ជំនាញនៅក្នុងជីវិតដ៏មានតម្លៃចំនួន ៦ ដែលយុវជនគួររៀនសូត្រ
ខណៈដែលមនុស្សជាច្រើនយល់ថា ការអប់រំនៅក្នុងសាលាគឺជាវិធីល្អបំផុតមួយក្នុងការផ្តល់ចំណេះដឹងយ៉ាងច្រើនដល់អនាគតពួកគេ យុវជនទាំងអស់ក៏មិនគួរមើលរំលងជំនាញដ៏មានតម្លៃចំនួន ៦ នេះដែរត្បិតអីនៅក្នុងថ្នាក់រៀន វាមិនត្រូវបានគេបណ្តុះបណ្តាល ឬយកទៅបង្រៀនឲ្យបានទូលំទូលាយនោះឡើយ។
ដើម្បីទទួលបានជំនាញទាំងនេះតិចឬច្រើន និងមានប្រសិទ្ធភាពឬអត់ វាអាស្រ័យលើការខិតខំប្រឹងប្រែងរបស់អ្នកប៉ុណ្ណោះ។ អ្នកប្រហែលជាមិនទាន់មើលឃើញពីភាពចាំបាច់របស់វានោះទេនៅពេលនេះ។ ក៏ប៉ុន្តែក្នុងអនាគតយូរឬឆាប់ អ្នកនឹងដឹងថា វាពិតជាសំខាន់សម្រាប់អ្នក។ សូមចាប់ផ្តើមរៀនជំនាញទាំងនេះ ហើយស្វែងយល់មើល៍ថា អ្នកខ្វះជំនាញទាំងនេះឬអត់?
១.ការទទួលយកអ្វីដែលអ្នកមាន
ដោយសារតែនៅពេលបច្ចុប្បន្ននេះ មនុស្សម្នាក់ៗកំពុងរស់នៅក្នុងពិភពលោកមួយដែលលិចលង់ដោយរូបភាព និងសារគ្រប់ប្រភេទនៅក្នុងប្រព័ន្ធផ្សព្វផ្សាយដែលកំពុងព្យាយាមបញ្ចុះបញ្ចូលអ្នកឲ្យផ្លាស់ប្ដូរខ្លួនឯង នេះវាងាយធ្វើឲ្យអ្នកធ្លាក់ចូលក្នុងអន្ទាក់ទាំងនោះណាស់។ នៅពេលអ្នកកំពុងប្រឈមមុខទៅនឹងការផ្លាស់ប្ដូរខ្លួនឯង គ្មាននរណាម្នាក់អាចមកបង្រៀនអ្នកពីរបៀបឲ្យចេះរៀនទទួលយកនូវអ្វីដែលអ្នកមានឡើយ។
ការទទួលយកអ្វីដែលអ្នកមាន វាគឺជាការងារមួយផ្តើមចេញពីក្នុងខ្លួនអ្នក ហើយវាជាចេតនាមួយក្នុងការជ្រើសរើសខ្លួនឯងជាងអ្នកដទៃ។ សូមចាំថា សុភមង្គល និងសន្តិភាពផ្លូវចិត្តរបស់អ្នក គឺជារឿងអាទិភាពរបស់អ្នកលើមិត្តភក្ដិ ក្រុមគ្រួសារ និងពិភពលោកទាំងមូល។ នៅពេលដែលអ្នកមានបំណងទទួលយកនូវអ្វីដែលអ្នកមាន និងអ្វីដែលអ្នកចង់បាននៅលើលោកនេះ អ្នកនឹងចំណាយពេលពេញមួយជីវិតរបស់អ្នកដើម្បីរៀនពីរបៀបគោរពខ្លួនឯងមិនថា នៅផ្ទះ នៅកន្លែងការងារ និងកន្លែងផ្សេងៗទៀតនោះឡើយ។
២.ការមើលថែខ្លួនឯង
តើការមើលថែខ្លួនឯងគឺជាអ្វី? មនុស្សមួយចំនួនមើលថែខ្លួនឯងដោយទៅហាត់ប្រាណដើម្បីសុខភាព ធ្វើសមាធិ អានសៀវភៅ ឬធ្វើសកម្មភាពផ្សេងៗទៀតដែលធ្វើឲ្យខ្លួនសប្បាយចិត្ត។ ទោះបីជាបែបនេះក្តី គ្មានរូបមន្តជាក់លាក់ណាមួយដែលអាចយកទៅអនុវត្តសម្រាប់មនុស្សគ្រប់គ្នាបានឡើយ។ ការយកចិត្តទុកដាក់មើលថែខ្លួនឯងរបស់អ្នកប្រហែលអាចផ្សេងពីនេះ។ អ្នកប្រហែលចូលចិត្តមើលភាពយន្ត ជួបជុំមិត្តភក្ដិ ឬចូលចិត្តដើរកម្សាន្ត។ នេះមានន័យថា ដរាបណាអ្នកកាន់តែឆាប់រៀនស្វែងយល់ពីតម្រូវការដើម្បីធ្វើឲ្យជីវិតរបស់អ្នកស្រស់ស្រាយ និងធ្វើឲ្យខ្លួនឯងកាន់តែមានអារម្មណ៍ល្អ អ្នកនឹងកាន់តែឆាប់កាត់បន្ថយភាពតានតឹងក្នុងជីវិត។
៣.ការលើកលែងទោសឲ្យអ្នកដទៃ
ការរៀនលើកលែងទោសឲ្យអ្នកដទៃ គឺជាមេរៀនជីវិតមួយទៀតដែលអ្នកត្រូវរៀនសូត្រដោយខ្លួនឯង ។ គ្មានអ្នកណាម្នាក់មកពន្យល់អ្នកថា ហេតុអ្វីអ្នកចាំបាច់ត្រូវអភ័យទោសឲ្យ អ្នកដទៃនោះទេ។ មនុស្សមួយចំនួនអាចប្រាប់អ្នកថា ការអភ័យទោសអនុញ្ញាតឲ្យអ្នកដោះលែងខ្លួនឯងពីកំហឹង និងការអាក់អន់ចិត្តនៅក្នុងខ្លួន ជួយរក្សាទំនាក់ទំនងឲ្យបានល្អប្រសើរ ឬដើម្បីបង្ហាញការអាណិតអាសូរ និងការយោគយល់ចំពោះអ្នកដទៃជាដើម។
ក៏ប៉ុន្តែនៅពេលអ្នកស្ថិតនៅក្នុងស្ថានភាពមួយដែលអ្នកយល់ថា គួរលើកលែងទោសឲ្យអ្នកណាម្នាក់ វាមានការលំបាកសម្រាប់អ្នកទោះបីជាអ្នកមានហេតុផលត្រឹមត្រូវមួយដើម្បីលើកលែងទោសក៏ដោយ។ យ៉ាងណាមិញ អ្នកត្រូវតែរៀនមេរៀនមួយនេះ បើទោះបីជាអ្នកឈឺចាប់ ឬលំបាកខ្លាំងក៏ដោយ។ វាជាមេរៀនជីវិតដ៏ល្អ ពីព្រោះបុគ្គលិកលក្ខណៈមួយនេះគឺជាមូលដ្ឋានគ្រឹះមួយដែលឆ្លុះបញ្ចាំងថា អ្នកជាមនុស្សមានសុទិដ្ឋិនិយមមើលឃើញវែងឆ្ងាយខុសពីមនុស្សធម្មតា។
៤.សិល្បៈនៃការរៀនសូត្រ
សាលារៀន មិនមែនមនុស្សគ្រប់គ្នាអាចចូលរៀនបានទេ។ នៅពេលអ្នកសម្លឹងមនុស្សជុំវិញអ្នក អ្នកនឹងដឹងថា មនុស្សគ្រប់គ្នាមិនអាចបង្រៀនអ្នកថា តើអ្នកចាំបាច់ត្រូវរៀនដោយវិធីណាទេ? អ្នកខ្លះរៀនតាមរយៈការធ្វើការ។ អ្នកខ្លះទៀតរៀនតាមរយៈការអាន ស្តាប់ ទស្សនា សរសេរ ឬវិធីផ្សេងៗទៀតដែលពួកគេបានពើបប្រទះនៅក្នុងជីវិតប្រចាំថ្ងៃ។ អ្នកអាចរៀនតាមរយៈគ្រូបង្រៀន ឬការចូលរួមសិក្ខាសាលា។ វិធីរៀនសូត្រមិនដូចគ្នាទេ។ ក៏ប៉ុន្តែគោលដៅនៃការរៀនសូត្រគឺថា បើអ្នកចាប់ផ្តើមរៀនកាន់តែឆាប់កាលណា អ្នកនឹងឆាប់ជោគជ័យមិនថារៀននៅសាលា ក្នុងអាជីពការងារ ឬក្នុងជីវិតរបស់អ្នកនោះទេ។
៥.ការរស់នៅប្រកបដោយវិចារណញ្ញាណ
មួយនាទីដែលអ្នកចំណាយដើម្បីរៀនស្តាប់ពីតម្រូវការផ្នែករាងកាយរបស់អ្នក មានន័យថា អ្នកយកចិត្តទុកដាក់ធ្វើឲ្យជីវិតរបស់អ្នកល្អប្រសើរឡើង។ នៅពេលអ្នកមានអារម្មណ៍ថា អ្នកត្រូវការទឹកមួយកែវ ហេតុអ្វីអ្នកមិនអើពើនឹងអារម្មណ៍នៃតម្រូវការមួយនេះ? បើអ្នកកំពុងធ្វើអ្វីមួយ អ្នកគួរឈប់មួយភ្លែតសិនទៅ ហើយប្រញាប់ទៅយកទឹកមួយកែវមកទទួលទានទៅ។ ប្រសិនបើអ្នកកំពុងមានអារម្មណ៍ធុញថប់ វាអាស្រ័យទៅលើអ្នកថា តើអ្នកគួរផ្អាក ឬបន្តធ្វើការងារដ៏គួរឲ្យធុញថប់ទាំងនោះ? ការរស់នៅប្រកបដោយវិចារណញ្ញាណ គឺជាមធ្យោបាយចុងក្រោយដើម្បីធ្វើឲ្យអ្នកមានភាពរីករាយនឹងជីវិតយ៉ាងពិតប្រាកដសម្រាប់ខ្លួនឯង និងតម្រូវការរបស់អ្នក។
៦.មានទំនុកចិត្តលើខ្លួនឯង
អតីតអ្នកនយោបាយអាមេរិកដ៏ល្បីល្បាញរបស់អាមេរិកគឺលោកស្រី Eleanor Roosevelt ធ្លាប់បានមានប្រសាសន៍ថា “គ្មានអ្នកណាអាចធ្វើឲ្យអ្នកមានអារម្មណ៍ថា អ្នកជាមនុស្សអន់ប្រសិនបើគ្មានការយល់ព្រមពីអ្នក”។ នេះជាប្រសាសន៍ដ៏ត្រឹមត្រូវមួយ។ ទំនុកចិត្តកើតចេញពីខ្លួនអ្នក។ ប៉ុន្តែគួរឲ្យស្តាយ គ្មាននរណាម្នាក់មកបង្រៀនអ្នកថា តើអ្នកត្រូវរៀនបណ្ដុះទំនុកចិត្តរបស់អ្នកឲ្យខ្លាំងក្លាឡើងតាមរបៀបណានោះទេ? នេះហើយជាភាពចាំបាច់មួយដែលបញ្ជាក់ថា អ្នកត្រូវរៀនពីអ្វីដែលអ្នកត្រូវការ ឬអ្វីដែលអ្នកចង់ធ្វើដែលធ្វើឲ្យ អ្នកមានអារម្មណ៍ថា អ្នកគឺជាមនុស្សតែម្នាក់គត់ដែលជាកាពីទែន (អ្នកដឹកនាំ) ជីវិតរបស់អ្នក៕
ប្រភព៖ Businessinsider
