ជំនាញទន់ (Soft Skill)សំខាន់ៗចំនួន ១៨ ដែលអ្នកដឹកនាំគេត្រូវមាន!
ជំនាញទន់ (Soft Skill) ត្រូវបានគេចាត់ទុកថា ជាជំនាញដ៏មានសក្ដានុពលមួយជាងជំនាញរឹង (Hard Skill) ទៅទៀត ហើយគេរំពឹងថា នៅពេលអនាគតវាកាន់តែត្រូវការជាចាំបាច់សម្រាប់អាជីពការងាររបស់មនុស្សម្នាក់ៗនៅពេលអនាគត។ សម្រាប់អ្នកដឹកនាំគេវិញ ជំនាញទន់កាន់តែចាំបាច់ទៅទៀត ជាពិសេសជំនាញសំខាន់ៗចំនួន ១៨ ខាងក្រោមនេះ៖
១. អ្នកដឹកនាំល្អ ជាមនុស្សដែលពូកែទំនាក់ទំនងម្នាក់ ហើយមនុស្សពូកែទំនាក់ទំនងមិនត្រឹមតែមានជំនាញក្នុងការបង្ហាញគំនិតមតិយោបល់ផ្ទាល់ខ្លួនប៉ុណ្ណោះទេ ប៉ុន្តែក៏ជាអ្នកពូកែស្តាប់ដ៏អស្ចារ្យម្នាក់ផងដែរ។
២. អ្នកដឹកនាំល្អត្រូវមានសមត្ថភាពក្នុងការទំនាក់ទំនងព្រោះវាមានភាពចាំបាច់ណាស់ក្នុងការបង្កើត និងរក្សាទំនាក់ទំនងរបស់អ្នកឲ្យកាន់តែរឹងមាំឡើង។
៣. អ្នកដឹកនាំល្អចេះប្រើប្រាស់ភាសាកាយវិការរបស់ខ្លួនយ៉ាងត្រឹមត្រូវពីព្រោះថា ជារឿយៗវាមានសារៈសំខាន់ជាងអ្វីដែលអ្នកកំពុងនិយាយទៅទៀត។
៤. អ្នកដឹកនាំល្អអាចផ្សព្វផ្សាយព័ត៌មានមិនល្អដោយភាពប៉ិនប្រសប់ និងការទទួលខុសត្រូវខ្ពស់ទៅកាន់មនុស្សក្រោមបង្គាប់ និងស្ថាប័នដែលពាក់ព័ន្ធ ព្រមទាំងផ្ដួចផ្ដើមឲ្យមានការចូលរួមស្វែងរកដំណោះស្រាយ។
៥. រៀននិយាយបដិសេធន៍ទៅសំណើ ឬគំនិតរបស់អ្នកណាម្នាក់តាមរយៈភាសាទំនាក់ទំនងបែបទន់ភ្លន់ ព្រមទាំងលើកឡើង ឬ បង្ហាញហេតុផលសមរម្យនៃការបដិសេធន៍របស់អ្នកទៅកាន់ពួកគេវិញ។
៦. អ្នកដឹកនាំល្អម្នាក់មានជំនាញប៉ិនប្រសព្វក្នុងការចរចានិងដឹងពីគន្លឹះស្វែងរកដំណោះស្រាយដ៏សមស្របមួយសម្រាប់មនុស្សគ្រប់គ្នា។
៧. ការបង្កើតទំនាក់ទំនងល្អជាមួយនិយោជិក និងមិត្តរួមការងារគឺជាភាពចាំបាច់មួយធ្វើឲ្យទំនាក់ទំនងរបស់អ្នកដឹកនាំល្អមានប្រសិទ្ធភាព។
៨. អ្នកដឹកនាំល្អហ៊ាននិយាយរិះគន់អ្នកដទៃក្នុងន័យស្ថាបនា និងដោយការគោរព ព្រមទាំងជំរុញឲ្យការរិះគន់នោះក្លាយទៅជាផលិតភាព។
៩. អ្នកដឹកនាំល្អត្រូវដឹងពីរបៀបដោះស្រាយជាមួយនិយោជិកដែលមានឥរិយាបថ និងអាកប្បកិរិយាមិនល្អដែលអាចបង្កអន្តរាយដល់ភាពរីកចម្រើននៅកន្លែងការងារ។
១០. អ្នកដឹកនាំល្អជាមនុស្សដែលមានភាពរោះរាយរាក់ទាក់ ស្និទ្ធស្នាល ប៉ុន្តែមិនបង្ហាញរឿងផ្ទាល់ខ្លួនច្រើនពេកទៅកាន់មនុស្សក្រោមបង្គាប់របស់ខ្លួនឡើយ។
១១. អ្នកដឹកនាំល្អត្រូវតែជាមនុស្សដែលអាចសម្របខ្លួនបានយ៉ាងឆាប់រហ័សទៅ នឹងការផ្លាស់ប្ដូរថ្មីៗ។
១២. ការទំនាក់ទំនងល្អមួយអាចឆ្លើយតបទៅនឹងមតិតទល់របស់អ្នកដទៃដោយមិនមានលក្ខណៈការពារតែអំណះអំណាងរបស់ខ្លួន។
១៣. អ្នកដឹកនាំល្អម្នាក់តែងទទួលយក និងឆ្លើយតបជានិច្ចចំពោះសំណើ រិះគន់ ឬការលើកឡើងរបស់បុគ្គលិក។
១៤. អ្នកដឹកនាំល្អ ទោះបីជាស្ថិតនៅក្នុងជម្លោះដ៏តានតឹងយ៉ាងណាក៏ដោយ ក៏នៅតែបង្ហាញឥរិយាបថដោយការគោរពចំពោះភាគីម្ខាងទៀតដែរ។
១៥. អ្នកដឹកនាំល្អចេះចាត់ចែងការងារឲ្យបានត្រឹមត្រូវទៅកាន់មនុស្សក្រោមបង្គាប់ ផ្តល់ពេលវេលា ធនធាន និងជួយស្វែងរកដំណោះស្រាយពេលមានឧបសគ្គកើតមានឡើង។
១៦. ការទទួលខុសត្រូវមួយក្នុងចំណោមការទទួលខុសត្រូវដ៏សំខាន់បំផុតបំផុតរបស់មេដឹកនាំល្អ គឺការកសាង និងរក្សាឲ្យបាននូវសុជីវធម៌ល្អនៅកន្លែងការងារ។
១៧. អ្នកដឹកនាំល្អទទួលស្គាល់សមត្ថភាពរបស់បុគ្គលិកក្រោមបង្គាប់ កោតសរសើរ និងផ្តល់រង្វាន់លើកទឹកចិត្តដល់កិច្ចខិតខំប្រឹងប្រែងរបស់ពួកគេ។
១៨. អ្នកដឹកនាំល្អ មិនបណ្តែតបណ្តោយឲ្យឥរិយាបថ ឬសកម្មភាពមិនល្អចូលមកបំផ្លាញវប្បធម៌នៃកិច្ច សហប្រតិបត្តិការល្អនៅក្នុងកន្លែងការងារឡើយ៕
ប្រភព៖ Businessinsider
