សញ្ញាណ ៧ នេះ បញ្ជាក់ថាអ្នកជាបុគ្គលិកមានឥទ្ធិពលជាងគេនៅកន្លែងការងារ
ពេលខ្លះអ្នកហាក់បីដូចជាមិនយល់ថា ហេតុអ្វីបានជាអ្នកសំបូរការងារធ្វើច្រើនជាងគេ? ឧស្សាហ៍ហៅឲ្យចូលប្រជុំញឹកជាងគេ? ចៅហ្វាយរិះគន់ណែនាំច្រើនជាងគេ? ទទួលខុសត្រូវការងារច្រើនជាងគេ? បើអ្នកតូចចិត្តទៅនឹងចៅហ្វាយរបស់អ្នកដោយសាររឿងទាំងនេះ អ្នកគួរតែពិចារណាបន្តិចថា នៅ ក្នុងក្រុមហ៊ុនមួយនៅពេលដែលអ្នកទទួលខុសត្រូវការងារកាន់តែធំ និងចេញមុខជាងបុគ្គលិកផ្សេងៗទៀត នោះមានន័យថា ក្រុមហ៊ុនផ្ដល់ទំនុកចិត្តមកលើអ្នកហើយ។
សាកពិនិត្យមើលចំណុចចំនួន ៧ ខាងក្រោមនេះបន្តិចមើល៍ថា តើអ្នកកំពុងជួបវាឬអត់នៅកន្លែងការងារ? ប្រសិនបើអ្នកកំពុងជួបសញ្ញាណទាំងនេះ វាអាចបញ្ជាក់បានថា អ្នកជាបុគ្គលិកមានឥទ្ធិពលជាងគេនៅកន្លែងការងារហើយ។
១. មនុស្សគ្រប់គ្នាចូលចិត្តជជែកជាមួយអ្នក
នេះមានន័យថា មនុស្សគ្រប់គ្នានៅក្នុងកន្លែងការងារចូលចិត្តជជែកនិយាយជាមួយអ្នក ឬសាកសួរពីនេះពីនោះ ជាពិសេសគឺសុំយោបល់ពីអ្នកនៅពេលដែលពួកគេមានបញ្ហាអ្វីមួយ។ ជាងនេះទៅទៀត ពួកគេត្រូវការឲ្យអ្នកជួយពួកគេ និងឲ្យតម្លៃនូវអ្វីដែលអ្នកនិយាយ។ អ្នកត្រូវបានមនុស្សគ្រប់គ្នាមើលមកថា ជាបុគ្គលម្នាក់ដ៏គួរឲ្យទុកចិត្តបំផុតដែលអាចផ្ដល់គំនិត ការប្រឹក្សា ឬដំបូន្មានប្រកបដោយវិជ្ជាជីវៈ។
២. ប្រធានរបស់អ្នកតែងសាកសួរ ឬសុំយោបល់ពីអ្នកនៅពេលត្រូវការជំនួយ
វាជាសញ្ញាណដ៏ល្អបំផុតមួយនៅពេលដែលសង្កេតឃើញថា ប្រធានរបស់អ្នកចង់បានយោបល់ផ្សេងៗចេញពីមាត់អ្នក។ អ្វីដែលសំខាន់ជាងនេះទៅទៀត គឺប្រធានរបស់អ្នកឧស្សាហ៍សុំឲ្យអ្នកបញ្ចេញមតិយោបល់នៅក្នុងកិច្ចប្រជុំសំខាន់ ឬលើកយកសម្ភីរបស់អ្នកទៅនិយាយនៅពីមុខក្រុមការងារ ហើយនិយាយសរសើរពីគំនិតរបស់អ្នកយ៉ាងពេញមាត់ជាដើម។
៣. រាល់សំណើរបស់អ្នកដែលបានធ្វើឡើងត្រូវបានយកចិត្តទុកដាក់បំផុតពីក្រុមការងារ
មិនចំពោះថាជាអ្វីក៏ដោយ រាល់ពេលដែលអ្នកដាក់សំណើឡើងដូចជា ស្នើសុំផ្លាស់ប្ដូរពេលវេលា កិច្ចប្រជុំ សុំជំនួយ ឬដាក់ចេញការសម្រេចចិត្តណាមួយ អ្នកគឺជាមនុស្សមានឥទ្ធិពលលើក្រុមការងារ ប្រសិនបើអ្នកបានធ្វើឲ្យសំណើទាំងនោះជារឿងសំខាន់ និងចាំបាច់ដែលក្រុមការងារត្រូវអនុវត្ត។ ក្រុមការងារដែលនៅជុំវិញអ្នកបានជឿជាក់លើការសម្រេចចិត្តរបស់អ្នក និងធ្វើវាប្រកបដោយការយកចិត្តទុកដាក់បំផុត។
៤. អ្នកទទួលបានភាពស្មោះត្រង់ និងមតិរិះគន់ស្ថាបនាដោយត្រង់ទៅត្រង់មកពីចៅហ្វាយរបស់អ្នក
បុគ្គលិកគ្រប់រូបអាចទទួលបានការអភិវឌ្ឍសមត្ថភាពតាមវិធីមួយ ឬច្រើនយ៉ាង។ ក៏ប៉ុន្តែសម្រាប់បុគ្គលិកដែលមានឥទ្ធិពលដូចជាអ្នក ចៅហ្វាយរបស់អ្នកនឹងព្យាយាមរកវិធីជាច្រើនដើម្បីតម្រង់ទិសអភិវឌ្ឍសមត្ថភាពរបស់អ្នកឲ្យកាន់តែ ប្រសើរឡើងជាបុគ្គលិកផ្សេងៗទៀត។ នេះអាចដូចជា បង្ហាញទំនុកចិត្តដល់អ្នក សរសើរលើកទឹកចិត្ត និងផ្ដល់មតិណែនាំកែលំអនៅពេលមានកំហុសកើតឡើង។
៥. អ្នកឧស្សាហ៍ត្រូវបានឲ្យចូលរួមប្រជុំសំខាន់ៗជាងបុគ្គលិកផ្សេងៗទៀត
អ្នកប្រហែលជាត្រូវបានស្នើឲ្យចូលទៅអង្គុយក្នុងបន្ទប់ប្រជុំសំខាន់ជាមួយចៅហ្វាយរបស់អ្នកច្រើនជាងបុគ្គលិកផ្សេងៗទៀតដែលមានតំណែងតួនាទីដូចជាអ្នក។ នេះជាសញ្ញាណយ៉ាងច្បាស់មួយបញ្ជាក់ថា អ្នកជាបុគ្គលិកសំខាន់។ ចៅហ្វាយ ឬ ថ្នាក់ដឹកនាំក្នុងក្រុមហ៊ុនចង់ឲ្យអ្នកបានដឹងពីគម្រោងការងារ និងអ្វីផ្សេងៗទៀតដែលកើតមាននៅក្នុងក្រុមហ៊ុន ហើយនឹងអាចផ្តល់អនាគតដ៏ល្អមួយសម្រាប់អ្នកដែលធ្វើការនៅទី នេះ។
៦. អ្នកមានសមត្ថភាពជាងក្រុមការងារផ្សេងទៀតដែលមានតំណែងដូចអ្នក
លទ្ធផលការងារគឺជារឿងសំខាន់ ដូចនេះបើអ្នកសង្កេតឃើញថា អ្នកសម្រេចបានលទ្ធផលល្អតាមផែនការ ឬលើសផែនការជាងបុគ្គលិកឯទៀត មានន័យថា អ្នកជាបុគ្គលិកដែលមានសក្ដានុពលហើយ។ អ្នកនឹងពិបាកគេចចេញពីក្រសែភ្នែកចៅហ្វាយរបស់អ្នកណាស់ ហើយការដំឡើងតំណែងតួនាទីឲ្យកាន់តែ ធំសម្រាប់អ្នក អាចនឹងត្រូវធ្វើឡើងនៅពេលឆាប់ៗទៀតផង។
៧. ធ្វើការគ្មានទំនេរដៃ
ជាថ្មីម្តងទៀត ភាពរវល់គ្មានពេលសម្រាកនៅកន្លែងការងារ មិនមែនជារឿងមួយដែលអ្នកចូលចិត្តបំផុតនោះឡើយ។ យ៉ាងណាមិញ នេះជាសញ្ញាណល្អមួយដែលបញ្ជាក់ថា អ្នកជាបុគ្គលិកមានការទទួលខុសត្រូវ ហើយត្រូវបានផ្តល់ទំនុក ចិត្តពីចៅហ្វាយនាយឲ្យមើលការខុសត្រូវលើការងារជាងបុគ្គលិកផ្សេងៗទៀត។ ចៅហ្វាយរបស់អ្នកយល់ថា អ្នកជាបុគ្គលិកសំខាន់ជាងគេ ដែលរួមចំណែកឲ្យលទ្ធផលការងារក្នុងក្រុមសម្រេចទៅបានយ៉ាងរលូន៕
ប្រភព៖ Businessinsider
