ទីក្រុងទាំង ៨ ដែលគេព្យាករណ៍ថាជាទីក្រុងអ្នកមានជាងគេបំផុតនៅក្នុងឆ្នាំ ២០២៥ ខាងមុខ
កំណើនប្រជាជនកាន់តែច្រើន ហើយទីក្រុងថ្មីៗក៏កើតមានកាន់តែច្រើនឡើងទៅតាមនោះដែរ។ តាមរយៈការស្រាវជ្រាវរបស់ក្រុមហ៊ុន Mckinsey&Company សូមបង្ហាញប្រិយមិត្តពីទីក្រុងចំនួន ៨ ខាងក្រោមនេះដែលគេរំពឹងថានឹងមានទំហំ GDPធំជាងគេនៅក្នុងឆ្នាំ ២០២៥ ខាងមុខ។
១) ទីក្រុងឡុងរបស់អង់គ្លេស
វាមិនមែនជារឿងចម្លែកនោះទេដែលទីក្រុងមួយនេះឈរលើកំពូលតារាង ក្លាយជាទីក្រុងមានជាងគេបំផុតនៅក្នុងឆ្នាំ២០២៥ ខាងមុខ ត្បិតអីតម្លៃអចលនទ្រព្យបានកើនឡើងឥតឈប់ឈរ។ ក្រុមហ៊ុន Mckinsey&Company បានវាយតម្លៃថា ប្រជាជននៅក្នុងទីក្រុងនេះនឹងកើនឡើងពី ១៤,៨ទៅ ១៦ លាននាក់នៅក្នុងឆ្នាំ ២០២៥ និងទំហំ GDP ទីក្រុងឡុងដុងមួយនឹងកើនឡើងពី ៧៥២ ទៅ ៩៧៣ពាន់លានដុល្លារ។
២) ទីក្រុងប៉ារីស របស់បារាំង
នៅក្នុងឆ្នាំ ២០២៥ ខាងមុខ ប្រជាជននៅក្នុងទីក្រុងនេះនឹងកើនឡើងពី ១១,៨ លានទៅ ១២,៨ លាននាក់ ខណៈដែលទំហំ GDP របស់ទីក្រុងទាំងមូលនឹងកើនឡើងពី ៧៥៤ ដល់ ៩៧១ ពាន់លានដុល្លារ។ មូលហេតុសំខាន់នៅពីក្រោយកំណើននេះ គឺការកើនឡើងនៃតម្រូវការអចលនទ្រព្យ ជាពិសេសគម្រោងអភិវឌ្ឍធំៗជាច្រើនរបស់អ្នកវិនិយោគមកពីជុំវិញពិភពលោក។
៣) ទីក្រុង Randstad របស់ហូឡង់ដ៍
Randstad គឺជាទីក្រុងធំជាងគេបំផុតលំដាប់ទី៤របស់ហូឡង់ដ៍។ ជាមួយនឹងការរំពឹងទុកថា ប្រជាជននឹងកើនឡើងពី ៧ ទៅ ៧,២ លាននាក់នៅក្នុងឆ្នាំ ២០២៥ ខាងមុខ ទំហំ GDP របស់ទីក្រុងនេះនឹងកើនឡើង ពី ៣៦៤ ដល់ ៤៦២ ពាន់លានដុល្លារ។ សេដ្ឋកិច្ចដ៏រស់រវើករបស់ទីក្រុងនេះដូចជា កំពង់ផែ វាបានក្លាយជាទីតាំងសំខាន់សម្រាប់ច្រកចេញចូលពាណិជ្ជកម្ម និងទីស្នាក់ការក្រុមហ៊ុនធំៗមកពីតំបន់អឺរ៉ុប និងបណ្តាប្រទេសផ្សេងទៀតនៅជុំវិញពិភពលោក។
៤) តំបន់ Rhine-Ruhr របស់អាល្លឺម៉ង់
ផ្ទុយពីទីក្រុងផ្សេងៗទៀតរបស់ប្រទេសនេះដែលគេរំពឹងថា ប្រជាជននឹងធ្លាក់ចុះ តំបន់ Rhine-Ruhr ដែលមានប្រជាជនជាង ១០ លានអ្នក វិញកំពុងក្លាយជាទីក្រុងដ៏មានសក្ដានុពល ពោលគឺជាទីក្រុងពាណិជ្ជកម្ម ជាជម្រករបស់ក្រុមហ៊ុនឧស្សាហកម្ម និងហិរញ្ញវត្ថុធំៗមកពីជុំវិញពិភពលោក។ គេរំពឹងថា GDP របស់ទីក្រុងនេះនឹងកើនឡើងពី ៤៨៥ ដល់ទៅ ៦២៥ ពាន់លានដុល្លារនៅក្នុងឆ្នាំ ២០២៥ ខាងមុខ។
៥) ទីក្រុងអ៊ីស្តាន់ប៊ុលរបស់ទួរគី
ប្រជាជនរបស់ទីក្រុងនេះនឹងត្រូវបានគេរំពឹងថា នឹងហក់ឡើងជាគំហុក ពោលគឺពី ១០,៩ លាននាក់ ទៅ ១៤,៨ លានអ្នកនៅក្នុងរយៈពេល ៦ឆ្នាំទៀត។ នេះក៏ជំរុញឲ្យសេដ្ឋកិច្ច GDP របស់ទីក្រុងនេះនឹងហក់ឡើងពី ១៨៨ ពាន់លានដុល្លារដល់ទៅ ៤៨០ ពាន់លានដុល្លារនៅ ក្នុងរយៈពេលដូចគ្នានេះដែរ។ កំណើនប្រាក់ចំណូល ក្រុមហ៊ុនថ្មីៗនិងសហគ្រិនភាពកើនឡើងរីកដូចផ្សិត គឺជាមូលហេតុចម្បងនៃកំណើន GDP នេះ។
៦) ទីក្រុង Los Angeles សហរដ្ឋអាមេរិក
ប្រជាជននៅ ក្នុងទីក្រុងទាំងមូលនឹងកើនឡើងពី ១២,៨ ទៅ ១៥ លានអ្នក ខណៈដែលGDP វិញនឹងកើនឡើងពី ៧៣២ពាន់លានដុល្លារទៅ ១ ពាន់ពាន់លានដុល្លារនៅក្នុងឆ្នាំ ២០២៥ ខាងមុខ។ ក្រៅពីចំណូលបានមកពីវិស័យទេសចរណ៍ ទីក្រុង Los Angeles គឺជាជម្រករបស់ក្រុមហ៊ុនបច្ចេកវិទ្យាយក្សធំៗរបស់អាមេរិក ដែលកំពុងដើរតួនាទីយ៉ាងសំខាន់សម្រាប់សេដ្ឋកិច្ចរបស់អាមេរិកទាំងមូល។
៧) ទីក្រុង Chicago
Chicago មានភាពល្បីល្បាញខាងប្រព័ន្ធដឹកជញ្ជួន ជំនួញ ព្រមទាំងជាទីក្រុងដែលមានសក្ដានុពលខ្លាំងក្លាផ្នែកសំណង់អចលនទ្រព្យ។ របាយការណ៍របស់ក្រុមហ៊ុនខាងលើបានព្យាករណ៍ថា ប្រជាជនទីក្រុងនេះនឹងកើនឡើងពី ៩,៤ ទៅ ១០,១ លាននាក់ ខណៈដែល GDP វិញនឹងកើនឡើងពី ៤៩៦ ដល់ ៦៦១ ពាន់លានដុល្លារ។
៨) ទីក្រុងសៀងហៃ
ប្រជាជនទីក្រុងសៀងហៃត្រូវបានគេរំពឹងថា នឹងកើនឡើងពី ២២,៣ លានទៅ ៣០,៩ លានអ្នកនៅក្នុងឆ្នាំ ២០២៥ ខាងមុខខណៈដែល GDP វិញនឹងកើនឡើង ២៥១ ពាន់លាន ទៅ ១,១ ពាន់ពាន់លានដុល្លារ។ កត្តាចម្បងដែលនាំឲ្យមានកំណើននេះគឺ លំហូរវិនិយោគពីក្រៅស្រុក និងកម្លាំងពលកម្មដ៏សកម្មរបស់យុវជនជំនាន់ថ្មី៕
ប្រភព៖msn
