ទំហំពាណិជ្ជកម្មទ្វេភាគីកម្ពុជា-ចិនកើនជាង ៨ពាន់លានដុល្លារក្នុងឆ្នាំ២០១៩
ចិនគឺជាប្រទេសធំឈានមុខមួយនៅក្នុងវិស័យវិនិយោគនៅកម្ពុជា ហើយបើគិតអំពីទំហំពាណិជ្ជកម្មទ្វេភាគីរវាងប្រទេសចិន និងកម្ពុជា ក្នុងឆ្នាំ២០១៩នេះគឺបានកើនដល់ចំនួន ៨,២ពាន់លានដុល្លារ ដែលស្មើនឹងកំណើន ២៧% បើធៀបនឹងឆ្នាំ២០១៨។ នេះបើតាមការលើកឡើងរបស់ ឯកឧត្ដម យឹម ឆៃលី ឧបនាយករដ្ឋមន្ត្រី ជាប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ នៅក្នុងពិធីសម្ពោធមជ្ឈមណ្ឌលពាណិជ្ជកម្មកម្ពុជា (គុនមិញ) នាទីក្រុងគុនមិញ ខេត្តយូណាន នៃសាធារណរដ្ឋប្រជាមានិតចិន កាលពីពេលថ្មីៗកន្លងទៅ។
នាឱកាសនោះ ឯកឧត្ដមឧបនាយករដ្ឋមន្ត្រី មានសង្ឃឹមខ្ពស់ថា មជ្ឈមណ្ឌលពាណិជ្ជកម្មកម្ពុជានៅទីក្រុងគុនមិញ ក៏ដូចជាមជ្ឈមណ្ឌលពាណិជ្ជកម្មកម្ពុជាដទៃទៀត នឹងជួយលើកកម្ពស់កិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងចិន ក៏ដូចជាជំរុញទំហំពាណិជ្ជកម្មទ្វេភាគីឲ្យកើនឡើងជាលំដាប់។ ជាក់ស្ដែង នៅឆ្នាំ២០១៨ ទំហំពាណិជ្ជកម្មសរុបទ្វេភាគីមានចំនួន ៦,៥ពាន់លានដុល្លារ កើនឡើង ១៥% បើធៀបនឹងឆ្នាំ២០១៧ ដែលមានតម្លៃត្រឹមតែ ៥,៦ពាន់លានដុល្លារ។
ជាមួយគ្នានេះផងដែរ ថ្លែងនៅក្នុងសុន្ទរកថាស្វាគមន៍ចំពោះវត្តមានរបស់ ឯកឧត្ដមឧបនាយករដ្ឋមន្ត្រី ឯកឧត្ដម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម ក៏បានជម្រាបជូនថា មជ្ឈមណ្ឌលពាណិជ្ជកម្មកម្ពុជា នៅទីក្រុងគុនមិញ ជាមជ្ឈមណ្ឌលពាណិជ្ជកម្មកម្ពុជាទី៦ ដោយកម្ពុជាបានបើកមជ្ឈមណ្ឌលបែបនេះ ចំនួនប្រាំរួចមកហើយនៅទីក្រុងក្វាងចូវ ហាយនីង ស៊ីអាន ហុងកុង និងយានថាយ។
ឯកឧត្ដមបន្តថា ជាមួយនឹងមជ្ឈមណ្ឌលពាណិជ្ជកម្មទាំងប្រាំមួយ ក៏ដូចជាកិច្ចព្រមព្រៀងដែលកម្ពុជាមានរួចមកហើយជាមួយនឹងចិន កម្ពុជា និងចិន ក៏នឹងពិនិត្យលទ្ធភាពដើម្បីឈានទៅដល់ការចរចាកិច្ចព្រមព្រៀងពាណិជ្ជកម្មសេរីទ្វេភាគីក្នុងឆ្នាំ២០២០ ខាងមុខ ដោយទាំងអស់នេះ នឹងពង្រឹងកិច្ចសហប្រតិបត្តិការពាណិជ្ជកម្មឲ្យកាន់តែរឹងមាំ ក៏ដូចជាបង្កើតនូវផលប្រយោជន៍ទៅវិញទៅមកជូនប្រជាជននៃប្រទេសទាំងពីរ៕
ដោយ៖ ជួប ស្រីរ័ត្ន
