ចំណុចសំខាន់ចំនួន ៣យ៉ាងដែលអ្នកគួរសិក្សាពីក្រុមហ៊ុនមុនពេលចូលសម្ភាស
ដំណាក់កាលមួយដ៏សំខាន់នៃការសម្ភាសការងារគឺជាការសិក្សាព័ត៌មានទាំងឡាយដែលមានពាក់ព័ន្ធជាមួយក្រុមហ៊ុនឲ្យបានច្បាស់លាស់។ វានឹងជួយឲ្យអ្នកបានត្រៀមខ្លួនទុកមុន និងយល់ច្បាស់លាស់ពីមូលហេតុដែលអ្នកចង់បម្រើការងារនៅកន្លែងពួកគេ។
ខាងក្រោមនេះគឺជាចំណុចសំខាន់ចំនួន៣យ៉ាងដែលអ្នកគួរសិក្សាពីក្រុមហ៊ុនមុនពេលចូលសម្ភាស៖
១) សិក្សាពីបេសកកម្មរបស់ក្រុមហ៊ុន
ក្រុមហ៊ុននីមួយៗសុទ្ធតែបង្កើតឡើងមកដោយមានគោលដៅតម្រង់ទៅរកអ្វីមួយជាក់លាក់។ ហេតុនេះ បើសិនជាអ្នកពិតជាចង់ចូលរួមចំណែកក្នុងក្រុមការងាររបស់ក្រុមហ៊ុនណាមួយនោះមែន នោះព័ត៌មានដែលអ្នកត្រូវសិក្សាឲ្យបានម៉ត់ចត់អំពីបេសកកម្មរបស់ក្រុមហ៊ុននោះ នឹងជួយអ្នកបានច្រើនក្នុងការសម្ភាសការងារ ហើយអ្នកនឹងអាចឆ្លើយតបទៅកាន់អ្នកសម្ភាសការងាររបស់អ្នកបានថាតើអ្នកនឹងប្រើប្រាស់សមត្ថភាពដែលអ្នកមានដើម្បីជួយសម្រេចបេសកកម្មនោះដោយរបៀបណាខ្លះ។
២) សិក្សាពីអ្វីដែលជាចំណុចលេចធ្លោរបស់ក្រុមហ៊ុននោះ
ក្រុមហ៊ុនដែលប្រកួតប្រជែងគ្នានៅក្នុងវិស័យដូចគ្នា ពួកគេសុទ្ធតែមានយុទ្ធសាស្ត្រផ្សេងៗគ្នាដើម្បីឆ្ពោះទៅរកគោលដៅរបស់គេ។ នៅពេលសម្ភាស អ្នកប្រាកដជាជួបប្រសព្វនឹងសំណួរថាមូលហេតុអ្វីបានជាអ្នកចាប់អារម្មណ៍ចង់ធ្វើការនៅក្រុមហ៊ុនរបស់គេ។ ការសិក្សាជាមុនពីចំណុចលេចធ្លោរបស់ពួកគេ ដែលអាចជាការពេញចិត្តដែលអ្នកមានចំពោះយុទ្ធសាស្ត្រដែលគេប្រើប្រាស់ដើម្បីសម្រេចគោលដៅ នោះវានឹងជួយឲ្យអ្នកអាចត្រៀមខ្លួនបានល្អសម្រាប់ការសម្ភាស។
៣) សិក្សាថាតើនរណាជាអ្នកគ្រប់គ្រងនៅទីនោះ
នៅក្នុងការសិក្សារបស់អ្នកអំពីក្រុមហ៊ុនដែលអ្នកចង់ធ្វើការ អ្នកក៏គួរតែសិក្សាថាតើនរណាជាអ្នកគ្រប់គ្រងនៅទីនោះ ដែលអាចមានដូចជានាយកប្រតិបត្តិ ថ្នាក់គ្រប់គ្រងផ្សេងៗនៅក្នុងក្រុមហ៊ុនជាដើម។
ដោយ៖ ស្រីពៅ
សូមអាន៖ ដំបូន្មានការងារដ៏មានតម្លៃពីបុគ្គលជោគជ័យក្នុងលោកចំនួន ៤រូប ដែលអ្នកមិនគួរមើលរំលង
