បើមានសញ្ញាណទាំង ៨នេះបញ្ជាក់ថា អ្នករៀនខុសជំនាញហើយ!
តើអ្នកមានអារម្មណ៍ថា អ្នកបានបង្កើតកំហុសជ្រើសរើសជំនាញមករៀនខុសដែរឬទេ? បើអ្នកឆ្លើយថា “មិនសោកស្តាយ” ហើយកំពុងសប្បាយចិត្តទៅនឹងលទ្ធផលដែលអ្នកបានសម្រេចចិត្តត្រឹមត្រូវក្នុងការជ្រើសរើសជំនាញរបស់អ្នក សូមចូលរួមអបអរផង។ ក៏ប៉ុន្តែបើចម្លើយថា ស្របទៅនឹងសំនួរនេះវិញ មានន័យថា អ្នកបានកសាងកំហុសធំៗមួយនៅក្នុងជីវិតមហាវិទ្យាល័យ។
ចុះសម្រាប់អ្នកកំពុងប្រឡូកក្នុងមហាវិទ្យាល័យវិញ ធ្វើម៉េចទើបដឹងថា ជំនាញដែលខ្លួនកំពុងរៀនខុសឬត្រូវ? ខាងក្រោមនេះជាសញ្ញាណមួយចំនួនដែលបញ្ជាក់ថា អ្នកកំពុងរៀនខុសជំនាញ៖
១) ទទួលបានលទ្ធផលមិនល្អ
តាមពិតទៅ លទ្ធផលមិនល្អវាមិនមែនមានន័យថា អ្នករៀនជំនាញខុសទេ។ ពិន្ទុ GPA របស់អ្នកល្អ ឬមិនល្អ វាអាស្រ័យលើកត្តាជាច្រើនដូចជា មុខជំនាញដែលអ្នករៀនជាជំនាញលំបាកស្រាប់ អ្នកមិនសូវខំរៀនតាំងពីតូចមក តម្រូវការរបស់សាលា សមត្ថភាពក្នុងការស្រាវជ្រាវនៅមានកម្រិតជាដើម។ ក៏ប៉ុន្តែបើអ្នកយល់ថា អ្នកប្រឹងប្រែងអស់ហើយនៅតែទទួលបានលទ្ធផលមិនល្អ នោះមានន័យថា អ្នកគួររៀនជំនាញអ្វីផ្សេងពីនេះដែលអ្នកយល់ថា អ្នកចាប់អារម្មណ៍ និងមានសមត្ថភាពខ្ពស់។
២) អ្នកមិនអាចពន្យល់បានថា ហេតុអ្វីអ្នកជ្រើសរើសជំនាញមួយនេះ
និស្សិតខ្លះបានធ្លាក់ចូលក្នុងអន្ទាក់នេះមិនដឹងខ្លួន រហូតដល់ចប់ឆ្នាំហើយនៅតែមិនអាចដឹងបានហេតុផលដែលខ្លួនត្រូវរៀនជំនាញនោះ។ រឿងដ៏ងាយយល់នៅទីនេះគឺថា បើអ្នកមិនអាចកំណត់បានមូលហេតុដែលអ្នកបានជ្រើសរើសជំនាញដែលអ្នកកំពុងរៀនទេ វាមានន័យថា អ្នកគ្មានមហិច្ឆតាដើម្បីធ្វើឲ្យជំនាញនោះក្លាយជាជំនាញដ៏ចាំបាច់បំផុតដើម្បីអនាគតអាជីពការងាររបស់អ្នកទេ។
៣) អ្នកមានអារម្មណ៍ថា ស្ត្រេសខ្លាំងពេលរៀនមុខជំនាញរបស់អ្នក
និស្សិតទាំងអស់មិនថា អ្នកពូកែ ឬរៀនខ្សោយនោះទេ គឺពេលខ្លះធុញថប់ទៅនឹងកិច្ចការស្រាវជ្រាវរបស់ខ្លួន។ ទោះបីជាអ្នកចូលចិត្តមុខវិជ្ជាទាំងនោះប៉ុណ្ណា អារម្មណ៍ធុញថប់ ឈឺក្បាល ឬស្ត្រេស្ត នឹងកិច្ចការស្រាវជ្រាវទាំងនោះ គឺនឹងកើតមានឡើងនៅក្នុងកាលៈទេសៈណាមួយ។ ក៏ប៉ុន្តែ អារម្មណ៍ទាំងនេះ វាមិនគួរជាអារម្មណ៍ស្ថិតនៅជាប់ហ្នឹងអ្នករហូតនោះទេ។ មុខជំនាញដែលអ្នករៀន គួរតែមុខជំនាញដែលអ្នកពេញចិត្តបំផុតបើទោះបីពេលខ្លះហត់នឿយបន្តិចក្តី។ ក៏ប៉ុន្តែបើអ្នកយល់ថា វាគ្មានអ្វីគួរឲ្យអ្នកចាប់អារម្មណ៍ក្រៅតែពីធ្វើឲ្យអ្នកធុញថប់ហើយនោះ មានន័យថា អ្នកកំពុងស្ថិតនៅក្នុងសញ្ញាណអវិជ្ជមានលើជំនាញដែលអ្នកកំពុងរៀនហើយ។
៤) ជ្រើសរើសជំនាញដោយសារតែស្រួលរៀន
ហេតុផលមួយតែមួយគត់ដែលនិស្សិតជាច្រើនបានសម្រេចជ្រើសរើសជំនាញណាមួយមកពីពួកគេយល់ថា វាជាចំណង់ចំណូលចិត្តរបស់ពួកគេ និងអាចរកចំណូលបានច្រើននៅពេលអនាគតជាដើម។ វាមិនមែនជារឿងខុសទេដែលអ្នកយល់ឃើញបែបនេះ។ ក៏ប៉ុន្តែបើហេតុផលដែលអ្នកជ្រើសរើសជំនាញណាមួយមករៀនដោយសារតែអ្នកយល់ថា វាងាយស្រួល នោះគឺជាការគិតខុស ហើយមានន័យថា អ្នកក៏កំពុងរៀនជំនាញខុសដែរ។ ការរើសជំនាញមករៀននៅក្នុងមហាវិទ្យាល័យ ទាមទារការខិតខំប្រឹងប្រែងឲ្យបានខ្លាំង ត្រូវការការស្រាវជ្រាវខ្ពស់ និងយកចិត្តទុកដាក់ឲ្យខ្លាំងបំផុត ព្រមទាំងមានមហិច្ឆតាធ្វើវាឲ្យបានល្អបំផុតដើម្បីអនាគតជីវិតរបស់អ្នកនៅពេលបញ្ចប់ថ្នាក់មហាវិទ្យាល័យទៅ។
៥) ជ្រើសរើសជំនាញតាមការបង្គាប់របស់ឪពុកម្តាយ
ការអនុញ្ញាតឲ្យឪពុកម្ដាយរបស់អ្នកគ្រប់គ្រងការសម្រេចចិត្តរបស់អ្នកក្នុងការជ្រើសរើសជំនាញណាមួយមករៀនទាំងខ្លួនអ្នកមិនសប្បាយចិត្ត គឺជាការបង្កើតបទពិសោធន៍គួរឲ្យសោកស្តាយមួយនៅក្នុងជីវិតមហាវិទ្យាល័យ។ ភាពយុត្តិធម៌មួយរបស់អ្នក គឺធ្វើយ៉ាងណាឲ្យអ្នកមានអារម្មណ៍ថា អ្នកសប្បាយរីករាយ មានចំណង់ចំណូលចិត្ត និងមានមោទកភាពក្នុងការរៀនជំនាញដែលអ្នកបានជ្រើសរើស។ យ៉ាងណាមិញ ប្រសិនបើជម្រើសរបស់អ្នកត្រូវបានឪពុកម្ដាយរបស់អ្នកកំណត់ វាស្មើនឹងអ្នកកំណត់ព្រំដែនភាពជោគជ័យរបស់អ្នកឲ្យនៅកន្លែងតូចចង្អៀតមួយដូច្នេះដែរ។
៦) យល់ថា ជំនាញដែលអ្នកកំពុងរៀនអាចរកប្រាក់ចំណូលបានច្រើន
ការមានក្តីសង្ឃឹមទុកជាមុនលើសក្ដានុភាពនៃជំនាញរបស់អ្នកនៅពេលអនាគតគឺជារឿងល្អបំផុតមួយ។ ប្រសិនបើអ្នកចាប់អារម្មណ៍រៀនជំនាញរបស់អ្នក ហើយអ្នកយល់ឃើញថា ជំនាញនេះនឹងជួយឲ្យអ្នកមានឱកាសច្រើននៅក្នុងទីផ្សារការងារ សូមបន្តរៀនជំនាញរបស់អ្នកចុះ! ក៏ប៉ុន្តែ អ្នកមិនគួរជ្រើសរើសជំនាញណាមួយមករៀនដោយសារតែវាជាការងាររកចំណូលបានច្រើនតែមួយមុខនោះទេ។ ជាការពិត វាជាការងារដែលធ្វើឲ្យអ្នករកលុយបាន។ ផ្ទុយមកវិញ ការបង្ខំខ្លួនឯងឲ្យរៀនជំនាញដែលខ្លួនមិនស្រលាញ់ និងគ្មានមហិច្ឆតាចង់រៀន អ្នកនឹងមានហានិភ័យខ្ពស់ប្រៀបដូចជាបង្ខំខ្លួនឯងឲ្យជិះកង់បញ្ច្រាសខ្យល់ ដូច្នេះដែរ។
៧) អ្នកនៅតែមើលមិនដឹងថា រៀនចប់ហើយទៅធ្វើអ្វី
និស្សិត ២នាក់ដែលរៀនជំនាញដូចគ្នាមិនប្រាកដថា រៀនចប់ហើយមានអនាគតល្អដូចគ្នានោះទេ។ អ្នកខ្លះអាចជោគជ័យតាមអ្វីដែលខ្លួនចង់បាន ខណៈអ្នកខ្លះទៀតធ្វើការនៅមុខជំនាញដែលខ្លួនមិនស្រលាញ់។ ដូចនេះ វាអាស្រ័យលើការខិតខំប្រឹងប្រែង ឱកាស ឬកាលៈទេសៈដែលផ្តល់ឲ្យ។ សម្រាប់អ្នកវិញ អ្នកត្រូវតែដឹងថា មុខជំនាញដែលអ្នករៀននេះ នឹងធ្វើឲ្យអ្នកមានជំនាញអ្វីមួយនៅពេលអនាគត។ អ្នកត្រូវដឹងថា តើជំនាញនេះធ្វើឲ្យអ្នកអាចសម្រេចបានក្តីសុបិនរបស់អ្នកដោយរបៀបណា? បើអ្នកនៅមានភាពស្រពិចស្រពិល ឬមើលមិនឃើញពីលទ្ធផលដែលអ្នកនឹងទទួលបានពីការរៀនជំនាញរបស់អ្នកទៅអនុវត្តក្នុងអាជីពការងាររបស់អ្នកទេនោះ អ្នកគួរពិចារណាឡើងវិញថា គួរបន្តឬអត់?
៨) ចាប់អារម្មណ៍លើជំនាញផ្សេងរបស់មិត្តភក្ដិជាងជំនាញដែលខ្លួនកំពុងរៀន
ជាទូទៅ បើអ្នកជ្រើសរើសជំនាញអ្វីមករៀនហើយមានន័យថា អ្នកស្រលាញ់ជំនាញនោះ។ យ៉ាងណាមិញ បើអ្នករៀនជំនាញទីផ្សារ ប៉ុន្តែស្រលាញ់ជំនាញវិស្វករដែលមិត្តភក្ដិរបស់អ្នកបានជ្រើសរើស នេះបញ្ជាក់ថា ជីវិតមហាវិទ្យាល័យរបស់អ្នកកំពុងមានបញ្ហា។ អ្នកត្រូវដាក់ចិត្តដាក់កាយក្នុងការរៀនសូត្រលើជំនាញរបស់អ្នកបើមិនដូច្នេះទេ អ្នកគួរជ្រើសរើសជំនាញថ្មីមករៀនតាមចំណង់ចំណូលចិត្តរបស់អ្នកប្រសើរជាង៕
ប្រភព៖ Businessinsider
