អ្នកនឹងក្លាយជាសិស្សពូកែដោយមិនដឹងខ្លួនបើអាចអនុវត្តទម្លាប់ទាំងនេះបាន
ដើម្បីក្លាយខ្លួនជាសិស្សពូកែបាន ជំហានដំបូងឡើយគឺវា ចាប់ផ្ដើមពីអ្នកខ្លួនឯងសិន។ អ្នកគួរសួរខ្លួនឯងថាតើអ្នកតែងមានទម្លាប់យ៉ាងណាខ្លះពេលនៅផ្ទះ នៅសាលា និងមកពីសាលាវិញ? តើទម្លាប់ទាំងនោះវាខុសគេដែរឬអត? ហើយទម្លាប់ទាំងនោះផ្ដល់លទ្ធផលរបៀបណាខ្លះមកអ្នកវិញ? តើអ្នកចង់ដឹងពីទម្លាប់ដែលអាចបង្រៀនអ្នកឲ្យក្លាយជាសិស្សពូកែជាងគេដែរឬទេ?
១) អ្វីដែលត្រូវរៀបចំមុនពេលចាប់ផ្ដើមរៀន៖ មុនចាប់ផ្ដើមរៀនសូត្រ អ្នកត្រូវតែរៀបចំពេលវេលាថា តើពេលប៉ុន្មានម៉ោងដែលអ្នកនឹងចំណាយក្នុងការធ្វើលំហាត់ និងអានសៀវភៅ? ក្នុងនោះផងដែរ ដើម្បីឲ្យមានអារម្មណ៍ស្រស់ថ្លា និងឆាប់ចាប់មេរៀនបាននោះ អ្នកត្រូវចូលសម្រាកឲ្យបានលឿនហើយក្រោកឲ្យលឿនដូចគ្នា។ អ្នកគួរតែបំភ្លេចចោលអ្វីៗទាំងអស់ ដែលនាំឲ្យអ្នកមិនអាចផ្ដោតអារម្មណ៍លើមេរៀនបាន តាមរយៈការបិទទូរស័ព្ទដៃចោលនិងទូរទស្សន៍ផងដែរព្រោះវាតែងធ្វើឲ្យអ្នកបែកអារម្មណ៍។
២) ជ្រើសរើសបរិយាកាសអំណោយផលដល់ការសិក្សាអ្នក៖ អ្នកគួរជ្រើសរើសយកកន្លែងណាដែលសក្ដិសម និងអំណោយផលដល់ការរៀនសូត្ររបស់អ្នក។ ក្នុងនោះវាអាចជា ទីកន្លែងមិនត្រូវអ៊ូអរពេក ចង្អៀតពេក ឬក៏ស្មុគពេកនោះទេ ។
៣) ត្រូវចេះប្រើប្រាស់តិចនិករៀនដែលល្អបំផុត៖ ការរៀនមិនមែនចេះតែរៀនឲ្យហើយហើយ នោះតែ។ អ្នកគប្បីមានតិចនិកដ៏ឆ្លាតវៃមួយសម្រាប់ខ្លួនឯង។ ក្នុងនោះអ្នកគួររៀនគូសចំណាំ កន្លែងសំខាន់ៗនៃមេរៀនសង្ខេបមេរៀនឡើងវិញ ឬក៏ព្យាយាមទន្ទេញមេរៀនដែលអ្នកបានរៀនហើយ។
៤) ត្រូវសម្រាកខ្លះ៖ ខួរក្បាលក៏ត្រូវការពេលវេលាសម្រាកដែរ។ ហេតុនេះ អ្នកគួរលៃលកពេលសម្រាប់ការសម្រាករបស់អ្នកផង។
៥) ឧស្សាហ៍សិក្សាជាក្រុម៖ ការសិក្សាជាក្រុមនេះក៏ជាឱកាសដ៏ល្អ ក្នុងការចែករំលែកចំណេះដឹងដល់គ្នា។ មិនត្រឹមតែប៉ុណ្ណោះទេ អ្នកក៏អាចពង្រឹងសមត្ថភាពរបស់អ្នកកាន់តែខ្លាំងតាមរយៈការបង្រៀនដល់អ្នកដទៃផងដែរ៕
ដោយ៖ ព្រំ សុវណ្ណកណ្ណិកា
