បែបបទនៃការគិតដ៏ឆោតល្ងង់ទាំង ៣យ៉ាងរបស់ធម្មជាតិនៃមនុស្ស
តាមធម្មជាតិរបស់មនុស្ស ពួកគេបង្កើតការយល់ឃើញទៅលើអ្វីមួយ និងនិយាយវាចេញមកដោយផ្អែកទៅលើបទពិសោធន៍ជីវិតរបស់ពួកគេរៀងៗខ្លួនតែប៉ុណ្ណោះ។ តើអ្នកមិនឆ្ងល់ទេឬថាហេតុអ្វីទើបបានជាការសម្រេចចិត្តជាផ្លូវការណាមួយ ត្រូវធ្វើឡើងដោយមានការចូលរួមពីមតិរបស់មនុស្សច្រើននាក់ ជជែកវែកញែកទៅលើប្រធានបទជាក់លាក់ណាមួយ ? អ្នកឈរនៅជ្រុងម្ខាងសម្លឹងមកមើលបញ្ហាមួយ ឯអ្នកផ្សេងទៀតប្រាកដជាសម្លឹងមកមើលបញ្ហាដូចគ្នានោះដោយឈរនៅជ្រុងម្ខាងទៀតផ្សេងពីអ្នកមិនខាន។
ទោះជាដឹងខ្លួនឬមិនដឹងខ្លួនក៏ដោយ ស្ទើរតែរៀងរាល់ពេល ការយល់ឃើញរបស់អ្នកគ្រាន់តែជាភាពលម្អៀងនៃការសន្និដ្ឋានរបស់អ្នកតែប៉ុណ្ណោះ។ បើអ្នកចងចាំការពិតនេះទុកក្នុងចិត្តរហូតបាននោះ អ្នកនឹងបើកចិត្តទូលាយជាងមុនដើម្បីទទួលយកគំនិតអ្នកដទៃដែលខុសពីអ្នក រហូតទាល់តែសំយោគបានរូបភាពរួមត្រឹមត្រូវមួយទៅលើបញ្ហាណាមួយ។ ខាងក្រោមនេះដែរគឺជា បែបបទនៃការគិត៣យ៉ាងរបស់មនុស្ស ដែលពួកគេតែងមានដែលយល់ថាត្រឹមត្រូវដែលតាមពិតជាភាពឆោតល្ងង់របស់ធម្មជាតិនៃមនុស្សតែប៉ុណ្ណោះ។
១) ភាពប្រឆាំងគ្នាក្នុងការគិត៖ តើអ្វីប្រឆាំងនឹងអ្វីនៅក្នុងការគិតរបស់អ្នក ? វាគឺជាការប្រឆាំងគ្នារវាងការពិតនិងការគិតរបស់អ្នកដែលបង្កប់នូវចំណង់ទៅលើអ្វីមួយ។ អ្នកចង់បំពេញនូវចំណង់របស់អ្នកទៅលើអ្វីមួយ ប៉ុន្តែការពិតអំពីចំណុចអវិជ្ជមាននៃទង្វើមួយនោះ មានការប្រឆាំងគ្នាទៅនឹងចំណង់របស់អ្នក បង្កនូវអារម្មណ៍មិនល្អដល់អ្នក ជាហេតុនាំឲ្យអ្នកចាប់ផ្ដើមស្វែងរកអំណះអំណាង ឬហេតុផលដ៏សមរម្យមិនអាចប្រកែកបានណាមួយ មកគាំទ្រនឹងចំណង់របស់ខ្លួន ក៏ព្រោះតែអ្នកភ័យខ្លាចនូវការពិតអំពីវា និងមិនចង់ទទួលស្គាល់វា។
២) ការជះត្រឡប់នៃអារម្មណ៍៖ តើអ្នកធ្លាប់រិះគន់ឲ្យនរណាម្នាក់ថាពួកគេចង្អៀតចង្អល់មកលើអ្នក ទាំងដែលតាមពិតអ្នកខ្លួនឯងនោះទេជាអ្នកចង្អៀតចង្អល់នោះ ? វាកើតឡើងនៅពេលអ្នកមិនអាចទទួលស្គាល់ការពិតអំពីអារម្មណ៍របស់ខ្លួន វាមានទម្ងន់ធ្ងន់រហូតដល់អ្នកមិនអាចទទួលយកវាបាន ហើយអ្នកក៏ជះឥទ្ធិពលរបស់វាទៅលើអ្នកដទៃទៅវិញ និងសន្មតដោយការយល់ច្រឡំថា អ្នកដទៃជាអ្នកមានអារម្មណ៍បែបនោះ មិនមែនអ្នកនោះទេ។ ចិត្តសាស្ត្រនេះចង់បង្ហាញថា អ្វីដែលអ្នកយល់ឃើញចំពោះអ្នកដទៃ គឺជាកញ្ចក់ឆ្លុះបញ្ចាំងពីការពិតរបស់អ្នកនោះឯង។
៣) ទស្សនមានហេតុមានផល៖ ទស្សនមានហេតុមានផលនៅត្រង់នេះចង់សំដៅទៅលើបែបបទនៃការគិតរបស់បុគ្គលម្នាក់ ដែលកាឡៃការពិតប្រកបដោយភាពសមហេតុសមផល ដើម្បីឲ្យសម្របទៅនឹងចំណង់នៃអារម្មណ៍របស់ខ្លួនគេផ្ទាល់។ ការបង្កើតការសន្និដ្ឋានដោយខ្លួនឯងក្នុងទម្រង់នេះ គឺជាបែបបទនៃការគិតដែលស្ថិតនៅក្នុងកម្រិតខ្ពស់មួយ ព្រោះថាវាភ្ជាប់នូវហេតុផលគាំទ្រនូវចំណង់នៃអារម្មណ៍របស់បុគ្គលនោះ។ យ៉ាងណាមិញ បើទោះជាការកាឡៃនោះមានហេតុផលក៏ដោយ ក៏វាគ្រាន់តែដើម្បីបំពេញនូវចំណង់នៃអារម្មណ៍មិនសមហេតុសមផលរបស់ពួកគេតែប៉ុណ្ណោះ៕
ប្រែសម្រួល៖ ស្រីពៅ
ប្រភព៖ owlcation.com
