បើ​​គិត​ថា«​ធ្វើ​ការ​ផង​រៀន​ផង​គឺ​ពិបាក»ចូរ​​ធ្វើ​តាម​វិធីនេះ​​ដើម្បី​ផ្លាស់​ប្ដូរ​គំនិត​វិញ​​



និស្សិត​គ្រប់​រូប តែង​តែ​​គិត​ថា​ចង់​មាន​ការងារ​ធ្វើ​   ប៉ុន្តែ​ពួក​គេ​នៅ​ស្ទាក់ស្ទើរ​ចិត្ត​ហើយ​តែង​តែ​​ចោទ​សួរ​​​ខ្លួនឯង​ថា « តើ​ពួក​គេ​អាច​ធ្វើ​បាន​ឬ​ក៏​អត់​ខណៈ​ដែល​ការ​សិក្សា​នៅ​មិន​ទាន់​បញ្ចប់​នៅ​ឡើយ​?» ភាគ​ច្រើន​ពួក​គេ​លើក​ឡើង​ថា  ប្រហែល​ជា​ធ្វើ​មិន​បាន​ឡើយ។ តែ​ការ​គិត​បែប​នេះ​គឺ​ខុស​ស្រឡះ  បើ​អ្នក​អាច​ធ្វើ​តាម​វិធី​ខាង​ក្រោម​នេះ​  ជឿជាក់​ថាអ្នក​អាច​ធ្វើ​ការ​ផង​រៀន​ផង​ បាន​ដោយ​គ្មាន​បញ្ហា៖ 

១) ត្រូវ​ដឹង​ថា អ្នក​គួរ​ចាប់​ផ្ដើម​អ្វី​មុន​គេ​ហើយ​ចេះ​រៀប​ចំ​ពេលវេលា៖ ជំហាន​ដំបូង គឺ​​ការ​ដឹង​ថា​តើ​អ្នក​គួរ​ចាប់​ផ្ដើម​អ្វី​មុន​គេ​នោះ? តើ​ការងារ​ណា​ដែល​ចាំ​បាច់​ធ្វើ​ឲ្យ​រួចរាល់​មុន​គេ​? បន្ទាប់​មក​រៀប​ចំ​ពេលវេលា​ដែល​អ្នក​​នៅ​សល់​ដើម្បី​ធ្វើ​អ្វី​ផ្សេង​បន្ត​ទៀត​។ តើ​ពេល​ពី​ចន្លោះ​ណា​ដល់​ចន្លោះ​ណា​ដែល​អ្នក​ធ្វើ​ការ? ហើយ​ពេល​ពី​ចន្លោះ​ណា​ដល់​ចន្លោះ​ណា​សម្រាប់​ចំណាយ​លើ​ការ​សិក្សា ? 

២) មាន​ផែនការ​ច្បាស់លាស់​ខ្លាំង៖ ការ​ចេះ​រៀប​ចំ​ពេលវេលា ជាមួយ​នឹង​គម្រោង​ប្រចាំ​ថ្ងៃ ប្រចាំ​សប្ដាហ៍ ប្រចាំ​ខែ ថា​អ្នក​គូរ​តែ​ធ្វើ​អ្វី​គឺ​ពិត​ជា​សំខាន់​ខ្លាំង​ណាស់​។ វា​​ជា​ពន្លឺ​សម្រាប់​​បង្ហាញ​អ្នក​ឲ្យ​ដឹង​ថា តើ​អ្នក​គួរ​ធ្វើ​អ្វីមុន​​នឹង​ថ្ងៃ​ស្អែក​មក​ដល់។​

៣)  បើ​អាច​គួរ​សិក្សា ពេល​ចុង​សប្ដាហ៍​៖  សាកលវិទ្យាល័យ​មួយ​ចំនួន គឺ​ប្រាកដ​ជា​មាន​ថ្នាក់​សម្រាប់​​ចុង​សប្ដាហ៍ (ថ្ងៃ​សៅរ៍​និង​អាទិត្យ)​។ នេះ​ដោយ​សារ​តែ​ដឹង​ថា សិស្ស​មួយ​ចំនួន ច្បាស់​ជា​​​មាន​ការងារ​ធ្វើ​  ដែល​ជា​ហេតុ​​នាំ​ឲ្យ​ពួក​គេ​គ្មាន​ពេល​គ្រប់គ្រាន់​សិក្សា​ប្រចាំ​ថ្ងៃ​បាន។ ការ​ធ្វើ​បែប​នេះ​ ក៏​អ្នក​នៅ​តែ​អាច​បន្ត​ការ​សិក្សា ហើយ​អាច​មាន​ពេល​ច្រើន ផ្ដោត​លើ​​ការ​សិក្សា​ដែរ  ទោះ​បី​អ្នក​មាន​ការងារ​ក្ដី៕

ដោយ​៖ ព្រំ សុវណ្ណកណ្ណិកា

 

​​