អ្នកវិទ្យាសាស្ត្របង្ហាញថាការគេងទាំងមានភ្លើងភ្លឺៗ អាចប៉ះពាល់ដល់សុខភាពធ្ងន់ធ្ងរ
តាមការបង្ហាញរបស់គេហទំព័រអង្គការមិនមែនរដ្ឋាភិបាល ដែលហៅថា National Sleep Foundation ដ៏ល្បីល្បាញនិងមានគេទទួលស្គាល់បំផុតនៅឯសហរដ្ឋអាមេរិក បានបង្ហាញថា ៖ «អ័រម៉ូន Melatonin ជាអ័រម៉ូនដែលជួយឲ្យអ្នកសម្រាកបានលង់លក់ស្រួល។ ហើយវាកើតឡើងនៅពេលអ្នកត្រៀមខ្លួន នឹងចូលគេងនោះតែម្ដង។ តែបើមានពន្លឺភ្លើងនៅជុំវិញអ្នក ជាពិសេសពន្លឺពណ៌ខៀវចេញពីទូរស័ព្ទដៃនោះនឹងចូលទៅទប់ស្កាត់អ័រម៉ូនកុំឲ្យកើតមានជាមិនខាន។»
ជាការពិតណាស់ពន្លឺភ្លើងទាំងនោះនឹងបង្កើនអ័រម៉ូនដែលធ្វើឲ្យអ្នកកាន់តែធុញថប់នៅពេលរាត្រី។ ហើយវាអាចបង្កជាជំងឺច្រើនមុខទៀតផងរួមមាន ការឡើងទម្ងន់ និងជំងឺបេះដូង។ មិនត្រឹមតែប៉ុណ្ណោះវាអាចឲ្យអ្នកកើតជំងឺគេងមិនលក់រាំ រៃ ធ្ងន់ធ្ងរទៀត។
ដូចនេះបើសិនជាអាច អ្នកគួរ តែបិទភ្លើងឲ្យងងឹតទាំងស្រុងមុនពេលចូលគេង ព្រោះវាអាចឲ្យអ្នកឆាប់គេងបានលឿន។ ហើយងើបឡើងមកវិញក៏មានអារម្មណ៍ស្រស់ស្រាយ រួមទាំងជៀសផុតពីជំងឺដែលអាចកើតឡើងដោយយថាហេតុមើលមិនឃើញមុនទៀត ៕
ដោយ៖ ព្រំ សុវណ្ណកណ្ណិកា
