ក្រុមហ៊ុនមួយនៅស្ទឹងត្រែងនាំចេញចេកអំបូងលឿងពី២០ទៅ៣០ក្នុងមួយថ្ងៃទៅក្រៅប្រទេស
ក្រុមហ៊ុនអង្គរបាណាណាស្ទឹងត្រែង ដែលមានទីតាំងស្ថិតនៅខេត្តត្រែង មានសមត្ថភាពអាចនាំចេញចេកអំបូងលឿងទៅកាន់ទីផ្សារក្រៅប្រទេសប្រមាណពី២០ ទៅ៣០តោន ឯណោះក្នុងមួយថ្ងៃ។ ក្រៅពីផលិតផលចេកអំបូងលឿងក្រុមហ៊ុននេះ ក៏បាននាំចេញផលិតផលសម្រេចទៅកាន់ទីផ្សារក្រៅប្រទេសប្រមាណ ២៥០តោន ទៅដល់៣០០តោន ក្នុងមួយសប្ដាហ៍ផងដែរ។
សកម្មភាពប្រមូលផលរបស់ក្រុមហ៊ុន អង្គរបាណាណាស្ទឹងត្រែង មានទីតាំងស្ថិតនៅក្នុង ឃុំអូរស្វាយ ស្រុកបូរីអូរស្វាយសែនជ័យ។ លោក ងៀង វ៉ាងយ៉ុង ប្រធានក្រុមវេចខ្ចប់ផលិតផលនាំចេញបានបញ្ជាក់ថា៖ ក្នុងមួយថ្ងៃកម្មករធ្វើការវេចខ្ចប់ចេកបានចាប់ពី២០តោនទៅ៣០តោនសម្រាប់នាំចេញទៅកាន់ទីផ្សារនៅក្រៅប្រទេស។
គួរបញ្ជាក់ផងដែរថា ក្រុមហ៊ុនអង្គរបាណាណាស្ទឹងត្រែង បានវិនិយោគដីសម្បទានសេដ្ឋកិច្ចពីរាជរដ្ឋាភិបាលចំនួន ២,៩៦៥ហិកតា ដែលបច្ចុប្បន្នបានដាំដំណាំចេកអំបូងលឿង កំពុងប្រមូលផលនិងដាំស្វាយ, ម្នាស់, ខ្នុរ និងក្រូចថ្លុងបន្ថែមទៀត ដើម្បីផ្ដល់ការងារបន្ថែមដល់ប្រជាពលរដ្ឋក្នុងតំបន់៕
ប្រភព៖ ក្រសួងព័ត៌មាន
ដោយ៖ ជួប ស្រីរ័ត្ន
