កសិករត្បូងឃ្មុំត្រូវប៉ាន់ហើយ! ក្រុមហ៊ុនចិននឹងសង់រោងចក្រឆ្នៃស្វាយគម្រោងទី៣នៅទីនោះ
លោក Michael Tse ជា CEO & Executive Director នៃក្រុមហ៊ុន គ្រីន លិនឌ័រ (Green Leader) បានលើកឡើងថា ដើម្បីសម្រេចគោលដៅរបស់ក្រុមហ៊ុនក្នុងការនាំដំណាប់ស្វាយចំណិតស្ងួតឲ្យបានប្រមាណ ១០,០០០តោន ក្នុងមួយឆ្នាំ ក្រុមហ៊ុនគ្រោងនឹងសាងសង់រោងចក្រកែច្នៃស្វាយទី៣របស់ខ្លួនបន្ថែម នៅស្រុកតំបែរ ខេត្តត្បូងឃ្មុំ នាឆ្នាំ២០២០ខាងមុខ ដែលអាចមានសមត្ថភាពផលិតបានរហូតដល់ ៥ ០០០ តោន ក្នុងមួយឆ្នាំ។ នេះបើយោងតាមក្រសួងកសិកម្ម រុក្ខាប្រមាញ់នឹងនេសាទ ដែលបានចុះផ្សាយកាលពីពេលថ្មីៗនេះ។
លោក Michael Tse បានឲ្យដឹងថា សម្រាប់រយៈពេលវែង ក្រុមហ៊ុនមានផែនការបង្កើតរោងចក្រកែច្នៃបន្ថែមតម្លៃ សម្រាប់ផលិតផលផ្លែស្វាយ ដូចជា ភេសជ្ជៈទឹកស្វាយ( mango juice )និងស្វាយសុទ្ធ ( mango puree ) ដើម្បីបំពេញតម្រូវការឧស្សាហកម្មដុតនំ( baking industry ) របស់ប្រទេសចិនផងដែរ។ ជាការឆ្លើយតប ឯកឧត្ដមរដ្ឋមន្ត្រី នុត ច័ន្ទសុខា បានថ្លែងអំណរគុណចំពោះ ក្រុមហ៊ុន គ្រីន លិនឌ័រ ( Green Leader) ដែលបានបោះទុនវិនិយោគនៅព្រះរាជាណាចក្រកម្ពុជា ដោយក្រុមហ៊ុនមានយុទ្ធសាស្រ្ត និងផែនការច្បាស់លាស់ក្នុងការវិនិយោគលើវិស័យកសិកម្មកម្ពុជា។
គួរបញ្ជាក់ដែរថា ក្រុមហ៊ុន គ្រីន លិនឌ័រ (Green Leader) បានដំណើរការរោងចក្រទី១កាលពីខែមករា ឆ្នាំ២០១៨ និង បានផ្ដល់ការងារដល់កម្មករក្នុងស្រុកចំនួនជាង៥០០នាក់។ ក្នុងនោះរោងចក្រទី២ បាននឹងកំពុងដំណើរការ ស្ថិតនៅភូមិដំបងវិញ ឃុំត្រពាំងជោរ ស្រុកឧរាល់ ខេត្តកំពង់ស្ពឺ មានផ្ទៃដីជិត១៥ ០០០ម៉ែត្រក្រឡា ដែលមានសមត្ថភាពផលិតចំនួន២ ០០០ តោន ក្នុងមួយឆ្នាំ។ ជាមួយគ្នានេះ ក្រុមហ៊ុន ក៏គ្រោងនឹងសាងសង់រោងចក្រទី៣របស់ខ្លួន នៅស្រុកតំបែរ ខេត្តត្បូងឃ្មុំ នៅឆ្នាំ២០២០ ខាងមុខ ដោយមានសមត្ថភាពផលិតបាន ៥ ០០០ តោន ក្នុងមួយឆ្នាំ៕
