មនុស្សទាំង៥ប្រភេទនេះ អ្នកមិនគូររាប់អានជាមិត្តភក្ដិឡើយ ដើម្បីកុំឲ្យមានបញ្ហាស្មុគស្មាញថ្ងៃក្រោយ!
មិត្តភក្ដិគឺជាមនុស្សសំខាន់ដែលគ្រប់គ្នាត្រូវការ។ ដោយសារតែសំខាន់បែបនេះហើយ បានជាមុននឹងរាប់អានជាមិត្តភក្ដិ អ្នកត្រូវគិតឲ្យច្បាស់សិនថា មនុស្សប្រភេទណាដែលមានលក្ខណៈសម្បត្តិគ្រប់គ្រាន់ សមក្លាយជាមិត្តភក្ដិ ឬ អាចនិយាយបានថា មនុស្សណាដែលមិនអាចបង្កបញ្ហាស្មុគស្មាញដល់អ្នកជាពិសេសនាំទៅរកផ្លូវអន្តរាយ។ ខាងក្រោមនេះ គឺជាប្រភេទមនុស្សដែលអ្នកមិនគួររាប់អានជាមិត្តភក្ដិដាច់ខាត៖
១) ពូកែអែបអប៖ មនុស្សប្រភេទនេះ គ្មានថ្ងៃអាចក្លាយជាមិត្តល្អរបស់អ្នកជាដាច់ខាត ព្រោះរាល់ទង្វើដែលគេធ្វើនោះ គឺដើម្បីចង់ចំណេញអ្វីមួយពីអ្នកប៉ុណ្ណោះ មិនមែនធ្វើដោយចេញពីចិត្តនោះឡើយ។ មានន័យថា បើអ្នកលែងមានប្រយោជន៍សម្រាប់គេហើយ នោះគេក៏លែងមើលមុខអ្នកដែរ។ ដូច្នេះហើយ មិនបាច់ចាត់ទុកមនុស្សប្រភេទនេះជាមិត្តភក្ដិទេ ព្រោះវាគ្មានបានផលអ្វីទាំងអស់។
២) មនុស្សដែលស្គាល់តែលុយ៖ មនុស្សដែលស្គាល់តែលុយ នឹងមិនអាចក្លាយជាមិត្តស្លាប់រស់របស់អ្នកបានឡើយ ព្រោះថាគេមិនដែលចាត់ទុកមិត្តភាពជាសំខាន់នោះឡើយ។ ដូច្នេះហើយនៅពេលមានបញ្ហាកើតឡើង គេគិតតែរឿងចំណេញ និង ខាតប៉ុណ្ណោះហើយក៏មិនខ្វល់ថា អ្នកបានសុខឬអត់ដែរ។
៣) មនុស្សដែលចូលចិត្តនិយាយអាក្រក់ពីគេ៖ គ្មាននរណាម្នាក់អាចជៀសផុត ពីការនិយាយអំពីរឿងអ្នកដទៃនោះឡើយ ប៉ុន្តែគ្រាន់តែក្នុងរបៀបផ្សេងគ្នាប៉ុណ្ណោះ។ អ្នកខ្លះចូលចិត្តនិយាយអាក្រក់ពីគេរហូត ហើយទោះបីជាមានចំណុចល្អក៏ដោយ ក៏ព្យាយាមជាន់ពន្លិចដែរ។ មនុស្សប្រភេទនេះ អ្នកមិនគួររាប់អានជាមួយនោះឡើយ ព្រោះអ្នកនឹងក្លាយជាគោលដៅសំខាន់បន្ទាប់ ដែលគេត្រូវនិយាយ។
៤) មនុស្សគ្មានភាពស្មោះត្រង់៖ ក្នុងការសាងមិត្តភាព និងរក្សាឲ្យបានយូរអង្វែងនោះ ទាល់តែគ្រប់ភាគីទាំងអស់មានភាពស្មោះត្រង់ ព្រោះបើគ្មានចំណុចនេះទេ អ្វីៗនឹងត្រូវរលាយទៅវិញយ៉ាងលឿនបំផុត។ ដូច្នេះ មុននឹងសម្រេចចិត្តរាប់អាននរណាម្នាក់ជាមិត្តសម្លាញ់របស់អ្នក គឺត្រូវគិតលើភាពស្មោះត្រង់ជាសំខាន់ បើមិនដូច្នោះទេ អ្នកនឹងមានការសោកស្តាយមិនខាន។
៥) មនុស្សដែលចូលចិត្តប្រើអំពើហិង្សា៖ មនុស្សដែលចូលចិត្តប្រើអំពើហិង្សា គឺងាយនឹងបង្កគ្រោះថ្នាក់បំផុតសម្រាប់អ្នក ជាពិសេសនៅពេលមានបញ្ហាអ្វីមួយ។ ដូច្នេះហើយ ដើម្បីកុំឲ្យនាំទុក្ខដាក់ខ្លួន អ្នកគួរតែគេចឲ្យផុត ពីមនុស្សប្រភេទនេះ៕
ដោយ៖ រតនា វិចិត្រ
