អ្នកនឹងទទួលបានអត្ថប្រយោជន៍ដ៏ច្រើនលើសលប់ពីការអានសៀវភៅ
ការអានផ្តល់អត្ថប្រយោជន៍ជាច្រើនដល់អ្នកអាន។ ដូចដែលអ្នកបានដឹងរួចមកថាអ្នកចេះដឹងឬអ្នកដឹកនាំភាគច្រើនសុទ្ធតែមានទម្លាប់អានជាប្រចាំថ្ងៃ។ ប្រសិនអ្នកមិនមែនជាមនុស្សដែលអានច្រើនទេ អ្នកនឹងខកខាននូវអត្ថប្រយោជន៍ជាច្រើនពីការអាន។ ខាងក្រោមនេះសុទ្ធតែជាផលវិជ្ជមានដែលអ្នកនឹងទទួលបានពីការអាន៖
១) កាត់បន្ថយភាពធុញថប់៖ មិនថាអ្នកមានភាពធុញថប់នៅកន្លែងការងារឬក្នុងការសិក្សាច្រើនដល់កម្រិតណានោះទេ អ្នកនឹងភ្លេចនូវភាពធុញថប់ទាំងឡាយប្រសិនអ្នកលង់ខ្លួនក្នុងសាច់រឿងសៀវភៅ។ សៀវភៅដែលល្អនឹងនាំអ្នកទៅកាន់ពិភពផ្សេង ដែលជួយឲ្យអ្នកភ្លេចនូវរឿងសៅហ្មងទាំងឡាយ។
២) បង្កើនចំណេះដឹង៖ មិនថាអ្នកអានសៀវភៅប្រភេទណាក៏ដោយ អ្នកតែងតែទទួលបានចំណេះដឹងថ្មីៗពីការអាន។ ហើយប្រសិនអ្នកក្រេបចំណេះដឹងបានកាន់តែច្រើន វានឹងជួយអ្នកដោះស្រាយបញ្ហាជីវិតឬឧបសគ្គបានកាន់តែល្អ។ លើសពីនេះទៅទៀត មនុស្សអាចលួចលុយកាក់អ្នកបានតែមិនអាចលួចចំណេះដឹងរបស់អ្នកបានទេ។ ចំណេះដឹងមានតែជួយអ្នកបង្កើនទ្រព្យនិងជួយឲ្យជីវិតរបស់អ្នកកាន់តែស្រស់ស្អាតជាងមុន។
៣) ស្គាល់ពាក្យថ្មីៗ៖ អ្នកមិនត្រឹមតែទទួលបានចំណេះដឹងថ្មីនោះទេ តែអ្នកក៏ជួបប្រទះនូវពាក្យថ្មីៗផងដែរ។ ការស្គាល់ពាក្យច្រើននឹងជួយអ្នកឲ្យចេះប្រើប្រាស់ពាក្យបានត្រឹមត្រូវតាមកាលៈទេសៈ។ ឧទាហរណ៍ថា ក្នុងការងាររបស់អ្នកទាមទារឲ្យអ្នកសរសេរសំណើឬអត្ថបទផ្លូវការជាដើម ការស្គាល់ពាក្យច្រើននឹងជួយអ្នកឲ្យប្រើប្រាស់បានត្រូវតាមបរិបទ។ ម៉្យាងវិញទៀត អ្នកដែលពូកែខាងសរសេរគឺមានអត្រាឡើងឋានៈលឿនក្នុងការងារព្រោះមិនមែនមនុស្សច្រើនទេដែលមានសមត្ថភាពនេះ។
៤) បង្កើនសមត្ថភាពក្នុងការគិត៖ អ្នកនិពន្ធតែងតែបង្កប់នូវភាពអាថ៌កំបាំងសម្រាប់អ្នកអានឲ្យចេះគិត។ ដូច្នេះហើយអ្នកអានអាចរៀនទាយទុកនូវសាច់រឿងឬព្រឹត្តិការណ៍ដែលនឹងកើតមានឡើងក្នុងសៀវភៅ។ លើសពីនេះទៅទៀត អ្នកអានក៏អាចដាក់ខ្លួនចូលទៅក្នុងសាច់រឿងហើយរៀនគិត។ ឧទាហរណ៍ថាប្រសិនជារឿងនេះកើតឡើងលើខ្លួនឯង តើគួរដោះស្រាយដោយរបៀបណា? ការរៀនគិតបែបនេះក៏ជួយបង្កើនសមត្ថភាពការគិតដល់អ្នកអានផងដែរ៕
ប្រែសម្រួល៖ អុឹង មុយយូ ប្រភព៖ lifehack.org
