ក្រៅពីជំនាញពេទ្យ សាកលវិទ្យាល័យអន្តរជាតិ (IU) មានជំនាញជាច្រើនដែលទីផ្សារការងារកំពុងត្រូវការ!
សាកលវិទ្យាល័យ អន្តរជាតិ (IU) ដែលល្បីរន្ទឺខាង ជំនាញពេទ្យ ជាយូរមកហើយនោះ ការពិតសាកលវិទ្យាល័យ មាន ជំនាញជាច្រើនដែលទីផ្សារការងារកំពុងត្រូវការ ហើយសកលវិទ្យាល័យ បានត្រៀមខ្លួនយ៉ាងល្អ ដើម្បីស្វាគមន៍និស្សិតជំនាន់ថ្មីសម្រាប់ឆ្នាំសិក្សាថ្មីលើមុខជំនាញជាច្រើនដែលសម្បូរទីផ្សារការងារទាំងបច្ចុប្បន្ន និង អនាគត។ ខាងក្រោមនេះ គឺជាកិច្ចសម្ភាសរវាងនាយកគ្រប់គ្រង គេហទំព័រ BizKhmer ជាមួយលោកបេក្ខបណ្ឌិត ជ័យ សំណាង ព្រឹទ្ធបុរសមហាវិទ្យាល័យពាណិជ្ជសាស្ត្រ វិទ្យាសាស្ត្រសេដ្ឋកិច្ច និង ច្បាប់នៃសាកលវិទ្យាល័យ អន្តរជាតិ ដែលជាតំណាងឱ្យសាកលវិទ្យាធិការ ។ 
និពន្ធនាយក៖ នរណាក៏ស្គាល់ថា សាកលវិទ្យាល័យ អន្តរជាតិ គឺជាសាលាល្បីទាំងជាតិ និង អន្តរជាតិ ក្នុងវិស័យពេទ្យ តើក្រៅពីជំនាញពេទ្យដែលសាលាទទួលបាននូវកេរ្ត៍ឈ្មោះដ៏ល្បីល្បាញនេះ សាកលវិទ្យាល័យរបស់លោកមានជំនាញអ្វីផ្សេងទៀតទេ? បេក្ខបណ្ឌិត ជ័យ សំណាង៖ តាមពិតទៅសាកលវិទ្យាល័យ អន្តរជាតិ មានជំនាញជាច្រើនដែលយើងកំពុងដំណើរការ និង ទទួលបានដោយជោគជ័យ វាគ្រាន់តែថា កន្លងមកនេះមានភាពល្បីខ្លាំងលើជំនាញពេទ្យ។ និពន្ធនាយក៖ ខ្ញុំសូមឱ្យលោកប្រាប់ពីជំនាញជាក់ស្តែងក្រៅពីពេទ្យមានអ្វីខ្លះ? បេក្ខបណ្ឌិត ជ័យ សំណាង៖ ខ្ញុំសូមជម្រាបជូនថាសម្រាប់ជំនាញក្រៅពីពេទ្យដែលសាកលវិទ្យាល័យ អន្តរជាតិកំពុងដំណើរការសព្វថ្ងៃនេះមាន បរិញ្ញាបត្រ និង បរិញ្ញាបត្ររងដូចជា៖ ១. ភាសាអង់គ្លេស ២. នីតិសាស្ត្រ (ច្បាប់) ៣. វិទ្យាសាស្ត្រនយោបាយ ៣. សេដ្ឋកិច្ច ៤. គ្រប់គ្រង ៥. ធនាគារ និងហិរញ្ញវត្ថុ ៦. គណនេយ្យ ៧. គ្រប់គ្រងសណ្ឋាគារ និង ទេសចរណ៍ ៨. គ្រប់គ្រងទីផ្សារ ៩. វិស្វកម្មសំណង់ស៊ីវិល ១០. ស្ថាបត្យកម្ម ១១. ព័ត៌មានវិទ្យា ១២. គីមីចំណីអាហារ 
សូមជម្រាបលោកដែរថា ជំនាញដែលលោកឃើញនេះគ្រាន់តែជាគោលធំៗ ប៉ុន្តែយើងមានជំនាញជាច្រើនទៀតផងដែរ។ និពន្ធនាយក៖ សាលាខ្លះផ្សព្វផ្សាយល្អណាស់ដើម្បីទាញសិស្សឱ្យចូលរៀន តើលោកមានអ្វីដែលធានាអះអាងថា សាកលវិទ្យាល័យរបស់លោកល្អសាកសមនឹងកេរ្តិ៍ឈ្មោះ? បេក្ខបណ្ឌិត ជ័យ សំណាង៖ និស្សិតដែលហ៊ានឈានជើងចូលមកកាន់ទីនេះ ពួកគាត់ត្រូវមានទំនុកចិត្តតាមចំណុចដូចខាងក្រោម៖ ១. តួអង្គសាកលវីទ្យាល័យ៖ ជាគ្រឹស្ថានអប់រំដ៏ធំដែលមានកេរ្តិ៍ឈ្មោះល្បីល្បាញ និងរក្សាកេរ្តិ៍ឈ្មោះសម្រាប់ពេលបច្ចុប្បន្ន និងអនាគតវែងឆ្ងាយទៅមុខទៀត។ ២. កម្មវិធីសិក្សា៖ តាមការកំណត់របស់ក្រសួងអប់រំ ហើយដែលខ្លាំងបន្ថែម ទៀតនោះ គឺដាក់បញ្ចូលឯកសារថ្មីមានលក្ខណៈអន្តរជាតិ។ ៣. សាស្ត្រាចារ្យ៖ ត្រូវតែមានបរិញ្ញាបត្រជាន់ខ្ពស់ឡើងទៅ ដែលមានបទពិសោធន៍ចាប់ពី ០៥ឆ្នាំ ហើយចាំបាច់ត្រូវសម្រេចដោយក្រុមប្រឹក្សាសកលវិទ្យាល័យ ។ ៤. វិន័យ៖ សាកលវិទ្យាល័យនេះ មិនត្រឹមតែផ្តល់ចំណេះជំនាញនោះទេ តែនិស្សិតនឹងក្លាយជាមនុស្សមានវិន័យ សីលធម៌ និង គុណធម៌ ។ ៥. ការស្នាក់នៅ (អន្តេវាសិកដ្ឋាន)៖ នៅគ្រប់ទីតាំងរបស់សាកលវិទ្យា ល័យសុទ្ធតែមានកន្លែងស្នាក់នៅរបស់និស្សិតដែលផ្ទះឆ្ងាយ ។ ៦. ការជួយគាំទ្រនិស្សិត៖ មានកម្ចីសម្រាប់ការសិក្សា និង ផ្តល់ឱកាសការងារទាំងកំពុងសិក្សា និង បញ្ចប់ការសិក្សា ។ និពន្ធនាយក៖ បាទអរគុណលោក បេក្ខបណ្ឌិត ជ័យ សំណាង ដែលបានចំណាយពេលវេលាឱ្យគេហទំព័រ BizKhmer ជួបសម្ភាស! ដើម្បីចូលរួមក្នុងវិស័យអប់រំ សុំយកកិច្ចសម្ភាសន៍នេះចុះផ្សាយទាំងស្រុងនៅពេលខាងមុខ តើលោកអនុញ្ញាតទេ? បេក្ខបណ្ឌិត ជ័យ សំណាង៖ បាទខ្ញុំយល់ព្រមដោយរីករាយ និង អរគុណលោកនិពន្ធនាយកដែលបានចំណាយពេលវេលាជួបសាកសួរព័ត៌មាន៕
