ចំណុចសំខាន់ៗ ដែលយុវជនកម្ពុជា គួរចេះប្រើFacebook ឲ្យមានប្រយោជន៍
បច្ចុប្បន្ននេះ ការប្រើប្រាស់បណ្ដាញសង្គមFacebook ពិតជាទទួលបានការពេញនិយមខ្លាំងណាស់ ជាពិសេសស្រទាប់យុវវ័យតែម្ដង។ ប៉ុន្តែក្នុងស្ថានភាពទូទៅ មនុស្សភាគច្រើនហាក់ដូចជាមិនសូវចាប់អារម្មណ៍អំពី ការប្រើប្រាស់ Facebook ឲ្យមានប្រយោជន៍ និង ត្រឹមត្រូវនៅឡើយ អ៊ីចឹងហើយកាន់តែប្រើគឺកាន់តែខាត ពោលគឺគ្មានឡើយផលចំណេញ។ ខាតនោះរាប់ចាប់ពី បាត់បង់ពេលវេលា បាត់បង់ទំនាក់ទំនងផ្ទាល់ជាមួយមនុស្សជុំវិញខ្លួន ទទួលបានតែរឿងអវិជ្ជមានដែលគេចែករំលែកតៗគ្នា និង ខាតបង់យ៉ាងច្រើនចំណុចទៀត។ តើគួរធ្វើយ៉ាងណា ដើម្បីប្រើFacebook ឲ្យមានប្រយោជន៍?
Facebook ត្រូវបានបង្កើតឡើងក្នុងឆ្នាំ២០០៤ ដោយលោកMark Zuckerberg ហើយបច្ចុប្បន្នលោកបានក្លាយជាមហាសេដ្ឋីមានប្រាក់រាប់ពាន់លានដុល្លារ ក្នុងវ័យខ្ទង់៣០ប៉ុណ្ណោះ ។ ពីមួយឆ្នាំទៅមួយឆ្នាំ មនុស្សកាន់តែច្រើនឡើងៗប្រើ Facebook ដែលមានន័យស្មើនឹង លុយហូរចូលក្រុមហ៊ុនមួយនេះកាន់តែច្រើនដែរ។ តើអ្នកគិតយ៉ាងដូចម្ដេច បើអ្នកជាមនុស្សម្នាក់ដែលរួមចំណែកឲ្យFacebook កាន់តែមាន ខណៈអ្នកខ្លួនឯងផ្ទាល់មិនដែលខ្វល់ថា ខ្លួនឯងនឹងបានប្រយោជន៍ និង ខាត់ប្រយោជន៍អ្វីខ្លះពីការប្រើប្រាស់វា?
Facebook នេះបើចេះប្រើវាក្នុងផ្លូវត្រូវ គឺ ប្រាកដជាទាញបានប្រយោជន៍មិនអន់នោះទេ តែបើមិនចេះប្រើ ឬ មិនដឹងពីផលប៉ះពាល់របស់វា នោះគឺគ្មានឡើយពាក្យថា ទទួលបានប្រយោជន៍ ផ្ទុយទៅវិញ វានឹងធ្វើឲ្យអ្នកមានបញ្ហាកាន់តែច្រើនឡើងៗ។
ដើម្បីទទួលបានប្រយោជន៍ពីវា រឿងទី១ដែលអ្នកត្រូវគិតនោះ គឺការរាប់អានមិត្តក្នុងបណ្ដាញសង្គមមួយនេះ។ មនុស្សទូទៅ គិតចង់តែបានមិត្តឲ្យបានច្រើននៅក្នុងFacebook ដូច្នេះហើយពេលគេ ស្នើសុំ (Add) មកក៏ទទួល (Confirm) ហើយក៏ប្រឹងស្នើសុំ (Add)វិញដែរ។ ត្រូវចាំថា គុណភាពនៃមិត្តភ័ក្ដិក្នុងបណ្ដាញសង្គមគឺពិតជាសំខាន់ខ្លាំងណាស់ ព្រោះមនុស្សមួយចំនួនចូលចិត្តបង្ហោះរឿងអត់បានការ ហើយចែករំលែកតែរឿងអវិជ្ជមាន និង ឈឺក្បាលដល់អ្នក ដូច្នេះហើយអ្នកក៏ត្រូវទទួលរងនូវផលអវិជ្ជមានពីរឿងរ៉ាវទាំងនោះផងដែរ។ ក្នុងន័យនេះ មានន័យថា បើមិត្តរបស់អ្នកក្នុងបណ្ដាញសង្គមនេះសប្បូរទៅដោយមនុស្សដែល ចូលចិត្តរៀនសូត្រ ចូលចិត្តការចែករំលែកចំណេះដឹងការងារ និង សុទ្ធតែជាអ្នកជំនួញនោះ អ្នកនឹងទទួលបានប្រយោជន៍ច្រើន តែបើមានមិត្តភាគច្រើនសុទ្ធតែជាមនុស្សដែលចូលចិត្តបង្ហោះរឿងអត់បានការ អ្នកនឹងទទួលបានតែរឿងអត់បានការដែរ។
ចំណែកចំណុចទី២គឺប្រភេទនៃទំព័រ Facebook។ ដើម្បីទទួលបានព័ត៌មានផ្សេងៗកាន់តែងាយស្រួលនោះ អ្នកអាចចូលទៅLike ទំព័រមួយចំនួនបាន។ ត្រូវប្រាកដថា ទំព័រ Facebookមានប្រយោជន៍សម្រាប់អ្នក មានន័យថា អ្នកគួរតែLike ទំព័រនៃក្រុមហ៊ុនជ្រើសរើសបុគ្គលិក ព្រោះថា អ្នកអាចនឹងទទួលបានឱកាសការងារល្អៗ ថ្មីៗ និង ប្រាក់ខែខ្ពស់។ មួយទៀត អ្នកគួរតែLike ទំព័រ Facebookក្រុមហ៊ុន ឬ ស្ថាប័នព័ត៌មាន ប៉ុន្តែត្រូវប្រាកដថា អ្នករើសយកទំព័រណាដែលផ្ដល់ព័ត៌មាន គួរឲ្យទុកចិត្ត និង មានប្រយោជន៍។ ព្រោះថាព័ត៌មានទាំងនោះ គឺប្រៀបដូចជាអាហារសម្រាប់ខួរក្បាលរបស់អ្នកអ៊ីចឹង មានន័យថា បើទទួលឬ អានតែព័ត៌មានមិនល្អ វានឹងមិនអាចបំប៉នខួរក្បាលអ្នកឡើយ តែវានឹងបំពុលខួរក្បាលរបស់អ្នកទៅវិញ។ មួយវិញទៀត អ្នកក៏អាច Like ទំព័រFacebook ក្រុមហ៊ុនផ្សេងៗទៀត ដើម្បីទទួលព័ត៌មានស្តីពីផលិតផល និងសេវាកម្មផ្សេងៗ។
មួយទៀតក៏សំខាន់ដែរ គឺ ការចូលរួមនៅក្នុងសមាជិកក្រុមផ្សេងៗ។ នៅក្នុងបណ្ដាញសង្គមFacebook ក៏មានក្រុមផ្សេងៗផងដែរ ដូចជា ក្រុមដែលបង្កើតឡើងដើម្បី លក់ផលិតផលអេឡិចត្រូនិក ក្រុមដែលនិយាយអំពីការសិក្សា ក្រុមដែលនិយាយអំពីការធ្វើជំនួញ និង ផ្សេងៗទៀត។ ដូច្នេះហើយ អ្នកអាចចូលរួមបាន តែត្រូវប្រាកដថា ក្រុមដែលអ្នកចង់ចូលជាសមាជិកនោះ ត្រូវជាមួយនឹងអ្វីដែលអ្នកត្រូវការ ឬ អាចផ្ដល់ប្រយោជន៍ដល់អ្នកបាន ព្រោះនៅពេលសមាជិកណាមួយផុស ឬ បង្ហោះអ្វីមួយ អ្នកនឹងទទួលបានព័ត៌មាននោះដែរ៕
ដោយ៖ រតនា វិចិត្រ
