CDC អនុម័តគម្រោងរោងចក្រ២បន្ថែមក្នុងទំហំទុនជាង៧លានដុល្លារ
តាមសំណើសុំវិនិយោគរបស់ក្រុមហ៊ុនចំនួន២លើគម្រោង រោងចក្រផលិតកាបូប និងរោងចក្រសំលៀកបំពាក់ ដែលមានទំហំទុនវិនិយោគសរុបប្រមាណ ៧,៦លានដុល្លារអាមេរិក និងអាចផ្ដល់ការងារដល់ពលរដ្ឋបានចំនួន ៣.០១៨កន្លែង ត្រូវបាន គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ។
ក្រុមហ៊ុន “SIMAG INDUSTRIAL (CAMBODIA) CO., LTD” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅ ភូមិចាស់ ឃុំពេជ្រមុនី ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៤,៣លានដុល្លារអាមេរិក និងអាចបង្កើតការងារបានចំនួន ១.២៥៨កន្លែង។
ក្រុមហ៊ុន “GREENFIELD (CAMBODIA) INDUSTRY CO., LTD” គម្រោងបង្កើតរោងចក្រកាត់ដេរសំលៀកបំពាក់ ដែលមានទីតាំងវិនិយោគស្ថិតនៅផ្លូវជាតិលេខ៤ ភូមិគល់ សង្កាត់កន្ទោក ខណ្ឌកំបូល រាជធានីភ្នំពេញ មានទុនវិនិយោគប្រមាណ ៣,៣លានដុល្លារអាមេរិក និងអាចបង្កើតការងារបានចំនួន ១.៧៦០កន្លែង៕
ដោយ៖ ជួប ស្រីរ័ត្ន
