ហេតុផល ៣ យ៉ាងដែលអ្នកគួរពង្រឹងជំនាញរបស់អ្នកឲ្យកាន់តែខ្លាំង
ជាការពិតណាស់ គ្មាននរណាម្នាក់មកជួយគិតពីអនាគតរបស់អ្នកជាជាងអ្នកខ្លួនឯងនោះទេ។ បើទោះបីជាអ្នករវល់នឹងការងារបច្ចុប្បន្នឬរវល់ស្វែងរកការងារថ្មីយ៉ាងណាក្តី ចូរកុំភ្លេចលៃលកពេលវេលាខ្លះសម្រាប់ពង្រឹងសមត្ថភាពខ្លួនឯងឲ្យខ្លាំងជាងមុន។
ហេតុផល៣យ៉ាងខាងក្រោមនេះនឹងបង្ហាញពីសារៈសំខាន់នៃការបង្កើនសមត្ថភាពរបស់អ្នក៖
១) ប្រវត្តិរូបការងារល្អជាងមុន
ចូរអ្នកចងចាំថាអ្នកប្រៀបបានជាតៃកុងឡានអញ្ចឹង ពោលគឺអ្នកគ្រប់គ្រងជីវិតខ្លួនឯង។ អ៊ីចឹងហើយបានជាអ្នកពុំចាំបាច់ត្រូវការការដាស់តឿនពីមេរបស់អ្នករាល់ពេលនោះទេ។ផ្ទុយទៅវិញ អ្នកត្រូវចេះដាស់តឿនខ្លួនឯងបន្ថែម អ្នកគួរតែចេះលៃលកពេលវេលាមកពង្រឹងសមត្ថភាពខ្លួនឯងដើម្បីឲ្យប្រវត្តិការងាររបស់អ្នកកាន់តែល្អជាងមុន។ ម៉្យាងវិញទៀត ត្រូវប្រាកដថាអ្នកឆ្ពោះទៅមុនជានិច្ច។
២)ប្រយោជន៍ដល់ថ្ងៃអនាគត
បើទោះបីជាអ្នកមានតួនាទីនិងកិច្ចការដែលអ្នកត្រូវបំពេញច្បាស់លាស់ មានពេលខ្លះមេរបស់អ្នកអាចដាក់កិច្ចការដែលមិនត្រូវនឹងជំនាញឬតួនាទីរបស់អ្នក។ ចូរកុំប្រកែកឬខឹងនឹងមេអី។ ផ្ទុយទៅវិញ អ្នកគួរតែយកចិត្តទុកដាក់ធ្វើនិងរៀនសូត្រពីកិច្ចការងារថ្មីៗទាំងនេះ វានឹងពង្រឹងសមត្ថភាពរបស់អ្នកដោយអ្នកពុំបានដឹងក៏ថាបាន ដែលជាប្រយោជន៍ដល់ថ្ងៃអនាគត។
៣) រៀនសូត្របន្ថែម
ភាពពេញចិត្តចំពោះការងារគឺជារឿងសំខាន់ពីព្រោះថាវាជួយដល់ផលិតភាពការងាររបស់អ្នក ដែលជាលទ្ធផលអ្នកអាចរកកម្រៃឬទទួលបានប្រាក់ខែបានច្រើនទៅតាមនឹងដែរ។ ប៉ុន្តែ មិនថាអ្នកស្រឡាញ់ការងារបច្ចុប្បន្នយ៉ាងណាក៏ដោយ ប្រសិនជាវាមិនផ្តល់ឱកាសឲ្យរីកចម្រើនទៀតទេ ចូរអ្នកសិក្សាជំនាញបន្ថែម ដែលអាចជួយអ្នករកការងារថ្មីនិងល្អប្រសើរជាងមុន៕
ប្រែសម្រួល៖ អុឹង មុយយូ
ប្រភព៖ upwork.com
