អនុវត្តគន្លឹះទាំង៥នេះ ដើម្បីលុបបំបាត់ភាពអៀនខ្មាសខុសទំនងរបស់អ្នកចេញឲ្យអស់
ភាពខ្មាសអៀនច្រើន គឺជាមូលហេតុមួយ ក្នុងចំណោមមូលហេតុផ្សេងៗទៀតដែលធ្វើឲ្យអ្នក មិនអាចសម្រេចអ្វីដែលខ្លួនចង់បាន។ ជាទូទៅ មនុស្សភាគច្រើនតែងតែមានភាពខ្មាសអៀនទាំងការនិយាយស្តី និង ធ្វើកិច្ចការផ្សេងៗ ជាពិសេសក្នុងចំណោមមនុស្សច្រើន ដូច្នេះហើយពួកគេមិនងាយមានឱកាសដើម្បី បញ្ចេញសមត្ថភាព និង ពង្រឹងឲ្យប្រសើរជាងមុនឡើយ។ ដើម្បីយកឈ្នះលើភាពអៀនខ្មាសរបស់អ្នក គួរអនុវត្តតាមគន្លឹះទាំងនេះ៖
១) ចាប់ផ្តើមជាមួយមនុស្សដែលស្គាល់គ្នាសិន៖ ប្រសិនបើ អ្នកមានភាពខ្មាសអៀនខ្លាំងពេក ជំហានដំបូងគឺគួរតែចាប់ផ្តើមនិយាយ ឬ ធ្វើអ្វីៗជាមួយមនុស្សដែលស្គាល់គ្នាដំបូងសិន។ នៅពេលដែលអ្នកគិតថា មានអារម្មណ៍ថាប្រសើរហើយ គឺត្រូវតែចាប់ផ្តើមជាមួយនឹងមនុស្សផ្សេងៗទៀត ដែលមិនសូវស្គាល់ ឬ មិនសូវស្និទ្ធស្នាល។ ការធ្វើបែបនេះ ដើម្បីជួយឲ្យអ្នកអាចកាត់បន្ថយភាពអៀនខ្មាសបន្តិចម្ដងៗ រហូតលែងខ្មាស។
២) ត្រៀមខ្លួន មុននឹងជួបជាមួយអ្នកដទៃ៖ ប្រសិនបើអ្នកជាមនុស្សដែល ពូកែខ្មាសពេក ហើយតែងតែរកនឹកអ្វីលែងឃើញនៅពេលជួបមនុស្សច្រើននោះ ជម្រើសល្អអ្នកគួរតែរៀបចំខ្លួនឲ្យបានជាស្រេច ថាអ្វីដែលអ្នកត្រូវនិយាយ ឬ ហាត់សមជាមុនសិន។ ការធ្វើបែបនេះ គឺពិតជាសំខាន់ខ្លាំងណាស់ ព្រោះវានឹងជួយឲ្យអ្នកមិនភ្លេច ឬ និយាយអ្វីទៅប្រកបដោយទំនុកចិត្តខ្ពស់។
៣) ផ្តល់តម្លៃលើខ្លួនឯង៖ ការផ្តល់តម្លៃលើខ្លួនឯង គឺជារឿងសំខាន់ខ្លាំងណាស់ ក្នុងពេលជួបជាមួយនឹងមនុស្សដទៃទៀត ព្រោះបើមិនដូច្នោះទេ អ្នកប្រាកដជាមិនចង់បង្ហាញអ្វីដែលខ្លួនចង់ធ្វើនោះឡើយ ព្រោះមើលទៅគេអស្ចារ្យខ្លាំងពេក។ ត្រូវចាំថា គ្មាននរណាម្នាក់អាចតំណាងឲ្យការគិត ឬ ការយល់ឃើញរបស់អ្នកឡើយ គឺមានតែអ្នកខ្លួនឯងម្នាក់គត់ក្នុងលោកនេះ។ ដូច្នេះហើយ បើមិនផ្តល់តម្លៃឲ្យខ្លួនឯង តើនរណាអាចធ្វើបាន។
៤) ធ្វើអ្វីដែលជាលក្ខណៈពិសេសរបស់អ្នក៖ ត្រូវចាំថា ដើម្បីកាត់បន្ថយភាពអៀនខ្មាសរបស់អ្នក និង សាងទំនុកចិត្តលើខ្លួនឯងនោះ គឺត្រូវចាប់ផ្តើមជាមួយនឹងអ្វីដែលជា ចំណុចខ្លាំងរបស់អ្នកជាមុនសិន។ ជាទូទៅ មនុស្សណាក៏ដោយ នៅពេលធ្វើអ្វីមួយដែលមិនមែនជាចំណុចខ្លាំងរបស់ខ្លួននោះ វាអាចនឹងនាំឲ្យពួកគេបរាជ័យ ដូច្នេះហើយពួកគេប្រាកដជាបាក់ស្បាតលែងចង់ធ្វើទៀត។ ប៉ុន្តែបើអ្នកធ្វើអ្វីដែលជា ចំណុចពិសេសវិញ វានឹងជួយឲ្យអ្នកសម្រេចតាមបំណងមិនខាន ហើយវានឹងលើកទឹកចិត្តឲ្យអ្នកបន្តធ្វើអ្វីផ្សេងៗទៀតមិនខាន។
៥) គិតវិជ្ជមាន៖ មុនពេលអ្នកធ្វើ ឬ និយាយអ្វី គឺត្រូវចងចាំថា អ្វីៗនឹងមិនមានបញ្ហាអ្វីនោះទេ ហើយរឿងល្អនឹងកើតឡើងមិនខាន។ ប៉ុន្តែបើអ្នកគិតថា ខ្លួនឯងនឹងសាងកំហុស នោះអ្នកនឹងមិនហ៊ានបញ្ចេញសកម្មភាពអ្វីទាំងអស់។ ដូច្នេះហើយ ត្រូវគិតវិជ្ជមានជានិច្ចចំពោះខ្លួនឯង ដើម្បីឲ្យភាពអៀនខ្មាសខុសទំនងរបស់អ្នករលាយបាត់បន្តិចម្តងៗ។
ដោយ៖ អ៊ុន ភក្តី
ប្រភព៖ psychcentral.com, www.inc.com & kidshealth.org
