មាន​បុគ្គលិក​ជាច្រើន​បាន​សម្រេច​ចិត្ត​លាឈប់​ពី​ការងារ​ ​ដោយសារតែ​មិន​អាច​ទ្រាំ​បាន​នឹង​សម្ពាធ​ការងារ​ ជាពិសេស​នោះ​ធ្វើការ​ជាមួយ​នឹង​ថ្នាក់លើ​ដែល​​មាន​ជំនាញ​ខាង​បញ្ជា​។ ​ក្នុង​ស្ថានភាព​នេះ​​ ​​អ្នក​គ្រប់គ្រង​ទាំង​អស់​ត្រូវ​តែ​មាន​សិល្បៈ​​ក្នុង​ការ​ដឹកនាំ​​ ​​ដើម្បី​ធ្វើ​យ៉ាង​ណា​ឲ្យ​បុគ្គលិក​ក្រោម​បង្គាប់​ធ្វើ​ការ​អស់​ពី​លទ្ធភាព​ ​និង ​មិន​មាន​គំនិត​ចាក់ចេញ​ ​ព្រោះ​​បើ​មិន​ដូច្នោះ​ទេ​ ​គម្រោង​ដែល​កំពុង​ដំណើរ​ការ​ក្នុង​ក្រុមហ៊ុន​​ប្រាកដ​ជា​មិន​ងាយ​នឹង​សម្រេច​ឡើយ​ ​បើ​បុគ្គលិក​មាន​ភាព​រកាំរកូស​ក្នុង​ចិត្ត​។ ​

ដើម្បី​​​ជំរុញ​ទឹក​ចិត្ត​ឲ្យ​បុគ្គលិក​ធ្វើ​ការ​​អស់​ពី​សមត្ថភាព​ ​និង មិន​មាន​គំនិត​ចាក់ចេញ​ពី​ក្រុមហ៊ុន​នោះ​ ​ក្នុង​នាម​ជា​អ្នក​គ្រប់គ្រង​ ​ត្រូវ​​មាន​​ចំណុច​សំខាន់ៗ​ទាំង​នេះ​៖

១) ​ពន្យល់​ច្បាស់ៗ៖ ​ថ្វីត្បិត​តែ​ ​អ្នកគ្រប់គ្រង​មាន​ភាព​មមាញឹក​ច្រើន​លើ​ការងារ​ ​ប៉ុន្តែ​ក្នុង​ពេល​ប្រាប់​ ​ឬ ណែនាំ​​អំពី​ផែនការ​ផ្សេងៗ ទៅ​កាន់​បុគ្គលិក​នោះ​ ​គឺ​ត្រូវ​តែ​ធ្វើ​ឡើង​យ៉ាង​ម៉ត់ចត់​ ​និង​ ​ច្បាស់លាស់​បំផុត​ដើម្បី​ធានា​ថា ពួកគេ​យល់​ច្បាស់​អំពី​អ្វី​ដែល​​​ចង់​ឲ្យ​ពួកគេ​ធ្វើ​។ បុគ្គលិក​ខ្លះ​មិន​ហ៊ាន​សួរ​ច្រើន​នោះ​ទេ​ ​នៅ​ពេល​ដែល​ពួកគេ​មិន​យល់​ ​ស្រប​ពេល​ដែល​ថ្នាក់លើ​និយាយ​ ​និង​ ​ពន្យល់​ឲ្យ​តែ​រួច​ពី​មាត់​ទៀត​នោះ​ ​ធ្វើ​ឲ្យ​ពួកគេ​មាន​អារម្មណ៍​ថា ស្មុគស្មាញ​ព្រោះ​មិន​ដឹង​ថា ត្រូវ​ធ្វើ​អ្វី​ឲ្យ​ប្រាកដ​។ ​វា​ជា​ចំណុច​អវិជ្ជមាន​មួយ​​ដែល​ធ្វើ​ឲ្យ​បុគ្គលិក​ ​មាន​អារម្មណ៍​ថា លែង​ចង់​ធ្វើ​ការ​ព្រោះ​បើ​បន្ត​ធ្វើ​ក៏​ធ្វើ​មិន​បាន​​ល្អ​។ ដូច្នេះ​​ហើយ​​ក្នុង​នាម​ជា​អ្នក​គ្រប់គ្រង​ត្រូវ​មាន​សិល្បៈ​ក្នុង​ការ​ពន្យល់​ឲ្យ​ច្បាស់ៗ​ ​ដើម្បី​ឲ្យ​បុគ្គលិក​ក្រោម​បង្គាប់​ដឹង​អំពី​​អ្វី​ដែល​ត្រូវ​ធ្វើ។ ​​​​

​២) ​សរសើរ​នៅ​ពេល​ធ្វើ​ល្អ​ ​និង ណែនាំ​ត្រឹម​ត្រូវ​នៅ​ពេល​​មាន​កំហុស​៖ ​​​នៅ​ពេល​ដែល​បុគ្គលិក​សាង​ស្នាដៃ ​អ្នក​គ្រប់គ្រង​គ្រប់​រូប​​មិន​គួរ​បង្អែបង្អង់​យូរ​នោះ​ទេ​ ​ពោល​គឺ​ត្រូវ​តែ​លើក​ទឹក​ចិត្ត​តាមរយៈ​កោតសរសើរ​ ​ឬ​ ​ផ្តល់​ជា​រង្វាន់​ជា​ដើម​។ ​​​សម្រាប់​បុគ្គលិក​ណា​ដែល​បាន​សាង​កំហុស​​ ​អ្នក​គ្រប់គ្រង​​មិន​គួរ​ស្តី​បន្ទោស​ខ្លាំង​នៅ​ចំពោះ​​មុខ​អ្នក​ដទៃ​នោះ​ឡើយ​​ព្រោះ​ការ​ធ្វើ​បែបនេះ​មិន​អាច​កែប្រែ​​អ្វី​បាន​នោះ​ទេ​ ​ប៉ុន្តែ​វា​កាន់​តែ​រុញ​ឲ្យ​ស្ថានភាព​កាន់​តែ​ស្មុគស្មាញ​ថែម​ទៀត​។ ជម្រើស​ដ៏​ល្អ​គឺ​គួរ​តែ​ហៅ​បុគ្គលិក​ដែល​ធ្វើ​ខុស​នោះ​មក​និយាយ​គ្នា​តទល់​ ​ហើយ​ព្យាយាម​ប្រាប់​អំពី​កំហុស​ដែល​ពួកគេ​បាន​សាង​​ ​និង ប្រាប់​អំពី​វិធី​ដែល​ការពារ​កុំ​ឲ្យ​ដើរ​ជាន់​ផ្លូវ​ចាស់​ទៀត​​​។

៣) ​ព្យាយាម​បង្កើន​ភាព​ស្និទ្ធស្នាល៖ ​បើ​ទោះ​បី​ជា​អ្នក​​មាន​តំណែង​ខ្ពស់​ ​និង​ ​ប្រាក់ខែ​ច្រើន​ជាង​បុគ្គលិក​ក្រោម​បង្គាប់​ក្តី​ ​ប៉ុន្តែ​មិន​ត្រូវ​បង្ហាញ​ពី​រនាំង​វណ្ណៈ​ខ្លាំង​ពេក​នៅ​កន្លែង​ការងារ​នោះ​ឡើយ​ ​ព្រោះ​វា​នាំ​ឲ្យ​ខ្វះ​ភាព​ជិត​ស្និត​ជា​មួយ​​នឹង​បុគ្គលិក​។ ​ការ​បង្កើន​ភាព​ជិត​ស្និត​ជាមួយ​បុគ្គលិក​ ​គឺ​ពិត​ជា​សំខាន់​ខ្លាំង​ណាស់​ព្រោះ​ការ​ធ្វើ​បែបនេះ​អាច​ជួយ​ឲ្យ​ពួកគេ​យល់​ឃើញ​ថា ​អ្នក​គឺ​ជា​ថ្នាក់ដឹកនាំ​ល្អ​ ​មិន​ប្រកាន់​ខ្លួន​ ​និង ចេះ​រួមសុខទុក្ខ​ជាមួយ​ពួកគេ​ ​ដូច្នេះ​ហើយ​បុគ្គលិក​ទាំង​នោះ​នឹង​មាន​អារម្មណ៍​កក់ក្តៅ​ ​ហើយ​ក៏​ព្យាយាម​ធ្វើ​ការ​អស់​ពី​សមត្ថភាព​ផង​ដែរ​។

៤) ​ស្តាប់​យោបល់​បុគ្គលិក​​៖​ ​ជា​ទូទៅ​មនុស្ស​ម្នាក់ៗ​តែងតែ​​មាន​គំនិត​ផ្សេងៗ​ពី​គ្នា​។ បុគ្គលិក​តូចតាច​ ​មិនមែន​មាន​ន័យ​ថា គំនិត​របស់​ពួកគេ​អន់​នោះ​ទេ​ ​គ្រាន់​តែ​ពេល​ខ្លះ​ពួកគេ​មិន​ទាន់​មាន​ឱកាស​ដើម្បី​បញ្ចេញ​តែ​ប៉ុណ្ណោះ​។ ដូច្នេះ​ហើយ​ ​​អ្នក​គ្រប់គ្រង​គួរតែ​ព្យាយាម​ស្តាប់​គំនិត​ថ្មីៗ​របស់​បុគ្គលិក​ទាំង​នោះ​ ​ថា​តើ​មាន​ប្រយោជន៍​សម្រាប់​ក្រុមហ៊ុន​ឬទេ។ ​ការ​ស្តាប់​គំនិត​និង យោបល់​របស់​បុគ្គលិក​នេះ​នឹង​ធ្វើ​ឲ្យ​ពួកគេ​ ​មាន​អារម្មណ៍​ថា មាន​តម្លៃ​ខ្លាំង​ក្នុង​ការ​ចូល​រួម​ធ្វើ​កិច្ចការ​ផ្សេងៗ​ក្នុង​ក្រុមហ៊ុន​៕

​ដោយ​៖ អ៊ុន ភក្តី ​

ប្រភព៖ www.inc.com & www.reliableplant.com