សហរដ្ឋអាមេរិកប្រកាសពីការបើកសេដ្ឋកិច្ចឡើងវិញឆាប់ៗ!
បើទោះបីជាមានការប្រឆាំង ក៏ដូចជាជំទាស់ពីក្រុមអ្នកនយោបាយមួយចំនួន រដ្ឋបាលលោក Trump បានថ្លែងនៅថ្ងៃចន្ទ សប្ដាហ៍នេះថា ក្រុមការងាររដ្ឋបាលរបស់លោក គឺជិតបញ្ចប់ផែនការមួយដើម្បីបើកសេដ្ឋកិច្ចអាមេរិកឡើងវិញ ដែលមួយភាគធំ ត្រូវបានបិទ ដើម្បីកាត់បន្ថយការរីករាលដាលវីរុសកូវីដ១៩។
បើយោងតាមការចុះផ្សាយពី Reuters នៅថ្ងៃទី១៤ ខែមេសា នេះ ឱ្យដឹងថា រដ្ឋបាលលោក Trump បានកត់សម្គាល់ពីចំនួនអ្នកស្លាប់ដោយសារវីរុសនៅសហរដ្ឋអាមេរិក មានកាថមថយ ដែលបង្ហាញពី សញ្ញាណវិជ្ជមានជុំវិញការដាក់ចេញនូវ ការនៅឆ្ងាយពីគ្នា ឬគម្លាតសុវត្ថិភាព (social distancing) និងចំណាត់ការមួយចំនួនទៀត។
អភិបាលរដ្ឋមួយចំនួនទំនងនាពេលនេះ កំពុងពិភាក្សាអំពីការផែនការដើម្បីបន្តសកម្មភាពសេដ្ឋកិច្ច ឬការបើកសេដ្ឋកិច្ចឡើងវិញ។ ជាក់ស្ដែង នៅរដ្ឋចំនួន ៩ នៅឆ្នេរបែកខាងកើត និងបែកខាងលិច កាលពីថ្ងៃចន្ទ បានប្រកាសរួចហើយអំពីការបើកសេដ្ឋកិច្ច និងដកបម្រាមឱ្យស្នាក់នៅផ្ទះ ចេញ។
គិតមកដល់ពេលនេះ វីរុសកូវីដ១៩ បានសម្លាប់ពលរដ្ឋអាមេរិក ២២ ០០០នាក់ និងបិទសកម្មភាពសេដ្ឋកិច្ចមួយភាគធំ។
ផ្ទុយពីសហរដ្ឋអាមេរិក បណ្ដាប្រទេសនៅអឺរ៉ុបភាគច្រើន នៅបិទខ្ទប់សេដ្ឋកិច្ចរបស់ខ្លួនដដែល ដែលក្នុងនោះមានដូចជាបារាំងជាដើម បានប្រកាសបិទប្រទេសរហូតដល់ថ្ងៃទី១១ ខែឧសភា ដែលតាមការវាយតម្លៃ សាលារៀន និងសាលាមត្តេយ្យក៏អាចនឹងបើកឡើងវិញផងដែរនាពេលនោះ។
ថ្មីៗ នេះមានការខ្វែងគំនិតគ្នា ជុំវិញការប្រកាសបើកសេដ្ឋកិច្ចឡើងវិញ ថាតើត្រូវធ្វើឡើងដោយអភិបាលរដ្ឋនីមួយៗ ឬក៏ជាការសម្រេចរបស់ប្រធានាធិបតី ឬក៏ជាការធ្វើឡើងព្រមគ្នា។ លោក Trump អះអាងក្នុងឋានៈជាប្រធានាធិបតីថា លោកគឺជាមនុស្សដែលត្រូវធ្វើការសម្រេចចិត្តលើការបើកសេដ្ឋកិច្ចឡើងវិញ ខណៈក្រុមអ្នកជំនាញខាងច្បាប់ មិនយល់ស្របលើរឿងនេះ ហើយអភិបាលរដ្ឋមួយចំនួនចង់សម្រេចដោយខ្លួនឯង។
មកដល់ពេលនេះ មានរដ្ឋមួយចំនួននៅបន្តបិទរដ្ឋរបស់ខ្លួន រហូតដល់ដាច់ខែមេសានេះ ឯរដ្ឋខ្លះទៀតបិទរហូតដល់ខែមិថុនា ឯណោះ៕
ដោយ៖ រតនៈវិភូ
