អ្នកត្រូវចងចាំនូវចំណុចទាំងនេះរាល់ពេលដែលអ្នកចង់បោះបង់
មានពេលខ្លះ ជីវិតមិនដើរតាមអ្វីដែលអ្នកប្រាថ្នានោះទេ វាតែងតែមានឧបសគ្គឬរឿងដែលមិនល្អកើតឡើងជានិច្ច។ ហើយពេលខ្លះទៀត យើងក៏មានអារម្មណ៍ថាហត់នឿយ គ្មានកម្លាំងចិត្ត ចង់បោះបង់ឬមិនចង់បន្តដំណើរទៅមុខព្រោះតែយើងបាក់ទឹកចិត្ត។ ទោះបីជាយ៉ាងណាក៏ដោយ វាគឺជារឿងធម្មតាប៉ុណ្ណោះក្នុងឆាកជីវិតរបស់មនុស្សយើង។ ផ្ទុយទៅវិញ យើងគួរតែជួយខ្លួនឯងនិងមើលក្នុងផ្លូវវិជ្ជមានវិញប្រសើរជាង។ ខាងក្រោមនេះជាអ្វីដែលយើងគួរចងចាំរាល់ពេលដែលយើងចង់បោះបង់៖
១) មិនទទួលបាននូវអ្វីដែលយើងប្រាថ្នា តែវាអាចនាំយើងទៅអ្វីល្អជាងនេះ៖ ពេលខ្លះ យើងនឹងមិនទទួលបាននូវអ្វីដែលយើងចង់បាននោះទេ ប៉ុន្តែយើងទទួលបាននូវអ្វីដែលយើងត្រូវការ។ ឧទាហរណ៍ថាអ្នកស្រឡាញ់នរណាម្នាក់ ប៉ុន្តែម្នាក់នោះមិនស្រឡាញ់អ្នកវិញនោះ។ បើទោះបីជាវាអាចជារឿងអាក្រក់នាពេលបច្ចុប្បន្ន ប៉ុន្តែពេលខ្លះក្នុងឆាកជីវិត វាអាចមកពីអ្នកសាកសមនឹងទទួលបានមនុស្សដែលល្អជាងនេះ។ ចូរចងចាំថារឿងអាក្រក់មិនកើតឡើងរហូតនោះទេ ឯរឿងល្អប្រាកដជាកើតមាន។
២) អ្នកអាចកែប្រែខ្លួនឯងឲ្យល្អជាងនេះ៖ កុំទទួលយកភាពមធ្យមឲ្យសោះ។ កុំគិតថាខ្លួនឯងធ្វើបានតែប៉ុននឹង ត្រូវជឿជាក់ថាខ្លួនឯងអាចធ្វើល្អជាងនេះ។ ពិតប្រាកដណាស់ថាដំណើរឆ្ពោះទៅរកភាពអស្ចារ្យ វាតែងតែលំបាកហើយអ្នកចង់បោះបង់ចោលនាពេលខ្លះ ប៉ុន្តែចូរជឿជាក់លើខ្លួនឯងហើយខំប្រឹងឲ្យអស់ពីសមត្ថភាព។ ពេលខ្លះ អ្នកត្រូវជួបផលលំបាកនិងឧបសគ្គខ្លះដើម្បីក្លាយជាមនុស្សដែលរឹងមាំនិងពូកែ។
៣) កុំឲ្យរឿងដដែលៗមកបំបាក់អ្នក ត្រូវចេះបន្តដំណើរទៅមុខ៖ វាជារឿងដែលជៀសមិនផុតនោះទេដែលអ្នកមានអារម្មណ៍ថាខ្លួនឯងអត់បានការ គ្មានគោលដៅច្បាស់លាស់ក្នុងឆាកជីវិតឬគ្មានស្នាដៃដូចអ្នកដទៃ។ ប៉ុន្តែ ប្រសិនអ្នកអនុញ្ញាតឲ្យរឿងដែលដដែលៗនិងគ្មានបានការទាំងអស់នេះមកបំបាក់ទឹកចិត្តអ្នកនោះ អ្នកមិនត្រឹមតែស្ត្រេសនោះទេថែមទាំងមិនចង់ធ្វើអ្វីហើយចង់បោះបង់អ្វីៗទាំងអស់។ ផ្ទុយទៅវិញ ប្រសិនជាអ្នកចំណាយពេលខិតខំរៀនសូត្រ ខិតខំធ្វើការហើយកែប្រែខ្លួនឯងឲ្យប្រសើរជាងនេះ អ្នកនឹងឃើញថាខ្លួនឯងអាចសម្រេចអ្វីៗបានទាំងអស់ឲ្យតែអ្នកដាក់ចិត្តនិងគិតក្នុងផ្លូវវិជ្ជមាន៕
ប្រែសម្រួល៖ មុយយូ ប្រភព៖ powerofpositivity.com
