ទោះអ្នករៀនមុខជំនាញអ្វីក៏ដោយ កុំភ្លេចរៀនជំនាញទាំង ៧នេះឲ្យបានកាន់តែខ្លាំង
ទោះបីជាអ្នកជាអ្នកជំនួញ ប្រធានក្រុមហ៊ុន គ្រូពេទ្យ សាស្ត្រាចារ្យ អ្នកច្បាប់យ៉ាងណាក៏ដោយ ក្រៅពីជំនាញវិជ្ជាជីវៈរបស់អ្នក អ្នកគួរតែរៀនជំនាញ ៧ នេះបន្ថែមទៀត។ តម្រូវការរបស់ពិភពលោកបច្ចុប្បន្ននេះគឺទាមទារឲ្យអ្នកមានជំនាញទាំងនេះសម្រាប់បំពេញបន្ថែមលើជំនាញដែលមានស្រាប់ក្នុងគោលបំណងមួយគឺធ្វើឲ្យ ជីវិតរបស់អ្នកល្អប្រសើរ។
១. ជំនាញគ្រប់គ្រងលុយកាក់ (Money Management)
ជំនាញគ្រប់គ្រងលុយកាក់ មិនសំដៅសម្រាប់តែអ្នករៀនខាងហិរញ្ញវត្ថុ ឬគណនេយ្យនោះទេ សូម្បីតែអ្នករៀនពេទ្យ គ្រប់គ្រង ច្បាប់ ទីផ្សារ ឬមនុស្សសាមញ្ញទូទៅក៏ត្រូវចេះជំនាញនេះដែរ។ ជំនាញគ្រប់គ្រងលុយកាក់ នឹងធ្វើឲ្យអ្នកយល់ច្បាស់ពីការគ្រប់គ្រងចរន្តលុយកាក់ ចំណូលចំណាយជាពិសេសវាធ្វើឲ្យអ្នកចេះប្រើប្រាស់លុយឲ្យមានប្រសិទ្ធភាពមិនធ្លាក់ចូលក្នុងបំណុលមិនល្អ និងកសាងជីវិតមួយដែលមានសុវត្ថិភាពហិរញ្ញវត្ថុ។
២. សុខភាពផ្លូវចិត្ត (Mental Health)
សុខភាពផ្លូវចិត្តពិតជាសំខាន់ណាស់ ហើយវាមានឥទ្ធិពលខ្លាំងក្លាបំផុតដល់សកម្មភាពប្រចាំថ្ងៃរបស់អ្នក។ ហេតុដូច្នេះ អ្នកត្រូវប្រាកដថា ទាំងគំនិត និងសកម្មភាពរបស់អ្នក គឺកើតចេញពីសុខភាពផ្លូវចិត្តដ៏រឹងមាំមួយ។ សុខភាពផ្លូវចិត្តដែលរឹងមាំមានដូចជា មានស្មារតីរឹងប៉ឹង មានការប្ដេជ្ញាចិត្តខ្ពស់ មានសុទិដ្ឋិនិយម មានក្តីសង្ឃឹម មានក្រមសីលធម៌នៃការរស់នៅ ឬមានគំនិតវិជ្ជមានជាដើម។ អ្នកត្រូវឧស្សាហ៍ដាស់តឿនខ្លួនឯងឲ្យមានចំណុចទាំងនេះក្នុងខ្លួនជានិច្ចដែលធ្វើដូច្នេះវានឹងជួយឲ្យអ្នកមិនបាក់ទឹកចិត្ត ឬអាចជៀសផុតពីជំងឺស្ត្រេសដែលនឹងប៉ះពាល់ដល់ភាពជោគជ័យរបស់អ្នក។
៣.គ្រប់គ្រងពេលវេលា (Time Management)
ថ្វីត្បិតតែមនុស្សគ្រប់គ្នាមាន ២៤ ម៉ោងដូចគ្នាក៏ពិតមែន ប៉ុន្តែមានមនុស្សមិនច្រើនទេដែលអាចគ្រប់គ្រងពេលវេលារបស់ខ្លួនឲ្យមានប្រសិទ្ធភាពបំផុតនោះ។ ដូចនេះប្រសិនបើអ្នកមិនបានបែងចែកពេលវេលាឲ្យបានត្រឹមត្រូវទេនោះ អ្នកមិនអាចរៀបចំសកម្មភាពជីវិតប្រចាំថ្ងៃឲ្យមានប្រសិទ្ធភាពនោះឡើយ។ ផ្ទុយទៅវិញបើអ្នកធ្វើបានល្អលើចំណុចនេះ អ្នកនឹងមានឱកាសជោគជ័យច្រើនពីព្រោះអ្នកអាចកំណត់បានថា តើការងារណាខ្លះដែលអាទិភាពសម្រាប់អ្នកដែលអាចឲ្យអ្នកសម្រេចគោលដៅបានឆាប់រហ័ស? សូមកុំភ្លេចថា ការគ្រប់គ្រងពេលវេលាបានត្រឹមត្រូវក៏ជួយឲ្យអ្នកកាត់បន្ថយស្ត្រេស បំបាត់ភាពតានតឹង និងជួយឲ្យ អ្នកមានថាមពលគ្រប់គ្រាន់គិតលើការងារសំខាន់ៗរបស់អ្នក។
៤. គ្រប់គ្រងទំនាក់ទំនង (Communication Management)
អ្នកត្រូវទទួលស្គាល់ថា ការទំនាក់ទំនងគឺជាកូនសោមួយនៃភាពជោគជ័យ។ នៅក្នុងទំនាក់ទំនងប្រចាំថ្ងៃ ប្រសិនបើអ្នកខ្វះការទំនាក់ទំនងល្អជាមួយមនុស្សជុំវិញខ្លួន អ្នកពិតនឹងជួបបញ្ហា។ ចំពោះបរិស្ថានការងារ វាទាមទារឲ្យមានការចូលរួមផ្តល់មតិយោបល់ គំនិត ឬការសហការគ្នាដើម្បីធ្វើឲ្យការងារដើររលូនទៅមុខ។ ការទំនាក់ទំនងល្អនឹងធ្វើឲ្យ អ្នកទទួលបានចំណេះដឹង គំនិត ឱកាស និងស្គាល់មនុស្សថ្មីៗបានកាន់តែច្រើន។ ប្រសិនបើអ្នកសង្កេតឃើញថា អ្នកមានភាពខ្វះខាតចំណុចនេះ អ្នកគួរយកពេលពិចារណាមើលចំណុចនេះឡើងវិញ ស្នើសុំជំនួញពីអ្នកដទៃ និងរៀនសូត្របន្ថែមឲ្យបានកាន់តែច្រើន។
៥. យុទ្ធសាស្ត្រ
តើអ្នកហ៊ាននិយាយដែរទេថា អ្នកអាចសម្រេចគោលដៅណាមួយបានដោយមិនចាំបាច់រៀបចំគម្រោងយុទ្ធសាស្ត្រដើម្បីធ្វើអ្វីមួយ? នៅក្នុងផែនការជីវិតរបស់មនុស្សគ្រប់រូប ចង់សម្រេចបានអ្វីមួយគឺចាំបាច់ណាស់ត្រូវធ្វើផែនការ រៀបចំយុទ្ធសាស្ត្រជាមុន។ អ្នកត្រូវបង្កើតគំនិត ចេះផ្ដួចផ្ដើម បង្កើតវិធីសាស្ត្រ ឬស្វែងរកគន្លឹះឲ្យបានច្រើននៅពេលអ្នកមានគម្រោងធ្វើអ្វីក៏ដោយ។ វាជាគុណសម្បត្តិមួយដែលអាចជួយឲ្យអ្នកជោគជ័យបាន ៥០% ទៅហើយ។
៦. ជំនាញដោះស្រាយបញ្ហា (Problem-Solving Skills)
ឧបសគ្គ ឬបញ្ហាផ្សេងៗនៅក្នុងជីវិត គ្មានអ្នកណាអាចគេចផុតបានឡើយ គ្រាន់តែតិចឬច្រើនតែប៉ុណ្ណោះ។ ប៉ុន្តែអ្នកត្រូវចាំថា រាល់បញ្ហានីមួយៗ អ្នកត្រូវស្វែងរកមធ្យោបាយដោះស្រាយវាឲ្យបាន និងមានប្រសិទ្ធភាព។ គ្មានបញ្ហាណាមួយដែលមិនអាចដោះស្រាយបាននោះឡើយ។ ជំនាញនេះទាមទារឲ្យអ្នកមានការអត់ធ្មត់ខ្ពស់ ព្យាយាម មានការទទួលខុសត្រូវ ជាមនុស្សមានគំនិតផ្ដួចផ្ដើម មានភាពបត់បែន មានគំនិតទូលំទូលាយ និងចេះអភិវឌ្ឍខ្លួនឲ្យបានល្អប្រសើរជាលំដាប់។
៧. សមត្ថភាពក្នុងការកសាងក្រុមការងារ (Team-Building Abilities)
នៅពេលបច្ចុប្បន្ន ជំនាញនេះសំខាន់ណាស់ជាពិសេសនៅក្នុងបរិស្ថានការងារតែម្តង។ អ្នកត្រូវមានជំនាញកាន់តែខ្លាំង ពីព្រោះថា ការរៀនបង្កើតក្រុមការងារនឹងជួយជំរុញឲ្យមនុស្សជុំវិញអ្នកខិតទៅរកគ្នា ចេះសហការ ប្រមូលគំនិត ជាធ្លុងមួយដើម្បីសម្រេចបានគោលដៅរួម។ ជំនាញនេះទាមទារឲ្យអ្នកពូកែទំនាក់ទំនង ចូលចិត្តស្តាប់ ពូកែលើកហេតុផល ចូលចិត្តការចែករំលែក មានភាពប៉ិនប្រសព្វទាំងពាក្យសម្តី និងកាយវិការ ហើយជាពិសេសអនុវត្តឲ្យបានច្រើនដើម្បីធ្វើជាគំរូសម្រាប់អ្នកដទៃ៕
ប្រភព៖ Inc
