លក្ខណៈពិសេស៥យ៉ាង របស់មនុស្សពូកែអៀនប្រៀនច្រើន
មនុស្សដែលពូកែអៀនច្រើន ឬ មិនពូកែនិយាយនោះ ភាគច្រើនជាមនុស្សដែលមានអត្តចរិតស្ងប់ស្ងាត់ និង មិនចូលចិត្តភាពអ៊ូអរខ្លាំងនោះទេ អ៊ីចឹងហើយពេលខ្លះធ្វើឲ្យពួកគេមិនសូវមានទំនាក់ទំនងច្រើននៅក្នុងសង្គម។ ប៉ុន្តែយ៉ាងណាក៏ដោយ មនុស្សជំពូកនេះ ក៏មានចំណុចពិសេសជាច្រើនផងដែរ ហើយអាចធ្វើឲ្យពួកគេជោគជ័យជាងមនុស្សទូទៅផងក៏ថាបាន។ ខាងក្រោមនេះ ជាចំណុចពិសេសៗដែលអ្នកគួរដឹង៖
១) ពូកែគិតត្រិះរិះ៖ ជំនួសឲ្យការនិយាយច្រើន ពួកគេតែងតែគិតលើរឿងរ៉ាវផ្សេងៗយ៉ាងល្អិតល្អន់បំផុត។ ការគិតនេះ គឺពិតជាសំខាន់ណាស់ ជាពិសេសនៅពេលធ្វើកិច្ចការណាដែលលំបាកៗ ហើយទាមទារឲ្យមានការត្រិះរិះពិចារណាច្រើន។ នេះក៏ជាលក្ខណៈពិសេសមួយរបស់ជំពូកមនុស្សពូកែអៀនច្រើនផងដែរ។
២) ពូកែស្ដាប់ និង សង្កេត៖ ថ្វីត្បិតតែមិនសូវពូកែទំនាក់ទំនង និង និយាយក្ដី ប៉ុន្តែពួកគេពិតជាមានជំនាញក្នុងការស្ដាប់ និង សង្កេត ដែលចំណុចទាំងនេះគឺពិតជាសំខាន់ មិនថាធ្វើកិច្ចការអ្វីនោះទេ។ នៅពេលពួកគេប្រើការស្ដាប់ និង សង្កេតច្រើននោះ នាំឲ្យពាក្យសម្ដីដែលនិយាយចេញទៅប្រកបទៅដោយ អត្ថន័យ និង មានអំណះអំណាងច្បាស់លាស់ ជាងមនុស្សដែលចូលចិត្តនិយាយច្រើនជាងស្ដាប់។
៣) មានឱកាសច្រើនក្នុងការស្គាល់ច្បាស់ពីខ្លួនឯង៖ ដើម្បីស្គាល់ខ្លួនឯងកាន់តែច្បាស់ ឬ ស្គាល់ថា ខ្លួនជានរណាឲ្យប្រាកដនោះ វាត្រូវការទាមទារពេលវេលា ក្នុងការចំណាយពេលនៅម្នាក់ឯង។ សម្រាប់មនុស្សពូកែអៀន ឬ មិនពូកែសម្ដីនោះ ភាគច្រើនពួកគេចូលចិត្តចំណាយពេលនៅតែម្នាក់ឯង ដូច្នេះហើយអ្នកទាំងនេះ អាចនឹងមានឱកាសច្រើនដើម្បីដឹងច្បាស់ថា ខ្លួនជានរណាឲ្យប្រាកដ។ បើស្គាល់ច្បាស់ថា ខ្លួនជានរណាហើយ នោះភាពជោគជ័យក្នុងជីវិតនឹងកើតមាន ឬ ពួកគេអាចរស់នៅយ៉ាងមានក្ដីសុខចំពោះ កិច្ចការដែលត្រូវធ្វើ។
៤) ផ្ដល់តម្លៃលើពាក្យសម្ដីរបស់ខ្លួន៖ ដូចដែលបានដឹងហើយថា មនុស្សមិនពូកែសម្ដីនេះ គឺពិតជាយកចិត្តទុកដាក់ណាស់ ចំពោះពាក្យសម្ដីដែលខ្លួននិយាយ។ មានន័យថា មិនមែនចេះតែនិយាយឲ្យតែរួចពីមាត់នោះឡើយ ពោលគឺបើនិយាយថា យ៉ាងម៉េច ប្រាកដជាធ្វើបែបនោះមិនខាន។ ការផ្ដល់តម្លៃលើពាក្យសម្ដីនេះហើយ ដែលនាំឲ្យអ្នកជុំវិញខ្លួនជឿជាក់លើពួកគេ ហើយការជឿជាក់នេះគឺពិតជាសំខាន់ណាស់ ក្នុងការធ្វើការងារផ្សេងៗក្នុងសង្គម។
៥) មានឆន្ទៈខ្ពស់ក្នុងការធ្វើអ្វីមួយ៖ សម្រាប់មនុស្សប្រភេទនេះ គឺភាគច្រើន កើតមកដើម្បីធ្វើជាជាងដើម្បីតែនិយាយ មានន័យថា ពូកគេនិយាយតិច តែធ្វើច្រើន។ នៅពេលដែលចំណាយពេលច្រើនក្នុងការធ្វើនេះ វានាំឲ្យពួកគេមានពេលវេលាគ្រប់គ្រាន់ក្នុងការសម្រេចវាបានយ៉ាងល្អ។ ជាទូទៅ បើកាលណាមនុស្សប្រភេទនេះដាក់ចិត្តក្នុងការធ្វើការងារណាមួយហើយ ពួកគេមិនងាយបោះបង់នោះឡើយ រហូតទាល់តែចេញជារូបរាង ដែលនេះគឺជាចំណុចពិសេសមួយ៕
អត្ថបទល្អៗផ្សេងទៀត៖ តិកនិកសម្គាល់បុគ្គលិកលក្ខណៈនរណាម្នាក់ តាមរយៈចំណង់ចំណូលចិត្តលើពណ៌ អ្នកដែលកើតក្នុង«ខែមេសា » មានបុគ្គលិកលក្ខណៈពិសេសបែបនេះ! ជឿឬមិនជឿ សាកអានសិន! ហេតុអ្វីអ្នកចាំបាច់ត្រូវស្គាល់ច្បាស់ពីបុគ្គលិកលក្ខណៈរបស់ខ្លួនឯង ?
ដោយ៖ រតនា វិចិត្រ
