លោកអ្នកដឹងទេថា កម្រិតអាយុ ប្រាប់អ្នកពីកម្រិតនៃភាពឆ្លាតវ័យពេញមួយជីវិតរបស់អ្នក?
ប្រសិនបើអ្នកតែងតែមានអារម្មណ៍ថាសមត្ថភាពខ្លួនអ្នកមានពេលឡើងឬ ធ្លាក់ចុះ អ្នកសិក្សាស្រាវជ្រាវនឹងនាំដំណឹងល្អដល់អ្នក។ ក្រុមអ្នកស្រាវជ្រាវមួយក្រុមដឹកនាំដោយលោក Joshua Hartshorne បានធ្វើតេស្តទៅលើមនុស្សជាច្រើនពាន់នាក់ដែលមានអាយុចាប់ពី ១០ ទៅ ៩០ឆ្នាំ អំពីសមត្ថភាពផ្សេងៗដែលត្រូវបានចុះផ្សាយដោយ Business Insider។
ខួរក្បាលមានការគិតនិងចងចាំល្អនៅពេលមានអាយុ 18ឆ្នាំ លោក Joshua Hartshorne បានប្រើប្រាស់ឧបករណ៍សម្រាប់វាស់ភាពឆ្លាតវៃ Wechsler Adult Intelligence Scale ទៅក្នុងការសិក្សាមួយពីបម្រែបម្រួលកម្រិតភាពឆ្លាតវៃ ដោយគេបានរកឃើញថា អ្នកចូលរួមជាទូទៅមានសមត្ថភាពខ្ពស់ក្នុងការគិតនិងចងចាំបានល្អនៅអាយុ 18ឆ្នាំ។
សមត្ថភាពចងចាំឈ្មោះនរណាម្នាក់បានល្អនៅអាយុ ២២ឆ្នាំ តាមរយះអត្ថបទសិក្សាស្រាវជ្រាវមួយក្នុងឆ្នាំ 2011 ដែលមានចំណងជើងថា អាយុនិងការវិវឌ្ឍភាពឆ្លាតវៃ (Where cognitive development and aging me) បានរកឃើញថាមនុស្សយើងពូកែចងចាំឈ្មោះបានល្អនៅអាយុជាង 20ឆ្នាំ។
សមត្ថភាពចំណាំមុខនរណាម្នាក់បានល្អនៅកំឡុងអាយុ 32ឆ្នាំ បើតាមអ្នកស្រាវជ្រាវជាច្រើននាក់ ដែលកំពុងសិក្សាពីអត្ថបទមួយមានចំណងជើងថា កំពូលអ្នកពូកែចាំ បានឲ្យឃើញថា មនុស្សជាច្រើនមានសមត្ថភាពពិសេសអាចចំណាំមុខនរណាម្នាក់បានល្អក្នុងកំឡុងអាយុ 30ឆ្នាំ។
សមត្ថភាពផ្ចង់ស្មារតីកើនខ្ពស់នៅអាយុ 43ឆ្នាំ តាមការសិក្សាស្រាវជ្រាវមួយក្នុងឆ្នាំ2015 របស់អ្នកស្រាវជ្រាវនៅសាកលវិទ្យាល័យ Harvard និង Boston Attention and Learning Laboratory បានរកឃើញថា សមត្ថភាពក្នុងការផ្ចង់ស្មារតីរបស់យើងកើនឡើងខ្ពស់នៅអាយុ 43ឆ្នាំ។ លោក Joe DeGutis អ្នកដឹកនាំការសិក្សាស្រាវជ្រាវនេះ បានមានប្រសាសន៍ថា ខណៈពេលដែលក្មេងៗអាចធ្វើការគិតវិភាគបានលឿនរហ័ស មនុស្សដែលឈានចូលពាក់កណ្ដាលជីវិតរបស់ពួកគេ មានសមត្ថភាពខ្លាំងក្នុងការផ្ចង់ស្មារតី។
យើងអាចយល់អារម្មណ៍នរណាម្នាក់បានល្អនៅអាយុ 48 យោងតាមការសិក្សាស្រាវជ្រាវរបស់លោក Hartshorne ដោយគេបានយករូបថតមនុស្សជាច្រើនសន្លឹកដោយកាត់រង្វង់ភ្នែកចេញ ហើយធ្វើការសាកសួរទៅកាន់អ្នកចូលរួមពីអារម្មណ៍មនុស្សក្នុងរូបថតទាំងនោះ ជាលទ្ធផលបានបង្ហាញថា អ្នកចូលរួមដែលមានអាយុ 48ឆ្នាំធ្វើការទស្សទាយបានល្អជាងគេ។
សមត្ថភាពក្នុងការគណនាគណិតវិទ្យាសាមញ្ញៗនៅពេលយើងមានអាយុ 50ឆ្នាំ យើងតែងតែគិតថា ជំនាញគណិតវិទ្យារបស់យើងធ្លាក់ចុះបន្ទាប់ពីយើងឈប់រៀន និងមិនបានអនុវត្តវាយូរឆ្នាំ។ តែយើងគួរតែចាំថា សមត្ថភាពធ្វើការគណនាលេខគុណ ចែកសាមញ្ញៗ របស់យើងបានល្អបំផុត គឺនៅអាយុ 50ឆ្នាំ។
សមត្ថភាពរៀនពីព័ត៌មានថ្មីៗកើនខ្ពស់នៅកំឡុងអាយុ ៥០ឆ្នាំ ដូចទៅនឹងសមត្ថភាពគណនាគណិតវិទ្យាអីចឹងដែរ សមត្ថភាពរៀននិងស្វែងយល់ព័ត៌មានទូទៅដូចជា ប្រវត្តិសាស្ត្រ និងគំនិតនយោបាយជាដើម កើនខ្ពស់នៅពេលយើងឈានដល់អាយុ 50ឆ្នាំ នេះបើយោងតាមការសិក្សាស្រាវជ្រាវរបស់លោក Hartshorne។
ជំនាញប្រើប្រាស់ពាក្យបានល្អនៅអំឡុងអាយុ 67ឆ្នាំ តាមរយៈពិន្ទុលើការធ្វើតេស្តជ្រើសរើសពាក្យ បានរកឃើញថា មនុស្សភាគច្រើនដែលមានអាយុចន្លោះពីជាង 60ឆ្នាំ ទៅដល់ជិត 70ឆ្នាំ មានសមត្ថភាពប្រើប្រាស់ពាក្យពេចន៍បានល្អ៕
ដោយ៖ លង់ វណ្ណៈ
