វៀតណាមត្រូវប៉ាន់ទៀតហើយ ក្រោយពី Panasonic សម្រេចបិទរោងចក្រធំមួយនៅថៃ ទៅបើកនៅទីនោះ
ក្រុមហ៊ុនផលិតគ្រឿងអេឡិចត្រូនិករបស់ជប៉ុនដ៏ធំមួយ Panasonic នឹងបិទរោងចក្រដ៏ធំមួយនៅក្បែរទីក្រុងបាងកកអំឡុងពេលព្យុះភ្លៀងដោយសារតែកូវីដ១៩ ហើយសម្រេចទៅបោះទីតាំងនៅប្រទេសវៀតណាមវិញ។ នេះបើតាមសេចក្ដីរាយការណ៍ពី Nikkei Asian Review។
រោងចក្រនៅប្រទេសថៃ នឹងត្រូវបានបិទជាបន្តបន្ទាប់ក្នុងនោះ មានម៉ាស៊ីនបោកខោអាវ នៅខែកញ្ញា និងម៉ាស៊ីនត្រជាក់នៅខែតុលា។ អគាររោងចក្រទាំងមូលនឹងបិទនៅខែមីនា ឆ្នាំ២០២១ ហើយមជ្ឈមណ្ឌលស្រាវជ្រាវ និងអភិវឌ្ឍន៍នៅក្បែរនោះក៏នឹងត្រូវបិទដូចគ្នា។
បច្ចុប្បន្ន មានកម្មករប្រមាណ ៨០០នាក់កំពុងធ្វើការនៅរោងចក្រនាទីក្រុងបាងកក។
ការសម្រេចចិត្តទៅប្រទេសវៀតណាមនាពេលនេះ គឺក្នុងគោលបំណងបន្ថយតម្លៃដើម ជាពិសេសពាក់ព័ន្ធនឹងគ្រឿងបង្គុំរ។ រោងចក្រនៅប្រទេសវៀតណាម មានទីតាំងស្ថិតនៅក្រៅទីក្រុងហាណូយ គឺជាមជ្ឈមណ្ឌលផលិតម៉ាស៊ីនបោកខោអាវ និងម៉ាស៊ីនត្រជាក់ធំបំផុតនៅតំបន់អាស៊ីអាគ្នេយ៍ និងមានសមត្ថភាពលើសពីបរិមាណត្រូវការផលិតទៅទៀត។
ការផ្លាស់ប្ដូរទីតាំងរោចក្ររបស់ក្រុមហ៊ុនជប៉ុនគឺចាប់ផ្ដើមកើតមានតាំងពីទសវត្សរ៍ឆ្នាំ១៩៧០មកម្ល៉េះ ដោយសារតែលុយយ៉េនឡើងថ្លៃជាបន្តបន្ទាប់ បន្ទាប់ពីប្រទេសជប៉ុនផ្លាស់ប្ដូរនយោបាយហិរញ្ញវត្ថុដោយប្ដូរមកជ្រើសរើសអត្រាប្ដូរប្រាក់អណ្ដែតវិញដែលប៉ះពាល់ដល់ការប្រកួតប្រជែងថ្លៃ។ ប្រទេសពីរនៅអាស៊ានដែលទទួលបានផលចំណេញដំបូងឡើយ គឺសិង្ហបុរី និងម៉ាឡេស៊ី។
ក្រោយមកទៀត ក៏មានការផ្លាស់ប្ដូររោងចក្រមកបណ្ដាប្រទេសផ្សេងៗដូចជាថៃជាដើមបន្ទាប់ពីប្រាក់ឈ្នួលនៅសិង្ហបុរី ឡើងថ្លៃខ្ពស់។
ដោយឡែក ការសម្រេចចិត្តលើកនេះ ក៏ដោយសារតែហេតុផលនៃការជ្រើសរើសទីតាំងសក្ដានុពល ជាមួយតម្លៃពលកម្មថោក។ វៀតណាមត្រូវបានក្រុមហ៊ុនពិនិត្យឃើញពីសក្ដានុពលទាំងនេះ ដែលមួយចំណែកធំ ខ្លួននឹងអាចបំពេញនូវតម្រូវការម៉ាស៊ីនត្រជាក់ ម៉ាស៊ីនបោកខោអាវ និងមីក្រូវ៉ែវ ដ៏ច្រើនលើសលប់នៅក្នុងបណ្ដាដែលមានប្រជាជនច្រើនស្រាប់នៅតំបន់អាស៊ានដូចជា ឥណ្ឌូណេស៊ី ហ្វីលីពីន និងវៀតណាមជាដើម។
ការសម្រេចបើកទីតាំងរោចក្រនៅវៀតណាមមិនមែនជាលើកដំបូងរបស់ខ្លួននោះទេ ព្រោះថា បច្ចុប្បន្ន ក្រុមហ៊ុនបាននិងកំពុងជួលកម្មករវៀតណាម ៨០០០នាក់សម្រាប់ការផលិតរោងចក្រខ្នាតតូចផលិតផលទូរទស្សន៍ ទូរស័ព្ទ ម៉ាស៊ីនឆូតកាតបង់ប្រាក់ និងឧបករណ៍បម្រើឧស្សាហកម្មផ្សេងៗជាច្រើនទៀត៕
