៦ចំណុច បញ្ជាក់ថា គំនិតអាជីវកម្មរបស់អ្នកពិតជាល្អ ហើយនឹងជោគជ័យមិនខាន
ពេលខ្លះអ្នកនៅមានការស្ទាក់ស្ទើរនៅឡើយសម្រាប់ការធ្វើជំនួញរបស់អ្នក ពីព្រោះថាអ្នកមិនហ៊ានជឿជាក់ទៅលើគំនិតរបស់ខ្លួនឯង។ នេះជាវិធីសម្រាប់យល់ដឹងបន្ថែមទៀតថាតើអ្នកមានគំនិតគ្រប់គ្រាន់ឬនៅក្នុងការរកស៊ី៖
១) ជំនួញនោះអាចដោះស្រាយបញ្ហាសង្គមកម្រិតណា៖ ដើម្បីជោគជ័យក្នុងការធ្វើជំនួញត្រូវតែប្រាកដថា អាជីវកម្មនោះអាចដោះស្រាយបញ្ហាដែលកំពុងតែកើតឡើងនៅក្នុងសង្គម ព្រោះថាបច្ចុប្បន្ននេះ មនុស្សមានបញ្ហាជាច្រើនដែលពួកគេត្រូវការដោះស្រាយ។ ដូច្នេះបើអាជីវកម្មរបស់អ្នក អាចផ្ដល់ដំណោះស្រាយរបស់មនុស្សភាគច្រើនក្នុងសង្គមនោះ មានន័យថា គំនិតអាជីវកម្មនេះនឹងទទួលបានជោគជ័យ នៅពេលដំណើរការ។
២) តើអ្នកប្រាកដចិត្តជាមួយទិសដៅអ្នកឬនៅ ៖ ការប្រាកដប្រជាជាមួយទិសដៅអ្នកពិតជាសំខាន់ណាស់។ អ្នកមិនអាចចេះតែគិតពីគោលដៅនេះឬគោលដៅនោះបានតាមតែចិត្តនោះទេ។ ត្រូវដឹងច្បាស់ថា ផ្លូវណាដែលត្រូវដើរ ហើយពេលជួបបញ្ហា គួរដោះស្រាយដោយវិធីណាទើបជាការប្រសើរ។
៣) ផ្សព្វផ្សាយមុខជំនួញរបស់អ្នកដោយវិធីណា៖ សហគ្រិនមួយចំនួនតែងគិតពីដំណោះស្រាយសម្រាប់បញ្ហាអាជីវកម្មរបស់ខ្លួន តែមិនបានគិតអំពីការផ្សព្វផ្សាយអាជីវកម្មខ្លួនទៅកាន់អតិថិជនទេ។ ប្រសិនបើអ្នកមានផលិតផលល្អប្រសើរហើយតែអ្នកមិនចេះនាំយកផលិតផលទាំងនោះទៅកាន់អ្នកដទៃបានទេ វាប្រាកដជាពិបាកជោគជ័យបន្តិចហើយ។
៤) តើអ្នកពេញចិត្តទទួលយកយោបល់ដែរឬទេ៖ ប្រសិនបើអ្នកមិនបើកចំហទទួលយកគំនិតអភិវឌ្ឍន៍ដើម្បីបំពេញចិត្តភ្ញៀវរបស់អ្នកទេ ជំនួញអ្នកនឹងមិនជោគជ័យឡើយ ។
៥) តើអ្នកធ្លាប់សាកល្បងគំនិតរបស់អ្នកទេ៖ អ្នកមិនអាចសម្រេចជោគជ័យបានទេប្រសិនបើអ្នកមិនសាកល្បងវាជាមុន។ អនុវត្តវាជាមួយដៃគូសហការដែលស្មោះត្រង់ដែលហ៊ានផ្ដល់យោបល់ពិតៗសម្រាប់កែប្រែអ្នក។
៦) តើអ្នកដាក់ចិត្តអនុវត្តវាគ្រប់គ្រាន់ឬនៅ៖ អ្នកត្រូវការពេលវេលាច្រើនណាស់សម្រាប់ការធ្វើជំនួញដូច្នេះអ្នកត្រូវប្រាកដថាអាចដាក់ចិត្តដាក់កាយធ្វើវាអោយទទួលបានជោគជ័យ ជាមួយការអត់ធ្មត់ឲ្យបានខ្ពស់បំផុត៕
ប្រែសម្រួល៖ ព្រំ សុវណ្ណកណ្ណិកា
ប្រភព៖ www.businessnewsdaily.com
