អ្វីជាភាពខុសគ្នារវាង "លុយ" និង "រូបិយប័ណ្ណ"?
មនុស្សជាច្រើនតែងមានការយល់ច្រឡំថាក្រដាសប្រាក់ដែលពួកគេតែងតែប្រឹងប្រែងប្រមូលមកទុកក្នុងហោប៉ៅដោយចំណាយពេលវេលានិងញើសឈាមក្នុងមួយថ្ងៃៗយ៉ាងសស្រាក់សស្រាំ ក៏ដើម្បីតែសម្រេចនូវគោលបំណងក្នុងជីវិតដែលជាសេរីភាពហិរញ្ញវត្ថុនេះ គឺជាលុយ។ ដូច្នេះហើយអ្វីដែលអ្នកចាំបាច់ត្រូវដឹងនោះគឺថា តើអ្វីជាភាពខុសគ្នារវាង "លុយ" និង "រូបិយប័ណ្ណ" ? ក្រដាសប្រាក់ ដែលអ្នកកំពុងតែចាយនិងប្រឹងរករាល់ថ្ងៃនេះ គេហៅថា "រូបិយប័ណ្ណ" (currency)។
អ្វីដែលសម្គាល់លក្ខណៈរបស់រូបិយប័ណ្ណគឺនៅត្រង់ ដោយប្រើប្រាស់អត្រាប្ដូរប្រាក់ជាសកល អ្នកអាចប្ដូរប្រាក់រៀលទៅដុល្លារ ឬប្រាក់ដុល្លារទៅផោនជាដើម។ វាមានមាត្រដ្ឋានកំណត់ ដូចមានលេខដែលជាចំនួនកំណត់ទឹកលុយនៅលើសន្លឹកក្រដាសនីមួយៗ។ វាក៏អាចយកតាមខ្លួនបាន។ ប៉ុន្តែរូបិយប័ណ្ណឬក្រដាសប្រាក់នេះ មិនមានតម្លៃឋិតថេរជាយូរអង្វែងនោះទេ។ អតិផរណារបស់ក្រដាសប្រាក់ប្រទេសមួយអាចនឹងប្រឈមហានិភ័យគ្រប់ពេល ប្រសិនជារាជរដ្ឋាភិបាលចាប់ផ្ដើមបោះពុម្ពក្រដាសប្រាក់ច្រើន។ របស់ដែលមានច្រើន វានឹងងាយស្រួលរក ដូច្នេះតម្លៃរបស់វាក៏នឹងថយចុះ ដែលធ្វើឲ្យបាត់បង់តម្លៃរបស់វា។
យ៉ាងណាមិញ "លុយ" (money) ដែលអ្នកធ្លាប់តែគិតថាជាក្រដាសប្រាក់នោះ គឺជាកាក់មាស និងកាក់ប្រាក់ទៅវិញទេ។ ប្រៀបជាមួយនឹងរូបិយប័ណ្ណ លក្ខណៈរបស់លុយក៏មិនខុសគ្នាប៉ុន្មានដែរ ប៉ុន្តែអ្វីដែលធ្វើឲ្យវាខុសគ្នាគឺនៅត្រង់ លុយមានតម្លៃរបស់វាជាយូរអង្វែង មានន័យថាបើរូបិយប័ណ្ណ៥០០០ពាន់រៀលអាចឲ្យអ្នកឆ្អែតបានមួយពេលយ៉ាងសម្បូរបែប ប៉ុន្តែ១០ឆ្នាំខាងមុខមិនប្រាកដថារូបិយប័ណ្ណ៥០០០ពាន់រៀលនេះដដែលអាចឲ្យអ្នករកបាយហូបបានឆ្អែតនោះឡើយ។ ប៉ុន្តែកាក់មាស និងកាក់ប្រាក់នឹងរក្សាតម្លៃរបស់វានៅដដែលក្នុងរយៈពេលដ៏យូរអង្វែង។
មានរូបិយប័ណ្ណក្នុងដៃ អំណាចរបស់អ្នកក្នុងការមានសេរីភាពហិរញ្ញវត្ថុហាក់ដូចជាស្ថិតនៅលើរដ្ឋាភិបាលរបស់អ្នក ប៉ុន្តែជាមួយនឹងកាក់មាសនិងកាក់ប្រាក់ អ្នកអាចនឹងប្រើប្រាស់កាក់ចំនួនដូចគ្នាពីឥឡូវនិងរាប់ទសវត្សទៅមុខទៀត អាចរហូតដល់ទៅជាង៥០០០ឆ្នាំខាងមុខក៏ថាបាន គឺអ្នកនៅតែមានអំណាចប្រើប្រាស់លុយនេះ និងអាចក្លាយជាអ្នកមានបើកាលណាអ្នកខំសន្សំទុកកាក់ទាំងនោះឲ្យបានច្រើន។ របស់មានតម្លៃក៏ដោយសារតែវាកម្រ មាសនិងប្រាក់ជារបស់រកបានដោយកម្រនៅក្នុងស្រទាប់ផែនដី ដូច្នេះតម្លៃរបស់វានឹងនៅតែមានតម្លៃក្នុងរយៈពេលដ៏យូរទៅខាងមុខ៕
ប្រែសម្រួល៖ ស្រីពៅ
ប្រភព៖ thewealthbusiness
