ការស្រាវជ្រាវ៖ ធ្វើការច្រើនហួសហេតុពេកអាចបណ្ដាលឲ្យអ្នកកើតជំងឺដាច់សរសៃឈាមខួរក្បាល
អ្នកស្រាវជ្រាវបានបង្ហាញថាបុគ្គលិកដែលធ្វើការច្រើនជាង៥៥ម៉ោងក្នុងមួយសប្ដាហ៍អាចមានអត្រាកើតជំងឺដាច់សរសៃឈាមរហូតទៅដល់៣៣% ។ រីឯអត្រាកើតជំងឺបេះដូងវិញមានទៅដល់១៣% ដែលការសិក្សានេះបានមកពីបុគ្គលិក៦ម៉ឺននាក់នៅអាមេរិកខាងជើង ប៉ែកអឺរ៉ុប និងអូស្ត្រាលីជាដើម។ នេះបើយោងតាមThe Lancet ដែលមានជំនាញផ្នែកស្រាវជ្រាវសុខភាព។
តាមការសិក្សាបាននិយាយថា មានមនុស្សមួយចំនួនចំណាយពេលធ្វើការច្រើនម៉ោងដោយសារក្រុមហ៊ុនតម្រូវឲ្យខ្លួនធ្វើ ឯមួយចំនួនទៀតមិនចូលចិត្តទុកឲ្យខ្លួននៅទំនេរគឺពួកគេធ្វើនេះ ធ្វើនោះមិនសម្រាកឡើយ។
យ៉ាងណាមិញ នៅពេលដែលពួកគេរវល់ ពួកគេមិនសូវជាបានផ្ដោតអារម្មណ៍ទៅលើសុខភាពរបស់ខ្លួនឯងប៉ុន្មាននោះទេ។ ជាទូទៅកាលដែលមមាញឹកបំពេញការងារ បានធ្វើឲ្យយើងមានបញ្ហាចំពោះរបបអាហាររបស់ខ្លួនយើងផ្ទាល់ផងដែរ។
អ្នកគួរតែពិនិត្យទៅលើការចំណាយពេលធ្វើការងាររបស់អ្នក និងសុខភាពរបស់អ្នក ធ្វើយ៉ាងណាឲ្យវាមានតុល្យភាពរវាងគ្នានឹងគ្នា ព្រោះបើមិនពុំនោះទេអ្នកអាចនឹងមានភាពស្ដាយក្រោយទៅថ្ងៃមុខ៕
ដោយ៖ តូច ម៉ាយ៉ារស្មី
