ហេតុផល៣យ៉ាង ឪពុកម្តាយគ្រប់រូបមិនគួរទម្លាប់ឲ្យលុយដល់កូនតូចៗច្រើនពេកនោះទេ!
គ្រប់ឪពុកម្តាយទាំងអស់ សុទ្ធតែចង់ឲ្យកូនៗរបស់ខ្លួនមានភាពរីករាយ តាមរយៈលុយកាក់ដែលរកបាន។ ក្នុងនោះ មានឪពុកម្តាយច្រើនបានផ្តល់លុយជាច្រើនដល់កូនៗរបស់ខ្លួន ដើម្បីទិញនេះទិញនោះ ក្នុងគោលបំណងបំពេញតម្រូវការជាក់ស្ដែង។ ប៉ុន្តែពេលខ្លះមិនមែនគ្រាន់តែបំពេញតម្រូវការចាំបាច់នោះទេ តែវាលើសពីតម្រូវការទៅហើយ ដែលនាំឲ្យមានផលអវិជ្ជមានលើផ្នត់គំនិត និង អាកប្បកិរិយាទៅវិញ។
មានហេតុផលសំខាន់ៗ៣យ៉ាងដែលឪពុកម្តាយមិនគួរទម្លាប់ឲ្យលុយច្រើនៗដល់កូនរបស់ខ្លួន ជាពិសេសនៅវ័យក្មេងតែម្តង៖
១) អ្វីចាំបាច់ និង អ្វីដែលចង់បាន៖ នៅពេលក្មេងៗមានលុយច្រើននៅក្នុងដៃ គឺពួកគេគ្មានថ្ងៃអាចយល់អំពីអ្វីដែលចាំបាច់ និង មិនចាំបាច់ឡើយ ពោលគឺផ្ដោតសំខាន់លើអ្វីដែលខ្លួនចង់បានប៉ុណ្ណោះ។ ប៉ុន្តែបើឪពុកម្តាយទម្លាប់ផ្តល់លុយតិចតួច ឬ សមល្មមនឹងបំពេញតម្រូវការណាដែលសំខាន់វិញ ប្រាកដណាស់ក្មេងៗទាំងនោះនឹងដឹងច្បាស់ថា អ្វីខ្លះដែលគួរយកលុយទៅទិញមុន ហើយអ្វីខ្លះដែលមិនគួរ។ នេះគឺជាមេរៀនដ៏សំខាន់បំផុតដែលលោកអ្នកមិនគួរមើលរំលង។
២) គំនិតសន្សំសំចៃ៖ គ្មានថ្ងៃណាដែលក្មេងៗតូចៗចេះគិតគូរ រឿងសន្សំលុយកាក់នោះទេ ដរាបណាពួកគេមានលុយហូរហៀរក្នុងដៃ ដែលប្រការនេះពិតជាផ្តល់ផលអវិជ្ជមានបំផុតសម្រាប់អនាគតរបស់ពួកគេ។ ប៉ុន្តែបើឪពុកម្តាយមិនទម្លាប់ឲ្យក្មេងៗទាំងនោះ មានលុយច្រើន ឬ ចាយលុយច្រើនទេនោះ ពួកគេនឹងដឹងច្បាស់អំពីសារសំខាន់នៃលុយ ហើយក៏ចេះសន្សំសំចៃដោយស្វ័យប្រវត្តិដែរ។
៣) ការតស៊ូ៖ មនុស្សដែលធ្លាប់តែមានលុយច្រើន និង រស់នៅយ៉ាងសុខស្រួលដោយសារតែការផ្គត់ផ្គង់គ្រប់យ៉ាងពីឪពុកម្តាយនោះ ពួកគេគឺគ្មានថ្ងៃដែលចេះតស៊ូក្នុងជីវិតនោះឡើយ។ នៅពេលដែលជួបការលំបាក និង ឧបសគ្គផ្សេងៗ ក្មេងៗប្រាកដមិនចង់ស៊ូទ្រាំបានឡើយ។ ប៉ុន្តែក្មេងៗទាំងឡាយណាដែល មិនត្រូវបានឪពុកម្តាយទម្លាប់ឲ្យចាយលុយច្រើនៗនោះ នឹងមានភាពតស៊ូក្នុងការជំនះឧបសគ្គជាង ដោយហេតុថាពួកគេធ្លាប់ជួបការលំបាក និង មានគំនិតពឹងលើសមត្ថភាពខ្លួនឯងជាជាង ពឹងលើតែលុយឪពុកម្តាយ៕
