ស្ពានវែងបំផុតនៅកម្ពុជា គ្រោងប្រើថវិកា២០០លានដុល្លារសាងសង់ក្នុងឆ្នាំនេះ
ស្ពានកាត់ទន្លេវែងជាងគេបំផុតនៅកម្ពុជា ដែលឆ្លងពីខេត្តកំពង់ឆ្នាំង ទៅកាន់ខេត្តកំពង់ធំ មានប្រវែងសរុបប្រមាណជិត ៤គីឡូម៉ែត្រ ត្រូវបានសិក្សាគម្រោងចប់សព្វគ្រប់រួចរាល់ ដោយត្រូវបានដាក់ចូលទៅក្នុងផែនការអទិភាព និងជាជម្រើសទី១ របស់ក្រសួងសម្រាប់សាងសង់នៅក្នុងឆ្នាំ២០២០នេះ។
ថ្លែងប្រាប់សារព័ត៌មាន propertyarea.asia កាលពីពេលកន្លងទៅ ឯកឧត្ដម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងថា គម្រោងសាងសង់ស្ពានដែលមានប្រវែងប្រមាណ ៤គីឡូម៉ែត្រនេះ ត្រូវបានសិក្សាចប់សព្វគ្រប់ ជាមួយគ្នានេះក្រសួងក៏បានចេញលិខិតបញ្ជាក់ដោយគ្មានប៉ះពាល់អ្វីទាំងអស់ក្នុងការសាងសង់ស្ពាននេះ។
ឯកឧត្ដមរដ្ឋមន្ត្រី សង្ឃឹមថា ក្រសួងសេដ្ឋកិច្ច និងហិរញ្ញវត្ថុ នឹងទម្លាក់ថវិកាសម្រាប់ការសាងសង់ ស្ពានដែលវែងជាងគេបំផុតនៅកម្ពុជានេះ មកឲ្យក្រសួងសាធារណការ និងដឹកជញ្ជូន។ ថវិកាដែលត្រូវត្រៀមសម្រាប់ចំណាយលើការសាងសង់នេះមានទំហំប្រមាណ ២០០លានដុល្លារអាមេរិក។
ស្ពានឆ្លងពីខេត្តកំពង់ឆ្នាំង ទៅខេត្តកំពង់ធំនេះ និងក្លាយទៅជាស្ពានប្រវត្តិសាស្ត្រមួយ ដែលស្ថិតនៅចំកណ្ដាលប្រទេសកម្ពុជា នឹងផ្ដល់ផលចំណេញរាប់រយគីឡូម៉ែត្រក្នុងការធ្វើដំណើរសម្រាប់ប្រជាពលរដ្ឋ ជាងនេះទៅទៀតស្ពាននេះក៏នឹងក្លាយជាផ្លូវមួយដែលសំខាន់ក្នុងការដឹកកសិផលរបស់ប្រជាពលរដ្ឋ ជាពិសេសប្រជាកសិករពីខេត្តកំពង់ធំ៕
ដោយ៖ ជួប ស្រីរ័ត្ន
