ហេតុផល​​សំខាន់ៗ​៤​យ៉ាង​ ​ដែល​​​និស្សិត​ខ្មែរ​​គួរ​តែ​តាមដាន​​ដំណឹង​ការងារ​តាម​គេហទំព័រ​ឲ្យ​បាន​ច្រើន​ជាង​មុន​



​បច្ចុប្បន្ន​នេះ ​​​បច្ចេកវិទ្យា​ទំនើប​ពិត​ជា​ផ្ដល់​ភាព​ងាយ​ស្រួល​យ៉ាង​ខ្លាំង​ដល់​មនុស្ស​ ​ជា​ពិសេស​ការ​ប្រើប្រាស់​អ៊ីនធឺណិត​ ដើម្បី​ស្រាវជ្រាវ​ និង ​ទទួល​បាន​នូវ​ព័ត៌មាន​សំខាន់ៗ​ជាច្រើន​មិន​ថា ​ក្នុង​ស្រុក​ ឬ ក្រៅ​ស្រុក​នោះ​ឡើយ​។ ​អ្វី​ដែល​គួរ​ឲ្យ​ចាប់​អារម្មណ៍​នោះ ​មាន​គេហទំព័រ​ការងារ​ជាច្រើន​បាន​បង្កើត​ឡើង​ ដែល​​​ក្នុង​មួយ​ថ្ងៃ​ៗ​ មាន​តំណែង​ការងារ​ជាច្រើន​ត្រូវ​បាន​ចេញ​ផ្សាយ​ដើម្បី​ ​ស្វែងរក​បេក្ខជន​ដែល​មាន​សមត្ថភាព​​។

​ប៉ុន្តែ​ខណៈ​ពេល​ដែល​ដំណឹង​ការងារ​ជាច្រើន​ត្រូវ​បានចេញផ្សាយនោះ​ ​​បែរ​ជា​​​​មនុស្ស​មួយ​ចំនួន​ហាក់​​​មិនបាន​តាមដាន ​ហើយ​តែង​ពោល​ថា​ ​រក​ការងារ​មិន​បាន​ ​និង ​មិន​ដឹង​គួរ​រក​នៅ​ទីណា ដែល​នេះ​ជា​ចំណុច​អសកម្ម​មួយ​​។ ​​ខាងក្រោម​នេះ ជា​ហេតុផល​ដែល​អ្នក​គួរ​តាម​ដាន​​ដំណឹង​ការងារ​តាម​គេហទំព័រ​​ឲ្យ​បាន​ច្រើន​ ​យ៉ាង​ហោច​ណាស់​មួយ​ថ្ងៃ​ឲ្យ​បាន​​ម្ដង​៖

១) ​​​​ទទួល​បាន​ដំណឹង​រហ័ស​ ​និង ងាយ​ចាប់​យក​ឱកាស​៖

ដូច​ដែល​បាន​ដឹង​ហើយ​ថា ​បច្ចុប្បន្ន​ជា​សម័យ​អ៊ីនធឺណិត ​ហើយ​គ្រប់​គ្នា​សុទ្ធ​តែ​មាន​ទូរស័ព្ទ​ដៃ​ទំនើប ​ដូច្នេះ​ហើយ​វា​មិន​មាន​ការ​លំបាក​ក្នុង​ការ​ទទួល​ដំណឹង​ការងារ​ទាំង​នោះ​ឡើយ​។ ​​​​​​​នៅ​ពេល​អ្នក​អាច​ទទួល​បាន​ដំណឹង​រហ័ស​ និង គ្រប់គ្រាន់​នោះ​វា​ជួយ​ឲ្យ​អ្នក​អាច​ ត្រៀម​ខ្លួន​ក្នុង​ការ​រៀប​ចំ​ប្រវត្តិរូប​ការងារ​ ​ដើម្បី​​ដាក់​ពាក្យ​​ឲ្យ​បាន​មុន​បេក្ខជន​ដទៃ​ទៀត​ ព្រោះ​កន្លែង​ខ្លះ​គឺ​ត្រូវ​ការ​ប្រញាប់​។

២) ​​​​បណ្ដុះ​គំនិត​ក្នុង​ការ​ស្វែងរក​ឱកាស​៖

ត្រូវ​ចាំ​ថា​​ ​​​រាល់​ឱកាស​ល្អ​មិន​ដែល​មក​គោះទ្វារ​អ្នក​​​នោះ​ឡើយ ​ពោល​គឺ​មាន​តែ​អ្នក​ប៉ុណ្ណោះ​ដែល​ត្រូវ​ស្វែងរក​វា​ដោយ​ខ្លួន​ឯង​។ ​ការ​បង្កើត​ទម្លាប់​ចូល​អាន​គេហទំព័រ​ការងារ​ឲ្យ​បាន​ច្រើន​នោះ​​​ អ្នក​នឹង​​ក្លាយ​ជា​មនុស្ស​មួយ​ដ៏​ស្វាហាប់​ ក្នុង​ការ​​ចាប់​យក​ការងារ​ដែល​ខ្លួន​ពេញ​ចិត្ត​​ជាក់​ជា​មិន​ខាន​។​ ​ត្រូវ​ចាំ​ថា បើ​អ្នក​មិន​ព្យាយាម​ស្វែងរក​ដំណឹង​ការងារ​ឲ្យ​បាន​ច្រើន​​ទេ ​នោះ​អ្នក​នឹង​មិន​អាច​ទទួល​បាន​ការងារ​ល្អ​ទាន់​ពេល​នោះ​ឡើយ​។​​​

៣) ​​បញ្ចៀស​ការ​ចំណាយ​ពេល​វេលា​ធ្វើ​រឿង​អត់​ប្រយោជន៍​

បច្ចុប្បន្ន​នេះ មនុស្ស​ភាគច្រើន​គឺ​ចូលចិត្ត​ប្រើប្រាស់​បណ្ដាញ​សង្គម​Facebook ​ខ្លាំង​ណាស់​​ ប៉ុន្តែ​អ្វី​ដែល​សំខាន់​​នោះ​ ​អ្នក​ខ្លះ​មិន​ទាន់​ចេះ​ទាញ​យក​ប្រយោជន៍​ពី​ការ​ប្រើប្រាស់​វា​នៅ​ឡើយ​ ព្រោះ​ចេះ​តែ​​បង្ហោះ​​​ពី​អារម្មណ៍ ​និង ​សម្ភារៈ​បង្អួត​គ្នា​​ប៉ុណ្ណោះ​។ ​​បើ​កាលណា​អ្នក​ចំណាយ​ពេលវេលា​ច្រើន​ពេក​ធ្វើ​រឿង​​មិន​សូវ​មាន​ប្រយោជន៍​បែបនេះ ​​វា​នាំ​ឲ្យ​ពេលវេលា​មួយ​ថ្ងៃ​របស់​អ្នក​កន្លង​ផុត​ទៅ​ដោយ​អសារបង់​។ ​ជម្រើស​ដ៏​ល្អ​​អ្នក​គួរ​តែ​ចុច«​Like» ​នៅ​ទំព័រ​ការងារ​​ផ្សេងៗ​ក្នុង​ប្រទេស​កម្ពុជា ដូច្នេះ​នៅ​ពេល​មាន​ដំណឹង​ថ្មីៗ​ នោះ​អ្នក​នឹង​ទទួល​បាន​វា​មិន​ខាន​។ ​​​​​​​​​​​​​​​​​

៤) ​យល់​ច្បាស់​ពី​ទីផ្សារ​ការងារ​កាន់​តែ​​ខ្លាំង​​៖ នៅ​ពេល​អ្នក​មើល​ដំណឹង​ការងារ​កាន់​តែ​ច្រើន​ នោះ​វា​ធ្វើ​ឲ្យ​អ្នក​កាន់​តែ​ទទួល​បាន​ចំណេះដឹង​កាន់​តែ​ច្រើន​អំពី​ទីផ្សារ​របស់​ការងារ​បច្ចុប្បន្ន​ ពោល​គឺ​ដឹង​ថា មួយ​ណា​កំពុង​មាន​តម្រូវ​ការ​ខ្លាំង​​ ​​ហើយ​មួយ​ណា​​ផ្ដល់​​ប្រាក់​ខែ​ច្រើន​ជាង​គេ​។ ​ការ​យល់​ច្បាស់​​បែបនេះ អាច​ជួយ​ឲ្យ​អ្នក​ត្រៀម​លក្ខណៈ​សម្បត្តិ​ និង ព្យាយាម​បណ្ដុះ​ជំនាញ​ដែល​មិន​ទាន់​មាន​ដើម្បី​ឆ្លើយ​តប​ទៅ​នឹង​តម្រូវការ​នៅ​ពេល​​​ខាង​មុខ៕ ​

ដោយ​៖ អ៊ុន​ ​ភក្តី​

X
5s