ត្រូវចេះជំនាញគោលទាំង ៤ នេះ ប្រសិនបើអ្នកមានសុបិនចង់ក្លាយជាវិស្វករក៏អស្ចារ្យមួយរូប
អ្នកសាកគិតទៅមើលថាតើការខូចខាតអ្វីខ្លះនឹងអាចកើតឡើងប្រសិនបើអាគារសាងសង់មួយ មិនមាននូវគ្រឹះមូលដ្ឋានជាទម្រដ៏រឹងមាំនោះ ? ភាពដែលអាចទៅរួចនៃការក្ស័យធនរបស់ជំនួញនៃអាគារមួយនោះ ខូចខាតបរិស្ថាន ខូចខាតទ្រព្យសម្បត្តិ និងរឹតតែធ្ងន់ធ្ងរទៅទៀតនោះគឺការបាត់បង់ជីវិតរបស់មនុស្សនោះឯង។
ការសាងសង់អាគារដ៏រឹងមាំមួយបាន ពិតជាសំខាន់ណាស់ ព្រោះបើវាមានបញ្ហាអ្វីកើតឡើងដោយការធ្វេសប្រហែសនិងសមត្ថភាពមិនគ្រប់គ្រាន់របស់អ្នកសាងសង់ វាមិនត្រឹមតែខូចខាតកេរ្តិ៍ឈ្មោះរបស់បុគ្គលនោះទេ តែប៉ះពាល់ធ្ងន់ធ្ងរទៅដល់អ្នកទទួលរងផលប៉ះពាល់ពីវាទាំងអស់ទៀតផង។
ហេតុនេះ ដើម្បីផ្ដល់មូលដ្ឋានដ៏រឹងមាំទៅដល់អាគារមួយបាន តើអ្នកដឹងទេថា វិស្វករមួយរូបត្រូវមានលក្ខណៈសម្បត្តិមកធានាអ្វីខ្លះ ?
១) ជំនាញឫចំណេះដឹងអំពី STEM
តើអ្វីទៅជា STEM ? STEM កំពុងតែក្លាយជាចំណេះដឹងដ៏ចាំបាច់ខ្លាំងសម្រាប់ប្រទេសកំពុងអភិវឌ្ឍដូចជាប្រទេសកម្ពុជាយើងនេះហើយ។ STEM មកពីS (Science) វិទ្យាសាស្ត្រ T (Technology) បច្ចេកវិទ្យា E (Engineering) វិស្វកម្ម និងM (Math) គណិតវិទ្យា។ ចំណេះដឹងទាំង៤នេះគឺជាចំណេះដឹងមូលដ្ឋាន ដែលទាមទារយ៉ាងចាំបាច់សម្រាប់វិស្វករគ្រប់រូប។
២) ជំនាញប្រាស្រ័យទាក់ទង
គ្រប់គម្រោងសាងសង់ទាំងអស់ សុទ្ធតែជាការរួមសហការគ្នារវាងសមាជិកក្នុងក្រុមជាច្រើននាក់ ដើម្បីអាចប្រមូលផ្ដុំចំណុចខ្លាំងពិសេសរបស់បុគ្គលម្នាក់ៗ មកវេញត្របាញ់ចូលគ្នា បង្កបង្កើតជាសមិទ្ធផលជាស្ថាបត្យកម្មដ៏អស្ចារ្យនិងរឹងមាំមួយបាន។ បើអ្នកពូកែចុះសម្រុងជាមួយអ្នកក្នុងក្រុម នោះប្រាកដណាស់ថាជំនាញទំនាក់ទំនងនឹងធ្វើជាស្ពានសម្រាប់អ្នកគ្រប់គ្នាចម្លងឲ្យឆាប់សម្រេចបាននូវគោលដៅនោះ។ ម្យ៉ាងទៀតអ្នកត្រូវចេះបត់បែនតាមកាលៈទេសៈដោយជាមួយបុគ្គលណាដែលគួរប្រើប្រាស់ភាសាបច្ចេកទេស និងបុគ្គលណាគួរសម្រាយជាពាក្យសាមញ្ញបកស្រាយឲ្យអ្នកសន្ទនាជាមួយអ្នកបានយល់។
៣) សមត្ថភាពក្នុងការគិតវិភាគ
ដូចដែលបានបង្ហាញមកពីខាងលើអំពីផលប៉ះពាល់នៃអាគារដែលមិនមានភាពរឹងមាំមួយ ដែលអាចសម្លាប់ជីវិតរបស់មនុស្សច្រើននាក់បាន។ ដូច្នេះ ភារកិច្ចអ្នកជាអ្នកសាងសង់ម្នាក់ សមត្ថភាពក្នុងការគិតវិភាគពិតជាសំខាន់ ដែលអ្នកមិនអាចប្រកែកមិនបណ្ដុះគុណសម្បត្តិនេះបានឡើយ។ តើត្រូវសាងសង់បែបណា ទើបត្រឹមត្រូវតាមស្តង់ដារ មានមូលដ្ឋានរឹងមាំ ដែលអាចធានាបានពីសុវត្ថិភាពមនុស្ស និងចៀសវាងការខ្ជះខ្ជាយប្រាក់ច្រើនដោយការធ្វេសប្រហែសរបស់អ្នក។ ម្យ៉ាងទៀតនៅពេលប្រើប្រាស់ការគិតវិភាគ ការយកចិត្តទុកដាក់ទៅលើព័ត៌មានលម្អិតនឹងរឹតតែសំខាន់សម្រាប់អ្នកទៅទៀត។
៤) ឆន្ទៈនិងចំណង់ក្នុងការរៀនសូត្រ
មិនមែនក្លាយជាវិស្វករប្រកបដោយលក្ខណៈសម្បត្តិគ្រប់គ្រាន់ហើយ មានន័យថាអ្នកចេះអស់ហើយនិងមានសមត្ថភាពពូកែលើសគេនោះទេ។ គំនិតច្នៃប្រឌិតទៅលើរបៀបសាងសង់អាគារ និងការរចនាជាដើមដែលចេះតែអភិវឌ្ឍថ្មីៗរហូតនោះ ក៏ដោយសារតែអ្នកសាងសង់ម្នាក់នោះមានឆន្ទៈពោរពេញដោយចិត្តចង់រៀនសូត្រ និងអភិវឌ្ឍខ្លួនឯង ដើម្បីបង្កើតស្ថាបត្យកម្មដ៏អស្ចារ្យនិងលើកតម្កើងមុខមាត់ប្រទេសជាតិខ្លួនផងដែរ៕
ប្រែសម្រួល៖ ស្រីពៅ
ប្រភព៖ blog.3dconnexion.com
