រាល់ពេលវ៉ាកងពីម្តងៗ អ្នកគួរតែឆ្លៀតពេលអនុវត្តកិច្ចការសំខាន់ៗទាំងនេះ ដើម្បីខ្លួនឯង
នៅតាមសកលវិទ្យាល័យ វិទ្យាល័យឬសាលាមួយចំនួន សិស្សបានបញ្ចប់ថ្នាក់សិក្សាឬប្រលងចប់សព្វគ្រប់អស់ហើយ មានន័យថាសិស្សឥឡូវនេះកំពុងរីករាយជាមួយនឹងវិស្សមកាលរបស់ពួកគេ ហើយសល់ពេលទំនេរច្រើន។ តើសិស្សនិស្សិតគួរចំណាលពេលទំនេរទៅធ្វើអ្វីខ្លះទៅដើម្បីកុំខ្ជះខ្ជាយពេលវេលាអស់ប្រយោជន៍? ខាងក្រោមនេះជាអ្វីដែលអ្នកគួរធ្វើដើម្បីឲ្យវិស្សមកាលរបស់អ្នកកាន់តែមានន័យជាងមុន៖
១) ស្វែងរកការងារក្រៅម៉ោងឬហាត់ការ(Internship)៖ នៅតាមសាលាមួយចំនួន វិស្សមកាលរបស់សិស្សនិស្សិតមានរយៈពេលដល់ទៅ២ទៅ៣ខែឯណោះ។ ដូច្នេះហើយ អ្នកគួរតែព្យាយាមស្វែងរកការងារក្រៅម៉ោងឬហាត់ការព្រោះតាមស្តង់ដារការសាកល្បងការងារដំបូងគឺមានរយៈពេល៣ខែដូចគ្នា។ អ៊ីចឹងហើយ អ្នកមានពេលវេលាគ្រប់គ្រាន់ក្នុងការធ្វើការ ហើយទទួលបានបទពិសោធន៍ការងារ ចំណេះដឹងផ្សេងៗនិងអាចរកប្រាក់កម្រៃក៏ថាបាន។
២) អានសៀវភៅ៖ អ្នកប្រហែលជារវល់អានសៀវភៅមេរៀនឬធ្វើកិច្ចការសាលាកន្លងមកដោយគ្មានពេលវេលាសម្រាប់អានសៀវភៅអ្វីថ្មីទេ។ ឆ្លៀតក្នុងពេលវិស្សមកាលនេះ អ្នកគួរតែអានសៀវភៅឲ្យបានច្រើនដើម្បីក្រេបយកចំណេះដឹងថ្មីៗឬពង្រឹងចំណេះដឹងទូទៅឲ្យកាន់តែពូកែ។
៣) ដើរកម្សាន្ត៖ ពិតប្រាកដណាស់ថាពេលអ្នកសិក្សា អ្នកមិនមានពេលវេលាគ្រប់គ្រាន់ទៅដើរលេងឆ្ងាយៗនោះទេព្រោះខ្លាចតាមមិនទាន់មេរៀនឬចំនួននៃការឈប់នៅសាលាគឺមានកំណត់។ អ្នកក៏នឿយហត់នឹងការប្រលងឬការខិតខំសិក្សាកន្លងមក អ្នកគួរណាតែដើរលេងលំហែកាយដើម្បីកាត់ស្តេ្រសនិងទៅកន្លែងដែលអ្នកមិនធ្លាប់ទៅ។ ស្រួលមិនស្រួល អ្នកក៏អាចស្វែងយល់ពីខ្លួនឯងបានច្បាស់ជាងមុនតាមការដើរលេងកម្សាន្តនេះ។
៤) ធ្វើអ្វីដែលអ្នកពុំមានពេលធ្វើកន្លងមក៖ ប្រហែលមានរឿងជាច្រើនដែលអ្នកចង់ធ្វើកន្លងមកតែគ្មានពេលវេលាសមរម្យធ្វើសោះ។ ឧទាហរណ៍ថាអ្នកចង់រៀនហែលទឹក រៀនឧបករណ៍តន្ត្រីឬចង់ទៅមើលកុនជាដើម។ អ្នកអាចសិក្សាបានក្នុងពេលវិស្សមកាលនេះ។ បន្ថែមពីលើនេះ អ្នកក៏អាចរៀនវគ្គខ្លីៗសម្រាប់ត្រៀមថ្នាក់ឆ្នាំក្រោយក៏បានដែរ។ មិនថាអ្នកគ្មានអ្វីនោះទេឲ្យតែអាចធ្វើឲ្យជីវិតអ្នករីករាយឬល្អប្រសើរជាងមុនសុទ្ធតែមានន័យទាំងអស់៕
អត្ថបទ៖ អុឹង មុយយូ
