិបតី​នឹង​ត្រូវ​បាន​​កង​សន្តិសុខ​ការពារ​​​ពេញ​មួយ​ជីវិត​​​
នៅ​ពេល​កំពុង​កាន់​តំណែង ប្រធានាធិបតី​ត្រូវ​បាន​កង​សន្តិសុខ​ការពារ​​សុវត្ថិភាព​យ៉ាង​តឹងតែង​បំផុត។ ប៉ុន្តែ​​ការពារ​​សុវត្ថិភាព​នេះ​​មិនមែន​បញ្ចប់​​ត្រឹម​ពេល​ប្រធានាធិបតី​អស់​អាណត្តិ​នោះ​ឡើយ ពោល​គឺ​ត្រូវ​​​ធ្វើ​ឡើង​​ពេញ​មួយ​ជីវិត​របស់​លោក ខណៈ​កូនៗ​ត្រូវ​​មាន​កង​សន្តិសុខ​​ការពារ​រហូត​ដល់​អាយុ ១៦​ឆ្នាំ។ ​កាល​ពី​ឆ្នាំ ២០១៧ កន្លង​ទៅ ការ​ចំណាយ​លើ​កង​សន្តិសុខ​​របស់​រដ្ឋាភិបាល​អាមេរិក​មាន​រហូត​ដល់​ទៅ ១,៩ ពាន់​លាន​ដុល្លារ​ឯណោះ។

​​​៩.រថយន្ត​រថក្រោះ  The Beasts
The Beasts គឺ​ជា​រថយន្ត​ដ៏​មាន​សុវត្ថិភាព​បំផុត​របស់​ប្រធានាធិបតី​​។ គេ​ចាត់ទុក​វា​ដូច​ជា​រថក្រោះ និង​បន្ទប់​ចល័ត​​ទៅ​ហើយ​​របស់​ប្រធានាធិបតី​ត្បិតអី​វា​​បាន​​បំពាក់​ដោយ​​បច្ចេកវិទ្យា​ពិសេសៗ ​ការពារ​​ការ​វាយ​ប្រហារ​ដោយ​កាំភ្លើង​ស៊ីប គ្រាប់បែក និង​ការ​វាយ​ឆ្មក់ៗ​​​ផ្សេងៗ​ទៀត​ដែល​អាច​កើត​មាន​ឡើង​ដោយ​យថាហេតុ។

១០.ប្រធានាធិបតី​ចូលនិវត្តន៍​ក៏​មាន​សិទ្ធិ​ទទួល​បាន​ប្រាក់​ឧបត្ថម្ភ​សម្រាប់​ដំណើរ​កម្សាន្ត​ដែរ
រដ្ឋបាល​សេវាកម្ម​ទូទៅ (General Service Administration) ត្រូវ​ផ្តល់​ប្រាក់​ឧបត្ថម្ភ​ដល់​អតីត​ប្រធានាធិបតី​ឲ្យ​បាន​គ្រប់គ្រាន់​សម្រាប់​ចំណាយ​លើ​ការ​ធ្វើដំណើរ​កម្សាន្ត​ និង​​​ទស្សនកិច្ច​ការងារ​ផ្ទាល់​ខ្លួន​។  ​សភា​ អាមេរិក​​​បាន​​បង្កើត​ច្បាប់​នេះ​​​ដោយ​តម្រូវ​ឲ្យ​​ផ្តល់​ប្រាក់​ចំនួន ២ សែន​ដុល្លារ​ក្នុង​មួយ​ឆ្នាំ។ ប៉ុន្តែ​លោក អូបាម៉ា​អតីត​​ប្រធានាធិបតី​បាន​បោះឆ្នោត​វេតូ​មិន​អនុម័ត​ដោយសារតែ​លោក​យល់​ថា​ ចំនួន​នេះ​គឺ​ជា​ការ​ខ្ជះខ្ជាយ​ថវិកា​ជាតិ​​ច្រើន​ពេក។ 

១១.ការ​ផ្លាស់ប្ដូរ​ពី​រដ្ឋបាល​មួយ​ទៅ​រដ្ឋបាល​មួយ​ទៀត​ក៏​ត្រូវ​ការ​ចំណាយ​ប្រាក់​ច្រើន​ដែរ
ការ​ផ្លាស់ប្ដូរ​ពី​រដ្ឋបាល​មួយ​ទៅ​រដ្ឋបាល​ថ្មី​​មួយ​ទៀត​​ដែល​នឹង​ចូល​មក​ជំនួស​តំណែង​រដ្ឋបាល​ចាស់ ក៏​ត្រូវ​ការ​ចំណាយ​ប្រាក់​ច្រើន​ដែរ។ គេ​ចាំ​បាន​ថា នៅ​ពេល​ដែល​រដ្ឋបាល​លោក​អូបាម៉ា​ចូល​មក​កាន់​តំណែង​ដំបូង​ជំនួស​រដ្ឋបាល​លោក ប៊ួស បាន​ចំណាយ​ដល់​ទៅ ៩,៣ ​លាន​ដុល្លារ​កាល​ពី​ឆ្នាំ ២០០៨ កន្លង​ទៅ។ ការ​ចំណាយ​នេះ​ធ្វើ ឡើង​ទៅ​លើ​ដូច​ជា បុគ្គលិក​រៀបចំ​កន្លែង​ស្នាក់នៅ ថ្លៃ​ចំណាយ​សម្រាប់​​អតីតភាព​ការងារ​របស់​បុគ្គលិក​រដ្ឋបាល​ចាស់ សេវាកម្ម​ទំនាក់ទំនង ប្រៃសនីយ៍ និង​ការ​ចំណាយ​ផ្សេងៗ​ទៀត។ 

សូម​បញ្ជាក់​ថា ការ​ចំណាយ​​ដែល​បាន​បង្ហាញ​ខាងលើ​នេះ គឺ​​​មាន​លក្ខណៈ​ត្រួសៗ​ប៉ុណ្ណោះ។ នៅ​ក្នុង​ទិដ្ឋភាព​ជាក់ស្តែង រដ្ឋាភិបាល​សហព័ន្ធ​ត្រូវ​ចំណាយ​លើ​ប្រធានាធិបតី ​បុគ្គលិក និង​​សម្ភារៈ​ផ្សេងៗ​ទៀត​​ដែល​បម្រើ​ការងារ​ឲ្យ​ប្រធានាធិបតី​ក្នុង​សេតវិមាន​នេះ៕ ​

ប្រភព៖ Businessinsider 

​​

 

 

X
5s