កម្ពុជានាំចេញទំនិញជិត១១ពាន់លានដុល្លារនារយៈពេល១០ខែ ក្នុងឆ្នាំ២០១៩
នារយៈពេល១០ខែក្នុងឆ្នាំ២០១៩នេះ ការនាំចេញទំនិញរបស់កម្ពុជាទៅកាន់ពិភពលោកក្រោមប្រព័ន្ធអនុគ្រោះពន្ធពាណិជ្ជកម្ម និងកិច្ចព្រមព្រៀងពាណិជ្ជកម្មសេរី មានទឹកប្រាក់ប្រមាណ ១០ ៨១៣លានដុល្លារអាមេរិក បើគិតទៅនឹងរយៈពេលដូចគ្នាក្នុងឆ្នាំ២០១៨ដែលមានទំហំប្រាក់ ១០ ១៥៨លានដុល្លារអាមេរិក គឺបានកើនឡើងប្រមាណ ៦៥៤លានដុល្លារអាមេរិក ដែលស្មើនឹង ៦,៤៥%។ នេះបើយោងតាមរបាយការណ៍បូកសរុបលទ្ធផលការងារពាណិជ្ជកម្ម និងទិសដៅការងារពាណិជ្ជកម្មឆ្នាំ២០២០ របស់ក្រសួងពាណិជ្ជកម្ម។
តាមរបាយការណ៍ខាងលើបានបង្ហាញបន្ថែមថា ក្នុងចំណោមទំនិញនាំចេញទាំងនោះកម្ពុជាបាននាំចេញ សំលៀកបំពាក់(Garments) មានទឹកប្រាក់ប្រមាណជាង ៦ ៤០៦លានដុល្លារអាមេរិក, វាយនភ័ណ្ឌ(Textiles) មានទឹកប្រាក់ប្រមាណ ៤០លានដុល្លារអាមេរិក, ស្បែកជើង(Footwear) មានទឹកប្រាក់ប្រមាណ ៩០៥លានដុល្លារអាមេរិក, អង្ករ(Rice)មានទំហំទឹកប្រាក់ ២៨៦លានដុល្លារអមេរិក រួមនិងផលិតផលផ្សេងៗទៀតមានចំនួនទឹកប្រាក់ប្រមាណជាង ៣ ១៧៤លានដុល្លារអាមេរិក។
បើតាមរបាយការណ៍ប្រចាំឆមាសទី១ របស់ធនាគារជាតិនៃកម្ពុជាបានឲ្យដឹងថា ការធ្វើពាណិជ្ជកម្មរបស់កម្ពុជាជាមួយអន្តរជាតិកំពុងតែមានបង្ហាញពីភាពល្អប្រសើរ ដោយក្នុងត្រីមាសទី១ឆ្នាំ២០១៩ កម្ពុជាបាននាំចេញទំនិញក្នុងតម្លៃសរុប ៦,៨ពាន់លានដុល្លារ ក្នុងនោះចំណែកទីផ្សារអាមេរិក មានចំនួន ២៨ ភាគរយ តំបន់អឺរ៉ុប ២៦,៦ ភាគរយ ចក្រភពអង់គ្លេស ៦,៦ ភាគរយ និងជប៉ុន ៧,៧ ភាគរយ។ ចំណែកការនាំចូលមានតម្លៃសរុបរហូតដល់ ១០,៥ ពាន់លានដុល្លារ នាំមុខដោយប្រទេស ចិន ដែលមាន ៤៦ ភាគរយ ថៃ១៥,៦ ភាគរយ វៀតណាម ១៣,២ ភាគរយ និងជប៉ុន ៤,៥ ភាគរយ។
គួរបញ្ជាក់ផងដែរថា ផលិតផលនាំចេញរបស់កម្ពុជាទៅកាន់ទីផ្សារអឺរ៉ុប (EU28) មានទំហំ ១ ០៩២លានដុល្លារ ក្នុងអត្រាកំណើនទាបប្រមាណ ១,៤% បានកំពុងបន្ថយចំណែកទីផ្សារនាំចេញរបស់កម្ពុជាពី ៣៧,៨% មកនៅ ៣៣,៨% ក្នុងត្រីមាសទី១ រវាងឆ្នាំ២០១៨ និងឆ្នាំ២០១៩៕
ដោយ៖ ជួប ស្រីរ័ត្ន
