កំហុស ៩ របស់ចៅហ្វាយ អាចបំផ្លាញបុគ្គលិកល្អៗដោយមិនដឹងខ្លួន
ដើម្បីធ្វើជាអ្នកគ្រប់គ្រងល្អម្នាក់ វាមិនមែនជារឿងមួយងាយស្រួលទេ។ តំណែងមួយនេះទាមទារឲ្យអ្នកមានចំណេះដឹងភាពជាអ្នកដឹកនាំទូលំទូលាយ ចេះគ្រប់គ្រងមនុស្ស និងមានក្រមសីលធម៌ខ្ពស់ប្រកបដោយវិជ្ជាជីវៈជាដើម បើមិនដូច្នេះទេ អ្នកមិនអាចដឹកនាំក្រុមការងារទាំងមូលឲ្យសម្រេចគោលដៅបានឡើយ។ ពេលខ្លះទោះបីជាអ្នកមានសមត្ថភាពដឹកនាំក៏ពិតមែន ក៏ប៉ុន្តែកំហុសមួយចំនួនដែលអ្នកភ្លេចគិត អាចបំផ្លាញបុគ្គលិកល្អរបស់អ្នកបាន។ សូមពិនិត្យមើលកំហុស ៩ខាងក្រោមនេះ ថាតើអ្នកមានចំណុចទាំងនេះដែរឬអត់?
១.បើកប្រជុំដែលមិនចាំបាច់
ការប្រជុំត្រូវការបង្កើតគុណតម្លៃសម្រាប់បុគ្គលិកដូចជាការបង្កើតថ្មី ភាពច្នៃប្រឌិត ផ្ដល់មតិយោបល់មុននឹងឈានដល់ការសម្រេចចិត្តសំខាន់ៗ ឬសម្រាប់សម្របសម្រួលការងារជាដើម។ ហេតុដូច្នេះ បើការប្រជុំរបស់អ្នកគ្រាន់តែធ្វើដើម្បីអ្វីផ្សេង អ្នកគួររំលងវាចោលល្អប្រសើរជាង។
២.ផ្ដល់ការទំនាក់ទំនងការងារដែលគ្មានភាពច្បាស់លាស់
សម្រាប់គម្រោងការងារដែលអ្នកដាក់ឲ្យពួកគេបំពេញ អ្នកត្រូវច្បាស់លាស់ថា វាចប់នៅពេលណា។ សូមប្រាប់ពីកាលបរិច្ឆេទឲ្យបានច្បាស់លាស់។ ដូចនេះនៅ ពេលអ្នកដាក់ការងារឲ្យពួកគេធ្វើ អ្នកត្រូវផ្ដល់ព័ត៌មានលម្អិតបន្តិចឲ្យពួកគេបានដឹង ជៀសវាងធ្វើឲ្យពួកគេមានការភ័ន្តច្រឡំ ឬមានភាពមន្ទិលសង្ស័យក្នុងចិត្ត។
៣.ផ្ដល់ព័ត៌មានច្រើនពេក
វាជារឿងសំខាន់ណាស់ដើម្បីផ្តល់ព័ត៌មានត្រឹមត្រូវសម្រាប់បុគ្គលិក។ ក៏ប៉ុន្តែការផ្ដល់ព័ត៌មានដែលច្រើនហួសហេតុពេក ជាពិសេសព័ត៌មានដែលមិនចាំបាច់ ឬគ្មានប្រយោជន៍ អាចធ្វើឲ្យបុគ្គលិកក្រោមបង្គាប់របស់អ្នកឈឺក្បាលទៅវិញទេ។ វាមិនត្រឹមតែបំផ្លាញពេលវេលារបស់ពួកគេដើម្បីធ្វើការងារដែលសំខាន់ប៉ុណ្ណោះទេ ថែមទាំងធ្វើឲ្យផលិតភាពការងាររបស់ពួកគេធ្លាក់ចុះទៀតផង។
៤.ឆ្លើយតបបានតិច ហើយយឺត
នៅពេលបុគ្គលិកក្រោមបង្គាប់របស់អ្នកមានសំនួរ ឬសំណើមកអ្នក សូមកុំរំលងវារង់ចាំរហូតដល់អ្នកមានពេលដើម្បីឆ្លើយតប។ រៀនពីរបៀបឆ្លើយតបទៅកាន់ពួកគេវិញដោយភាពរហ័សបំផុតទៅតាមអាទិភាព ទើបបង្ហាញថា អ្នកយកចិត្តទុកដាក់ និងឲ្យតម្លៃពួកគេ។ ប្រសិនបើអ្នកបានឃើញសាររបស់ពួកគេ ហើយអ្នកមិនអាចឆ្លើយតបបានភ្លាមៗទេនោះ អ្នកគួរកំណត់ពេលឲ្យបានច្បាស់លាស់ថា អ្នកនឹងឆ្លើយតបទៅវិញនៅពេលណា។
៥.ព្យាយាមគ្រប់គ្រងសព្វគ្រប់បែបយ៉ាងទាំងអស់
ការព្យាយាមគ្រប់គ្រងអ្វីៗគ្រប់សព្វបែបយ៉ាងទៅលើការងារ តួនាទី និងទំនួលខុសត្រូវទាំងអស់របស់បុគ្គលិក មិនមែនជាគោលការណ៍អ្នកដឹកនាំល្អទេ។ ការធ្វើបែបនេះមានតែធ្វើឲ្យផលិតភាព ភាពច្នៃប្រឌិត និងគុណភាពការងាររបស់ពួកគេក្រិនកន្តឿតែប៉ុណ្ណោះ។ វិធីដ៏ល្អបំផុតមួយគឺអ្នកត្រូវចេះផ្ទេរភារកិច្ច និងផ្ដល់សេរីភាពការងារឲ្យពួកគេរៀនទទួលខុសត្រូវរៀងៗខ្លួនដើម្បីបង្កើនសមត្ថភាពការងាររបស់ពួកគេ។
៦.ដឹកនាំក្រុមការងារដោយប្រើអារម្មណ៍ដឹកមុខ
ការដឹកនាំក្រុមការងារដោយធ្វើតាមអារម្មណ៍ច្រើនពេកនៅកន្លែងការងារ វាបានត្រឹមតែធ្វើឲ្យមានផលប៉ះពាល់ដល់ក្រុមការងារតែប៉ុណ្ណោះ។ ក្រុមការងារនឹងមានបញ្ហាក្នុងការទំនាក់ទំនងការងារប្រសិនបើពួកគេសង្កេតឃើញថា អ្នកដឹកនាំរបស់ពួកគេមិនចេះគ្រប់គ្រងអារម្មណ៍ឲ្យបានល្អ។ ក្នុងនាមជាអ្នកដឹកនាំម្នាក់ទោះបីជាមានបញ្ហាអ្វីកើតឡើងក៏ដោយ អ្នកមិនគួរបណ្ដែតបណ្ដោយអារម្មណ៍របស់អ្នកមកគ្រប់គ្រងអ្នកឡើយ។ សូមប្រើអារម្មណ៍របស់អ្នកដោយភាពវ័យឆ្លាត និងប្រកបដោយវិជ្ជាជីវៈ។
៧.រារែកច្រើន
ភាពរារែកនឹងកើតមានឡើងនៅពេលដែលអ្នកមានជម្រើសច្រើន ហើយមិនដឹងថា ជម្រើសណាមួយល្អបំផុតសម្រាប់អ្នកក្នុងការសម្រេចចិត្ត។ ក្នុងនាមជាអ្នកដឹកនាំ បុគ្គលិកក្រោមបង្គាប់របស់អ្នកនឹងស្វែងរកជំនួយពីអ្នកទាំងការដឹកនាំការងារ ការគ្រប់គ្រង និងការសម្រេចចិត្តដ៏ច្បាស់លាស់របស់អ្នក។ ហេតុដូច្នេះហើយ ការសម្រេចចិត្តដ៏ច្បាស់លាស់មួយត្រូវតែធ្វើឡើងដើម្បីអនុញ្ញាតឲ្យក្រុមការងារអនុវត្តតាមការសម្រេចចិត្តរបស់អ្នក។
៨.ឧស្សាហ៍ផ្លាស់ប្ដូរញឹកញាប់
អ្នកដឹកនាំដែលឲ្យតម្លៃទៅលើគំនិតថ្មីៗរបស់បុគ្គលិក ហើយឧស្សាហ៍ផ្លាស់ប្ដូរគំនិតនោះជារឿយៗ ក៏ជាបញ្ហាធំមួយដែរ។ នៅពេលអ្នកឲ្យតម្លៃទៅលើគំនិតផ្ដួចផ្ដើមណាមួយ ហើយអ្នកបានផ្លាស់ប្ដូរវាវិញដោយមិនបានផ្តល់ពេលវេលាដើម្បីអនុវត្តវាទេនោះ អ្នកនឹងធ្វើឲ្យបុគ្គលិករបស់អ្នកមានភាពមន្ទិលសង្ស័យលើសមត្ថភាព ចក្ខុវិស័យ និងការគ្រប់គ្រងធនធានរបស់អ្នក។ សូមចាំថា នៅពេលដែលអ្នកអនុវត្តអ្វីដែលថ្មី អ្នកត្រូវធ្វើឲ្យវាដំណើរការឡើង។ កុំផ្លាស់ប្ដូរចិត្តនៅ ពេលអ្នកសម្រេចចិត្តរួចហើយ។
៩.រិះគន់ដោយគ្មានការកោតសរសើរ
គ្មានបុគ្គលិកណាម្នាក់ដែលគ្មានកំហុសនោះទេ ហើយវាជារឿងងាយស្រួលដើម្បីចាប់កំហុសពួកគេ។ ក្នុងនាមជាអ្នកដឹកនាំ អ្នកមិនត្រូវឆក់ឱកាសនៅពេលដែលពួកគេកំពុងមានកំហុសដើម្បីរិះគន់បន្ទោសបង្អាប់នោះឡើយ។ អ្នកត្រូវរិះគន់ស្ថាបនា កែប្រែ និងលើកទឹកចិត្តពួកគេខិតខំបំពេញការងារល្អប្រសើរទៅមុខ ទៀត៕
ដោយ៖ ខេវិន
ប្រភព៖ Businessinsider
