រឿងល្អៗទាំងនេះនឹងកើតឡើង ប្រសិនបើអ្នកលត់ដំខ្លួនពីលំបាកពីក្មេងឲ្យបានច្រើន
ថ្វីត្បិតតែការលំបាក គឺគ្មាននរណាចង់ជួប ប៉ុន្តែក៏គ្មាននរណាអាចគេចផុតដែរ។ ដូច្នេះហើយ អ្នកមិនគួរព្យាយាមរត់គេចពីបញ្ហានោះទេ ព្រោះមិនថាទៅដល់ទីណាទេ អ្នកនឹងនៅតែជួបដដែល។ ដូច្នេះហើយ អ្នកគួរតែព្យាយាមលត់ដំខ្លួនឯងពីក្មេងឲ្យបានច្រើន ជាមួយនឹងការលំបាក ដើម្បីក្លាយជាមនុស្សដែលជោគជ័យម្នាក់នាពេលអនាគត៖
១) អាចរៀនសូត្រពីបញ្ហាទាំងនោះ៖ នៅពេលណាអ្នកជួបបញ្ហាកាន់តែច្រើន នោះអ្នកនឹងអាចដឹងអំពីដំណោះស្រាយក៏កាន់តែច្រើនផងដែរ ហើយវានឹងមានប្រយោជន៍ខ្លាំងនៅថ្ងៃខាងមុខទៀត។ ដូច្នេះហើយ គួរហ៊ានប្រឈមមុខជាមួយនឹងបញ្ហាទាំងនោះទោះបីជា ពេលខ្លះត្រូវបរាជ័យក៏ដោយ ប៉ុន្តែវាជាចំណេះដឹងជីវិតដែលមិនងាយនឹងរកឃើញនៅសាលានោះទេ។
២) កាត់បន្ថយភាពភ័យខ្លាច៖ ត្រូវចាំថា បើអ្នកព្យាយាមធ្វើអ្វីតែដែលងាយៗ ហើយតែងគេចវេះមិនប្រឈមមុខ នៅពេលជួបការលំបាកនោះ អ្នកនឹងនៅតែបណ្ដុះភាពភ័យខ្លាច និង ទន់ខ្សោយក្នុងខ្លួនជានិច្ច។ ប៉ុន្តែ បើអ្នកមិនមិនព្រមគេចវេះ ហើយសុខចិត្តប្រឈមមុខនឹងការលំបាកទាំងអស់នោះ យូរៗទៅអ្នកនឹងមានអារម្មណ៍លែងភ័យខ្លាចទៀតហើយ ដូច្នេះថ្ងៃក្រោយទោះមានបញ្ហាអ្វីក៏អ្នកអាចដោះស្រាយបានដែរ។
៣) សាងទំនុកចិត្តលើខ្លួនឯង៖ មនុស្សដែលគេចវេះពីបញ្ហា គឺជាមនុស្សដែលខ្វះភាពជឿជាក់លើខ្លួនឯង ពោលគឺមិនទាន់ប្រកួតផង ក៏ថាខ្លួនចាញ់បាត់ទៅហើយ។ ដូច្នេះហើយដើម្បីបញ្ចៀសចំណុចអាក្រក់នេះ អ្នកត្រូវតែមានភាពក្លាហានទោះបីជាមានការលំបាកប៉ុណ្ណាក៏ដោយ ក៏មិនត្រូវរត់យករួចខ្លួនដែរ។
៤) ស្គាល់ច្បាស់អំពីទំនួលខុសត្រូវ៖ មនុស្សដែលមិនរត់គេចពីការលំបាក គឺជាមនុស្សដែលស្គាល់ច្បាស់អំពីតម្លៃនៃការទទួលខុសត្រូវ ដូច្នេះហើយទោះបីជា ការងារនោះពួកគេមិនអាចជោគជ័យក៏ដោយ ប៉ុន្តែមិនអាចរត់ចោលដាច់ខាត។
៥) មានគំនិតច្នៃប្រឌិតខ្ពស់៖ នៅពេលអ្នកឆ្លងកាត់ការលំបាកច្រើនតាំងពីវ័យក្មេងមក នោះក៏កាន់តែធ្វើឲ្យអ្នកមានគំនិតច្នៃប្រឌិតខ្ពស់ក្នុងការធ្វើការងារផ្សេងៗទៀតផង។ តាមរយៈបទពិសោធន៍កន្លងមក ទោះបីជាមានបញ្ហាថ្មីអ្វីកើតឡើងក៏ដោយ ក៏អ្នកអាចមានដំណោះស្រាយជានិច្ច ហើយដំណោះស្រាយទាំងនោះគឺពិតជាពន្លត់ភ្លើងបញ្ហាបានយ៉ាងមានប្រសិទ្ធភាព ដែលអ្នកផ្សេងមិនអាចធ្វើបាន៕
ដោយ៖ រតនា វិចិត្រ
