បច្ចុប្បន្ន​​នេះ​​អាមេរិក​កំពុង​ជួប​បញ្ហា​​​ទីផ្សារ​ការងារ​ដ៏​​ចង្អៀត​មួយ​មិន​ធ្លាប់​មាន​នៅ​ក្នុង​ប្រវត្តិសាស្ត្រ​ ហើយ​​សាធារណជន​ជា​ច្រើន​បាន​លើក​ឡើង​ថា បច្ចុប្បន្ន​​មហាអំណាច​មួយ​នេះ​កំពុង​ប្រឈម​​ខ្លាំង​ទៅ​នឹង​គម្លាត​​នៃ​​តម្រូវការ​ជំនាញ​ការងារ​​នៅ​លើ​ទីផ្សារ​។

បើ​យោង​តាម​ការិយាល័យ​ស្ថិតិ​ការងារ​​របស់​ខ្លួន (BLS) បាន​ឲ្យ​ដឹង​ថា បច្ចុប្បន្ន​មាន​បុគ្គលិក​ជាង ៧ លាន​នាក់​​មិន​មាន​ជំនាញ​ច្បាស់លាស់​។ ​ទីផ្សារ​ការងារ​ដ៏​​អាក្រក់​នេះ​បាន​​អនុញ្ញាត​ឲ្យ​ក្រុមហ៊ុន​ជា​ច្រើន​បាន​ប្រកាស​ជ្រើសរើស​បុគ្គលិក​ដោយ​បើកចំហ ពោល​គឺ​មិន​ត្រូវ​ការ​ជំនាញ​ជាក់លាក់​ណា​មួយ​ច្បាស់លាស់​នោះ​ឡើយ​។ ក្រុមហ៊ុន​យក្ស​របស់​ខ្លួន​​ជា​ច្រើន​ដូចជា Google, Apple, IBM និង​ធនាគារ Bank of America ជាដើម​លែង​ត្រូវការ​​ឲ្យ​អ្នក​ដាក់ពាក្យ​មាន​សញ្ញាប័ត្រ​មហាវិទ្យាល័យ​ដូចមុន​ទៀត​ហើយ។

ជាជាង​ការ​សង្កត់ធ្ងន់​លើ​​តម្រូវ​​ការ​ជ្រើសរើស​មុខតំណែង​ជាក់លាក់ និង​ទាមទារ​បទពិសោធន៍ ​ ស្ថាប័ន​​កាន់តែ​ច្រើន​ឡើង​ចាប់​ផ្តើម​ផ្លាស់ប្ដូរ​​ដោយ​ផ្ដោត​ទៅ​លើ​ជំនាញ​ដែល​ខ្លួន​គិត​ថា ​បុគ្គលិក​​​ទាំង​នោះ​មាន​សក្ដានុពល ឬ ទេពកោសល្យ​វិញ​ម្តង។ នៅ​ក្នុង​​ក្រុមហ៊ុន Facebook ជា​ឧទាហរណ៍​ស្រាប់​ដែល​លោក​ស្រី Janelle Gale អនុ​ប្រធាន​ផ្នែក​ធនធាន​មនុស្ស​របស់​​ក្រុមហ៊ុន​នេះ​បាន​​និយាយ​ថា ​អ្នក​ដែល​ដាក់​ពាក្យ​​មក​ធ្វើ​ការ​មិន​ទាមទារ​លក្ខខណ្ឌ​ដូច​ការ​ចង់បាន​នោះ​ឡើយ បោល​បើ​ពួកគេ​ចេះ​អ្វី​ ត្រូវ​ដាក់​ពាក្យ​លើ​មុខ​តំណែង​ហ្នឹង​តែម្តង។

យ៉ាងណាមិញ នៅ​ពេល​ថ្មីៗ​នេះ​ក្រុមហ៊ុន​ជ្រើសរើស​ការងារ​ដ៏​ល្បីល្បាញ LinkedIn ទើប​នឹង​បាន​ស្រាវជ្រាវ​​​លើ​ការងារ​រាប់​សែន​កន្លែង​ដែល​បាន​ប្រកាស​ជ្រើសរើស​​ពី​ក្រុមហ៊ុន​ធំៗ​នានា​ជុំវិញ​ពិភពលោក ហើយ​សង្កេត​ឃើញ​ថា​ មាន​ជំនាញ​សំខាន់ៗ​​​ដែល​​កំពុង​ត្រូវ​ការ​បំផុត​សម្រាប់​ឆ្នាំ ២០១៩​នេះ។ ក្រុមហ៊ុន​នេះ​បាន​​លើកឡើង​ថា និយោជក​ជា​ច្រើន​កំពុង​​ត្រូវ​ការ​បុគ្គលិក​ដែល​មាន​ជំនាញ​ទន់ (Soft Skill) និង​ជំនាញ​រឹង (Hard Skill) ​ខ្លាំង​ណាស់។
​
ខាងក្រោម​នេះ​ជំនាញ​ទន់ (Soft Skill) និង​ជំនាញ​រឹង (Hard Skill) ​​ដែល​ក្រុមហ៊ុន LinkedIn រក​ឃើញ​ថា មាន​តម្រូវការ​ទីផ្សារ​ខ្ពស់​បំផុត​ក្នុង​ឆ្នាំ ២០១៩​នេះ៖

ជំនាញ​ទន់ (Soft Skill)
៥.ជំនាញ​គ្រប់គ្រង​ពេលវេលា (Time Management)
៤.មាន​ភាព​​​បត់បែន​ឬ សម្រប​ខ្លួន​បាន​ (Adaptability)
៣.ការ​សហការ​គ្នា (Collaboration)
២.ពូកែ​​លើកទឹកចិត្ត (Persuasion)
១.មាន​ភាព​ច្នៃប្រឌិត (Creativity)

ជំនាញ​រឹង (Hard Skill)
៥.ជំនាញ​ឌីសាញ UX (UX Design)
៤.ជំនាញ​គ្រប់គ្រង​មនុស្ស (People Management)
៣.ជំនាញ​វិភាគ​ទិន្នន័យ (Analytical Reasoning)
២.ជំនាញ​បង្កើត​បញ្ញា​សិប្បនិម្មិត AI (Artificial Intelligence)
​​១.ជំនាញ​ Cloud Computing។

ភាព​ច្នៃប្រឌិត (Creativity) និង​ជំនាញ​កម្មវិធី Cloud Computing ត្រូវ​បាន​គេ​ចាត់​ទុក​ថា ជា​ជំនាញ​ដែល​មាន​ទីផ្សារ​ខ្ពស់​ជាងគេ​​បំផុត​នៅ​ក្នុង​ចំណោម​ជំនាញ​ទន់ និង​ជំនាញ​រឹង នេះ​បើ​យោង​តាម​ការ​អះអាង​របស់​ក្រុមហ៊ុន LinkedIn៕

ប្រភព៖ cnbc