វិធីសាស្រ្ត ៣ យ៉ាងក្នុងការចងចិត្តអតិថិជនរបស់អ្នកឲ្យក្លាយជាអតិថិជនស្មោះត្រង់​




គ្រប់​អាជីវកម្ម​មិន​ថា​សម្រាប់ប្រទេស​ណា​ ជន​ជាតិ​ណា​ទេ​​សុទ្ធ​តែ​មា​ន​បំណង​ចង់​ឲ្យ​អតិថិជនទាំង​អស់​​ក្លាយ​ជា​អតិថិជន​ស្មោះ​ត្រង់​។ តើអ្នកជា​ម្ចាស់​ក្រុម​ហ៊ុន​ ជា​អ្នក​ផលិត​ ជាអ្នក​លក់​បាន​បង្ហាញ​អ្វី​ខ្លះ​ដែល​ជា​ភាព​ស្មោះ​ត្រង់​ទៅ​ដល់អតិថិជន​វិញ​?


មិនមែន​​ប្រើ​ពេលមួយ​ថ្ងៃ​ ពីរ​ថ្ងៃ​ហើយ​ចង់​ឲ្យ​បាន​សម្រេច​ការ​ងារ​ធំ​បែប​នេះ​ទេ ក៏មិនមែន​អតិថិជន​​ទាំង​អស់​មិនទិញ​ផលិត​ផល​យើង​ម្តង អាច​ក្លាយ​ជា​អតិថិជន​ស្មោះ​ត្រង់​របស់​យើង​បាន​ដោយ​ងាយៗ​ដែរ។ ហេតុ​ដូចនេះ​ហើយ​គេ​ឃើញ​អាជីវកម្មជាច្រើន​ព្យាយាម​ធ្វើ​ប្រូ​ម៉ូសិន បន្ទាប់​ពី​ទិញ​មានថែម​ជូនសេវាកម្ម​នេះ សេវាកម្ម​នោះ ដើម្បីបំពេញ​ចិត្ត​អតិថិជនរបស់ពួកគេ។ ខាងក្រោមនេះគឺជាគន្លឹះ ៣យ៉ាង​ចង​ចិត្ត​អតិថិជន​ឲ្យ​នៅ​តែ​ជា​អតិថិជន​ស្មោះ​ត្រង់​នឹង​អាជីវកម្មរបស់អ្នក​៖

១) ​​​ឲ្យ​អតិថិជន​ចូល​ជាសមាជិក​ដើម្បី​ងាយស្រួល​ក្នុ​ងការ​បញ្ជា​ទិញ​ពេល​ក្រោយ
គិត​ចាប់​ពី​ការ​ទិញ​របស់​ញ៉ាំ ទំនិញប្រើប្រាស់ រហូត​ដល់​ការ​ធ្វើ​បដិសណ្ឋារកិច្ច អ្នក​ប្រើ​ប្រាស់ទាំងអស់​តែង​ចង់​បាន​ភាព​ងាយ​ស្រួល​រហ័ស​ និង​មិនស្មុគ​ស្មាញ។ ពេលអ្នក​ឲ្យ​អតិថិជន​ចូលជា​សមាជិក​នោះ​អាច​ជា​ការ​ផ្តល់​ជូននូវ​ការ​ទិញ​ក្នុង​តម្លៃ​ពិសេសណាមួយ ឬ​រាល់​ពេល​ទិញរបស់​គាត់​មិន​ចាំ​បាច់តម្រង់​ជួរ ឬ​ផ្តល់​ជូន​ជា​លក្ខណៈ​ពិសេស​អ្វី​បន្ថែម​ទៀត​ជូន​ពួកគេទាំងនោះ។ ពេលណា​ដែល​អតិថិជនរបស់អ្នកទទួល​បាន​ភាព​ងាយ​ស្រួល​ពី​ការលក់របស់អ្នក​ ជាក់​ណាស់​ថា​ពួកគេនឹងដក់​ចិត្ត​មិនចង់​ផ្លាស់​ប្តូរ​ទៅ​ទិញ​ផលិតផលពី​អ្នក​ផ្សេង​ដែល​មិន​ទាន់​ដឹងថានឹង​ផ្តល់​ជូន​ភាព​ងាយ​ស្រួល​ដល់​ពួកគេដូច​កន្លែង​ធ្លាប់​ទិញ​ឬទេ។​

២) ធ្វើ​ឲ្យ​​ដក់​អារម្មណ៍​ល្អជាមួយ​អ្នក
មិន​ខុស​ទេអ្នក​ប្រើ​ប្រាស់​អាចចំណាំ​បាន​ល្អ​ណាស់​ថា អ្នក​លក់​នៅហាង​មួយ​នេះ​ធ្លាប់​និយាយបែបណា​មកកាន់​អតិថិជន ណែ​នាំ​ពី​ផលិត​ផល​បាន​ច្បាស់​លាស់​ល្អ​ឬទេ សម្តី​អា​ក្រក់​គំរោះ​គំរើយ​ដាក់​អតិថិជន​ឬទេ ​រាក់​ទាក់​ភ្ញៀវ​ ឬ​មុខ​មិន​ឲ្យ​ក្រោយ​មិនបែរ? បើ​អ្នក​ប្រើ​ប្រាស់​ជា​មនុស្ស​ស្រី​វិញ​ទៀត​កាន់​តែ​ត្រូវ​ប្រុង​ប្រយ័ត្ន​កាន់​តែ​ខ្លាំង។ បើអ្នក​ទទួល​រាក់​ទាក់​គាត់​បាន​ល្អ​ ណែ​នាំ​ពី​ផលិត​ផល​ដល់​គាត់​បាន​ច្បាស់​ នោះ​សឹង​ថាអ្នក​មិន​ចាំ​បាច់​ខំ​លក់​បញ្ចុះ​តម្លៃ​ក៏អតិថិជនរបស់អ្នក​ទិញ​ដែរ បើ​ធៀប​នឹង​ហាង​ដែល​មាន​ការ​បញ្ចុះ​តម្លៃ​តែ​អ្នក​លក់​មិន​រាក់​ទាក់។ មួយ​វិញ​ទៀត​អា​ច​ឲ្យគាត់​ផ្តល់​ជា​មតិ​រិះគន់​ដើម្បី​កែ​លម្អ​ផលិ​តផល​ និង​បំពេញតាម​អ្វី​ដែល​អតិថិជនចង់​បាន (ស្របតាម​លក្ខខណ្ឌរបស់​ក្រុម​ហ៊ុន​ដូចគ្នា)​ នោះអតិថិជនរបស់អ្នក​រឹត​តែ​ពេញ​ចិត្ត​ព្រោះ​ពួកគេ​គិត​ថា​អ្នក​ជាអ្នកលក់​យល់​ពី​ចិត្ត ថ្លើម​របស់អតិថិជន។

៣) ការ​ចង​ចាំ​រាល់​ទិន្នន័យ​អតិថិជន​ ជា​គន្លឹះ​នៃ​ចំនេះ​ដឹង​និង​ភាពជោគជ័យ
វា​មិនខុសពី​កា​រ​ស្ទង់​មតិ​ទេ​ដើម្បី​ទទួល​បាន​ទិន្នន័យ​ព័ត៌មាន​របស់​អតិថិជន​។ ការ​ស្ទង់​មតិ​នេះ​អាចឲ្យ​យើងដឹងអតិថិជន​ត្រូវការ​ផលិត​ផល​ណា​ជាង​។ ចំនុច​នេះ​យើង​ផ្តោត​សំខាន់​លើ​ផលិ​តផល​ដែល​អ្នក​ប្រើ​ប្រាស់​មានតម្រូវការច្រើន ចង់​បាន​ច្រើន​ ខុស​ពី​ចំនុច​ទី​២ ខាង​លើ​ដែល​អនុញ្ញាត​អតិថិជន​បង្ហា​ញ​អារម្មណ៍​របស់​គាត់​លើផលិតផល លើ​ការ​ផ្តល់​សេវា​របស់​ក្រុម​ហ៊ុន​។ ទិន្ន​ន័យ​ដែលយើង​បាន​ពី​អតិថិជន​ពេល​នេះជា​គន្លឹះ​ដែលនាំ​ឲ្យ​អ្នកទទួល​បាន​អតិថិជន​ស្មោះ​ត្រង់​កាន់​តែ​ច្រើន​ ក៏​ជាគន្លឹះដឹក​ដៃ​​អ្នកទៅ​កាន់​ភាព​ជោគ​ជ័យ​អាជីវកម្ម​ដូចគ្នា។​​​៕

ដោយ៖ យ៉ាយ៉ា

X
5s