បើធ្វើការយូរហើយ តែមិនឡើងឋានៈសោះគឺអាចមកពីកត្តាសំខាន់ៗ៦យ៉ាងនេះ!
ការឡើងតំណែងជា ក្តីប្រាថ្នាសំខាន់មួយរបស់បុគ្គលិកគ្រប់រូប ព្រោះវាជួយឲ្យពួកគេទទួលបានប្រាក់ខែខ្ពស់ និង កិត្តិយសច្រើនជាងមុន។ ប៉ុន្តែមនុស្សមួយចំនួនធ្វើការជាច្រើនឆ្នាំមកហើយ ប៉ុន្តែនៅតែមិនអាចឡើងតំណែងទាល់តែសោះ។ ខាងក្រោមនេះ ជាមូលហេតុសំខាន់ៗ៦យ៉ាង៖
១) ទម្លាប់ធ្វើការឲ្យតែដល់ម៉ោង៖ ត្រូវចងចាំថា ក្រុមហ៊ុនត្រូវបានគេបង្កើតឡើងមកគឺដើម្បីសម្លឹងឃើញផលចំណេញ ដូច្នេះហើយគេត្រូវការបុគ្គលិកដែលសកម្មក្នុងការងារដើម្បី ជាចលករដ៏សំខាន់ដើម្បីទាញយកប្រយោជន៍។ ប៉ុន្តែបើអ្នកធ្វើការឲ្យតែរួចពីដៃ ខ្ជិល ហើយមើលតែបំណាំគេនោះ ទោះធ្វើការមួយជីវិតទៀតក៏គ្មានការដំឡើងតំណែងនោះឡើយ។
២) ខ្វះភាពជាអ្នកដឹកនាំ៖ ជាទូទៅ អ្នកដែលមានតួនាទីខ្ពស់ គឺត្រូវតែមានសិល្បៈក្នុងការដឹកនាំ ព្រោះមិនមែនធ្វើការតែឯងដូចមុនទៀតឡើយ ពោលគឺត្រូវមានបុគ្គលខ្លះនៅក្រោមបង្គាប់។ ដូច្នេះបើគេសង្កេតឃើញថា អ្នកជាមនុស្សដែលខ្វះភាពជាអ្នកដឹកនាំនោះ គឺក្រុមហ៊ុនក៏មិនចង់ដំឡើងតំណែងអ្វីដែរ ព្រោះខ្លាចបង្កឲ្យប្រព័ន្ធការងារកាន់តែស្មុគស្មាញ។
៣) មិនចេះទំនាក់ទំនង៖ ការទំនាក់ទំនង គឺពិតជាសំខាន់ខ្លាំងណាស់ ព្រោះទោះបីជាអ្នកមានចំណេះដឹងច្រើនប៉ុណ្ណាក៏ដោយ តែបើខ្សោយខាងទំនាក់ទំនងហើយ គឺមិនងាយនឹងធ្វើកិច្ចការអ្វីបានសម្រេចឡើយ ព្រោះថាការងារដែលអស្ចារ្យ និង សំខាន់ៗទាល់តែមានការចូលរួមពីមនុស្សច្រើនទើបអាចសម្រេចបាន។ ដូច្នេះហើយ វាក៏ជាចំណុចមួយនៃការសម្រេចថា គួរដំឡើងតំណែងឬអត់ដែរ។
៤) មិនទាន់មានសមត្ថភាពគ្រប់គ្រាន់៖ ពេលខ្លះមិនមែនគេមិនផ្តល់តំណែងឲ្យអ្នកនោះទេ ប៉ុន្តែដោយសារតែសមត្ថភាពរបស់អ្នកនៅខ្សោយនៅឡើយ ដូច្នេះហើយត្រូវពិចារណា និង ទទួលស្គាល់ពីសមត្ថភាពរបស់ខ្លួនជាមុនសិន ទើបអាចពង្រឹងវាឲ្យប្រសើរជាងមុនបាន។
៥) មានចារិតអួតអាង៖ បើអ្នកជាមនុស្សដែលមានចារិតអំនួតខ្លាំងលើខ្លួនឯងពេក វាធ្វើឲ្យមនុស្សជុំវិញខ្លួនមិនសប្បាយចិត្តនោះឡើយ ទោះបីជាគេប្រឹងញញឹមនៅមុខអ្នកក៏ដោយ។ វាជាចំណុចមួយសំខាន់ផងដែរ ដែលថ្នាក់លើមិនចង់ដំឡើងតួនាទីអ្វីដល់អ្នកឡើយ ប្រសិនបើអ្នកមានចារិតបែបនេះ។
៦) បក្សពួកនិយម៖ ពេលខ្លះមិនមែនអ្នកគ្មានសមត្ថភាពនោះទេ ប៉ុន្តែដោយសារតែថ្នាក់លើមិនព្រមផ្តល់ឱកាសឲ្យបុគ្គលិកល្អប៉ុណ្ណោះ។ មូលហេតុសំខាន់មួយ គឺដោយសារតែបក្សពួកនិយមខ្លាំងពេក ពោលគឺគេផ្តល់ឱកាសតែបក្សពួករបស់ខ្លួនប៉ុណ្ណោះ។
ដោយ៖ អ៊ុន ភក្តី
