ជីវិតមានតម្លៃខ្លាំងណាស់ ចូរកុំរស់នៅជាមួយភាពអវិជ្ជមានច្រើនពេក
មិនថាបច្ចុប្បន្នភាពរបស់អ្នកមើលទៅហាក់ដូចជាអាក្រក់យ៉ាងណានោះទេ ចូរកុំបោះបង់ កុំអស់សង្ឃឹមនឹងខ្លួនឯងឲ្យសោះ។ មិនថាអ្នកកំពុងតែជួបនូវបញ្ហាលុយកាក់ ឧបសគ្គការសិក្សាឬស្នេហានោះទេ ពេលវេលាអាក្រក់ទាំងនេះនឹងកន្លងផុតទៅ។ ជីវិតគឺខ្លីណាស់ ចូររស់នៅដោយភាពរីករាយនិងភាពវិជ្ជមាន។ ខាងក្រោមនេះជាហេតុផលដែលបង្ហាញថាជីវិតពិតជាមានតម្លៃ៖
១) មិនថាអ្នកផ្តោតសំខាន់ទៅលើអ្វីនោះទេ ត្រូវដើរទៅមុខ៖ រាល់ពេលដែលអ្នកជួបការបរាជ័យ អ្នកមានអារម្មណ៍ថាវាដូចជាទីបញ្ចប់អ៊ីចឹង មិនដឹងត្រូវបន្តឬខិតខំប្រឹងប្រែងដើម្បីអ្វីទៀតទេ។ ចូរកុំគិតបែបនេះអី។ តាមការពិតទៅ បទពិសោធន៍ដែលអ្នកទទួលបានគឺសុទ្ធតែបង្រៀនអ្នកអ្វីមួយ។ ជាមួយនឹងបទពិសោធន៍កាន់តែច្រើន វាក៏ជួយឲ្យអ្នករីកចម្រើនល្អប្រសើរ។ ចូរគិតក្នុងផ្លូវវិជ្ជមាន។
២) ភាពបរាជ័យគឺជាបទពិសោធន៍ដ៏អស្ចារ្យសម្រាប់ជីវិត៖ ពិតប្រាកដណាស់ ជីវិតមិនដើររលូនដូចដែលអ្វីអ្នកប្រាថ្នានោះទេ។ ជីវិតតែងជួបភាពជោគជ័យនិងភាពបរាជ័យ។ ទោះបីជាយ៉ាងណាក៏ដោយ ភាពបរាជ័យច្រើនតែមកបំបាក់ទឹកចិត្តមនុស្ស។ ផ្ទុយទៅវិញ រាល់ភាពបរាជ័យសុទ្ធតែបង្កប់នូវហេតុផលអ្វីមួយ។ ភាពបរាជ័យទាំងនោះអាចជាផ្លូវបង្ហាញអ្នកទៅរកភាពជោគជ័យឬសម្រាប់អ្នកសិក្សានិងរីកចម្រើនទៅមុខ។ កុំយកភាពបរាជ័យទុកជាការលេងសើច ប្រើប្រាស់វាសម្រាប់ភាពរីកចម្រើនទៅមុខ។
៣) ភាពឈឺចាប់ធ្វើឲ្យអ្នករឹងមាំជាងមុន៖ បើទោះបីជាស្ថានភាពខ្លះធ្វើឲ្យអ្នកឈឺចាប់ខ្លាំងប៉ុណ្ណាក៏ដោយ ចូរអ្នករឹងមាំឡើង។ កុំអនុញ្ញាតឲ្យការឈឺចាប់ទាំងនោះមកគ្រប់គ្រងទាំងផ្លូវកាយនិងផ្លូវចិត្តរបស់អ្នក។ តាមរយៈការឈឺចាប់នេះ វានឹងជួយអ្នកឲ្យរឹងមាំជាងមុន ប្រឈមមុខនឹងបញ្ហានិងដោះស្រាយបញ្ហាក្នុងជីវិតបានល្អជាងមុន។ ផ្លូវជីវិតនៅវែងឆ្ងាយទៀត កុំបណ្ដាលឲ្យខ្លួនបរាជ័យត្រឹមតែឧបសគ្គប៉ុននេះ។ ត្រូវប្រើប្រាស់ភាពឈឺចាប់ទាំងនោះសម្រាប់រំលឹកខ្លួនឯងកុំឲ្យប្រព្រឹត្តវាម្តងទៀត ហើយត្រូវរស់នៅឲ្យល្អជាងមុន៕
ប្រែសម្រួល៖ អុឹង មុយយូ ប្រភព៖ wanderlustworker.com
