ការគ្រប់គ្រងពេលវេលាបានត្រឹមត្រូវជាចំនុចអាទិភាពមួយនាំបុគ្គលម្នាក់ទៅកាន់ភាពជោគជ័យ។ តែអ្នកមានធ្លាប់គិតថាខ្លួនឯងអ្នកចំណាយពេលវេលាធ្វើការច្រើន មានភាពហត់នឿយខ្លាំងតែលទ្ធផលការងារមិនស្របតាមអ្វីដែលអ្នកខំចំណាយ។ 

បុគ្គលមួយចំនួនកំពុងប្រើការគ្រប់គ្រងពេលវេលាមិនបានល្អ ដែលវានាំឲ្យមានការជះឥទ្ធិពលដល់លទ្ធផលការងារ។ ៦ ចំនុចខាងក្រោមអាចជាកំហុសដែលអ្នកប្រហែលជាកំពុងធ្វើក្នុងការគ្រប់គ្រងពេលវេលា៖

១) អ្នកបដិសេធថា អ្នកគ្មានបញ្ហាលើការគ្រប់គ្រងពេលវេលា

បញ្ហាកំពុងតែកើតមានបន្តបន្ទាប់ តែអ្នកបដិសេធថាមិនមែនកើតឡើងដោយសារភាពខ្វះចន្លោះនៃការគ្រប់គ្រងពេលវេលារបស់អ្នកនោះទេ។ អ្នកមិនទទួលយកចំនុចខ្វះខាត និងចំនុចខ្សោយរបស់អ្នក ហើយអ្នកនៅតែបន្តធ្វើការងារទាំងកំហុស។ 

២) មិនបានរៀបចំផែនការឲ្យបានត្រឹមត្រូវ

ការរៀបចំផែនការជារឿងមួយចាំបាច់ណាស់ដើម្បីអាចនាំឲ្យអ្នកសម្រេចបានលទ្ធផលការងារ។ ការធ្វើការងារតាមផែនការដែលបានកំណត់ វាជួយអ្នកឲ្យបំពេញការងារតាមលំដាប់លំដោយមិនស្ទះការងារ។

៣) អ្នកមិនបានបែងចែកថាការងារណាបន្ទាន់ ឬការងារណាសំខាន់

ការងារដែលអ្នកត្រូវធ្វើសុទ្ធតែមានភាពចាំបាច់ និងសំខាន់ តែការងារនីមួយវាអាចនឹងមានភាពចាំបាច់ និងសំខាន់តាមកាលៈទេសៈរបស់វា។ ពេលអ្នកបែងចែកមិនច្បាស់ពីអាទិភាពការងារថាមួយណាសំខាន់ និងចាំបាច់នោះបង្ហាញថាអ្នកកំពុងធ្វើការគ្រប់គ្រងពេលវេលាដោយមិនត្រឹមត្រូវហើយ។ ចំពោះការងារដែលអ្នកត្រូវធ្វើ និងមានអាទិភាពគឺជាការងារដែលមានភាពសំខាន់ បូកបន្ថែមភាពបន្ទាន់សម្រាប់ការងារមួយ។ 

៤) ការផ្ទេរអំណាចមិនបានត្រឹមត្រូវ

ការផ្ទេរអំណាចមានន័យថាអ្នកកំពុងរៀនបែងចែកការងារ បែងចែកពេលវេលា តែពេលអ្នកមិនបានធ្វើការផ្ទេរអំណាចគឺ ជាកំហុសក្នុងការគ្រប់គ្រងពេលវេលា ដែលវានាំឲ្យប៉ះពាល់លទ្ធផលការងារ។

៥) គ្មានភាពបត់បែន

អ្នកដែលចេះបត់បែន ជាមនុស្សដែលចេះមើលកាលៈទេសៈបំផុត។ អ្នកដែលមិនចេះបត់បែនគឺជាមនុស្សដែលមិនចេះគ្រប់គ្រងពេលវេលា ហើយគេបណ្តោយឲ្យការងារចាំបាច់ត្រូវខកខានតាមការធ្វែសប្រហែសនៃការគ្រប់គ្រងពេលវេលាមិនបានល្អរបស់គេ។ 

៦) ចង់បានភាពឥតខ្ចោះពេក

អ្នកដែលចង់បានភាពឥតខ្ចោះពេកតែងព្យាយាមធ្វើខ្លួនឯងឲ្យលំបាក គេតែងព្យាយាមធ្វើការងារគ្មានពេលសម្រាកដោយគិតថាការធ្វើបែបនេះនឹងនាំផលល្អដល់លទ្ធផលការងារ តែគេមិនបានគិតទេថាការងារដែលគ្មានកំណត់ ឬគ្រប់គ្រងម៉ោងពេលត្រឹមត្រូវវាមិនហុចផលគួរជាទីគាប់ចិត្តឡើយ។ 

អ្វីដែលអ្នកគួរធ្វើក្នុងការគ្រប់គ្រងពេលវេលានោះគឺ៖

១) រៀបចំ To-do list៖ ការរៀបចំ To-do list ជាការរៀបចំផែនការការងារប្រចាំថ្ងៃ។ To-do list នឹងកំណត់ការងារដែលអ្នកត្រូវធ្វើតាមលំដាប់លំដោយ។ 

២) ដាក់កាលវិភាគ៖ កាលវិភាគជាការរៀបចំផែនការការងារសម្រាប់ថ្ងៃស្អែក ការងារប្រចាំសប្តាហ៍ និងប្រចាំខែជាបន្តបន្ទាប់។

៣) ប្រតិភូកម្ម៖ ការផ្ទេរអំណាច ជាការងារមួយចាំបាច់ដែលអ្នកគ្រប់គ្រងត្រូវធ្វើក្នុងករណីការងារនោះមិនសំខាន់ខ្លាំង។

៤) មិនធ្វើអ្វីដែលមិនចាំបាច់៖ ការងារណាដែលមិននាំផលប្រយោជន៍ ឬគ្មានភាពចាំបាច់កុំធ្វើវានាំខាតពេលវេលា ព្រោះអ្នកមានការងារច្រើនណាស់ត្រូវបំពេញ។ ការងារដែលអាចឲ្យគេជំនួសបានប្រគល់ឲ្យគេរ៉ាប់រងទៅ៕

ដោយ៖ យ៉ាយ៉ា