សម្រាប់អ្នកពូកែខាងចិត្តសាស្ត្រ នឹងជួយឲ្យជីវិតពួកគេប្រសើរជាងមុនតាមរយៈចំណុចសំខាន់៤យ៉ាងនេះ
មនុស្សយើងម្នាក់ៗតែងតែព្យាយាមចំណាយពេលវេលា កម្លាំងកាយនិងចិត្តស្វែងរកដំណោះស្រាយពីខាងក្រៅ ដើម្បីទប់ទល់នឹងបញ្ហាជីវិតទាំងឡាយ។ ពួកយើងតែងតែចង់ឲ្យជីវិតខ្លួនប្រព្រឹត្តទៅដោយរលូន និងសមប្រកបតាមបំណង។ ចំណង់នេះអាចកើតមានបាន ប្រសិនបើអ្នកយល់ពីចិត្តសាស្ត្រ ឬជាវិធីធ្វើការរបស់ចិត្ត។
នៅពេលអ្នកដឹងថា ចិត្តគំនិតរបស់អ្នក មានឥទ្ធិពលទៅលើលទ្ធផលគ្រប់យ៉ាងដែលអ្នកទទួលបានក្នុងជីវិត នោះអ្នកនឹងអាចរកឃើញពីវិធីគ្រប់គ្រងទៅលើលទ្ធផលទាំងនោះដោយចាប់ផ្ដើមចេញពីការគ្រប់គ្រងចិត្តរបស់ខ្លួន។ ត្រង់ចំណុចនេះ តើការយល់ដឹងពីចិត្តសាស្ត្រអាចជួយបង្កើនប្រសិទ្ធភាពជីវិតអ្នកបានតាមរបៀបណាខ្លះ ?
១) អភិវឌ្ឍភាពជាអ្នកដឹកនាំរបស់អ្នក
អ្នកអាចក្លាយខ្លួនជាអ្នកដឹកនាំបានល្អ លុះត្រាណាតែអ្នកអាចយកចិត្តគេដាក់ចិត្តខ្លួនឯង យល់ពីអារម្មណ៍រាល់បុគ្គលដែលស្ថិតក្រោមការដឹកនាំរបស់អ្នកថាតើពួកគេចង់បានអ្វីយ៉ាងពិតប្រាកដ។ អ្នកត្រូវផ្ដល់នូវការត្រួសត្រាយផ្លូវដ៏ជាក់លាក់មួយដល់ពួកគេ រួចផ្ដល់សេរីភាពសម្រាប់ការបញ្ចេញនូវយោបល់ឬការយល់ឃើញរបស់ពួកគេ ដើម្បីបើកឱកាសឲ្យមានការបំផុសនូវគំនិតច្នៃប្រឌិតឡើង។
២) បង្កើននូវសមត្ថភាពចងចាំរបស់អ្នក
ការយល់ដឹងពីវិធីធ្វើការនៃចិត្ត នឹងធ្វើឲ្យអ្នកអាចធ្វើដំណើរទៅកាន់ពិភពរបស់ខ្លួន ស្វែងយល់ពីខួរក្បាលរបស់ខ្លួនថាតើតាមរបៀបណាទើបវាធ្វើការបានយ៉ាងមានប្រសិទ្ធភាពខ្ពស់បំផុត ? ដោយការផ្ចង់អារម្មណ៍ទៅលើព័ត៌មានតែមួយមុខ បញ្ចៀសនូវការរំខានផ្សេងៗ រួមផ្សំនឹងការរំលឹកជាញឹកញាប់ នោះសមត្ថភាពចងចាំរបស់អ្នកនឹងអាចបំពេញតម្រូវការរបស់អ្នកបានកាន់តែមានប្រសិទ្ធភាពជាងមុន។
៣) ទទួលបានលទ្ធផលល្អជាងមុនក្នុងការសិក្សា
តាមការសិក្សាមួយបានធ្វើការពិសោធន៍ទៅលើសិស្សមួយក្រុមដែលប្រើប្រាស់វិធីសាស្ត្ររៀនតែម្យ៉ាងដើម្បីចងចាំមេរៀន និងសិស្សមួយក្រុមទៀតដែលប្រើប្រាស់វិធីសាស្ត្រធ្វើតេស្តសាកល្បងដោយខ្លួនឯងដដែលៗដើម្បីចងចាំមេរៀន។ លទ្ធផលដែលទទួលបានគឺ សិស្សក្រុមទី១ចងចាំបានត្រឹមតែ៤០ភាគរយនៃមេរៀន ស្របពេលដែលសិស្សក្រុមទី២ចងចាំបានរហូតដល់ទៅ៦១ភាគរយនៃមេរៀន។ តាមរយៈការសិក្សានេះ អ្នកអាចប្រើប្រាស់វិធីសាស្ត្រធ្វើតេស្តសាកល្បងខ្លួនឯងជាញឹកញាប់ ដើម្បីឲ្យអ្នកអាចចងចាំមេរៀនបានល្អប្រសើរជាងមុន នោះវាក៏នឹងមានលទ្ធផលល្អចំពោះការប្រឡងរបស់អ្នកដែរ។
៤) ពូកែខាងលើកទឹកចិត្តខ្លួនឯង
ជាធម្មតាទេ មនុស្សណាក៏ដោយក៏ត្រូវពើបប្រទះនឹងបញ្ហាដែរ ហើយក្នុងកាលៈទេសៈនោះ តែងតែមានការបាក់ទឹកចិត្តនៅពេលដែលមិនអាចដោះស្រាយរឿងស្មុគស្មាញទាំងនោះបាន។ ចំពោះមនុស្សដែលមិនសូវមានចំណេះដឹងផ្នែកចិត្តសាស្ត្រ គឺងាយនឹងបាក់ទឹកចិត្តខ្លាំងណាស់ ហើយក៏កម្រនឹងធូរស្បើយនោះដែរ។ ផ្ទុយទៅវិញ សម្រាប់មនុស្សដែលមានចំណេះដឹងផ្នែកចិត្តសាស្ត្រ ពួកគេអាចនឹងមានអារម្មណ៍មិនល្អចំពោះរឿងរ៉ាវដែលកើតឡើង ប៉ុន្តែអ្វីដែលសំខាន់នោះ ពួកគេស្វែងរកចំណុចសំខាន់ៗដែលជួយជំរុញ និង លើកទឹកចិត្តខ្លួនឯងឡើងវិញ ដើម្បីមានសង្ឃឹមដើរទៅមុខទៀត៕
ប្រែសម្រួល៖ ស្រីពៅ ប្រភព៖ www.verywell.com
